tgoop.com/aboZainabaldalime/550
Last Update:
قصيدة لشهادة مولاتي الزهراء ( سلام الله عليها )
تدفن ياحــــيدر احبابــــك وترد بدموعك والونه
والاصعب من توصل بابك شتذكر وعيونك شافنه
مصيبه مصيبه مصيبه
—————
مصيبة حيدر اعله اجبال لـــو نزلــــت تزلزلهـا
ومواگـــــدر نــار بالدلال مِثـــل بابـــــه تشبلــها
مثلـــه فـــارس ومغـــوار وچثيره حصون هدلها
العجيبه هجموا اعله الدار هذي اشلــون يحملهــا
مــن هذي تبيـــن منزلتــه عاجز وشما اكتب عنه
كل شي بهالمنزل بيه ذكرى شتذكر وعيونك شافنه
مصيبه مصيبه مصيبه
——————-
ترد بهمومك اعله الدار تريد تخفف اهمومك
متعوب ونهارك ضيم ومصايب جان كل يومك
حگك فاگــــد الزهـــره ولجلها مغيره ارسومك
چانت فاطمـــه حزامك وإهي كل أهلك وگومــك
دافــن بيدك راحــــة بالك بالبيت شضل راحت منه
أم أولادك وحســـين إبنك شتذكــر وعيونك شافنـه
مصيبه مصيبه مصيبه
—————-
بعد فگد الرسول الچان حبيبك ياعلــي وروحــك
يَمَك فاطمــــه تواسيــك واهي جانت دوه جروحك
راحـــت وحــدك ضليت يسليك البچـــي ونوحك
شامخ ياجبـــل بالضيج ولو يبست علي سفوحـك
لا طــــه ولا فاطــــم يَمَــــك لا نفسك لا عطر الجنه
ومحراب الزهره من تنظره شتذكر وعيونك شافنــه
مصيبه مصيبه مصيبه
——————
ترد ياحيـــدر وعالباب مشهــد ينطرك يوجع
زينب يا علـــي اتانيـك يتيمــه وحالها يفجِّع
ولُو مَــرَك يتيـــم اذاك تنظره وعينك إدَمِّع
بهاي الساعه يا كـرار أضنها روحــك إتودع
عيونك لوصدت يم زينب إجيها ابّسمه لو بالونه؟
ومدمع بنتك ذاك السايـل شتذكر وعيونك شافنه
مصيبه مصيبه مصيبه
——————
علــي دار الوحـي دارك ومهبط رحمــة الديان
وبعد أم الحسن وحسين صفة للوعه والأحزان
الخيِّر ينفكد لوغاب ويضل بعده الهظم عنوان
الله يساعد الفاگد. أميره وخيرَة النسوان
الآهات بصدرك متوجــره شچم بير لصدرك يطفنه ؟
بيت أحزان الزهره يعينك شتذكـر وعيونك شافنه
مصيبه مصيبه مصيبه
الشاعر : أبو زينب الظالمي
BY الشاعر أبو زينب علي الظالمي
Share with your friend now:
tgoop.com/aboZainabaldalime/550