tgoop.com/aboZainabaldalime/6334
Last Update:
محرم ١٤٤٦ هـ
قصيدة رئيسية لليلة الحادي عشر من محرم
اهنا يلي تفزع للخلگ بالشِدات
إلحك بناتك بالفله ومضيعات
شجم طفل طفله ماتت بسحگ الخيل
بلا خيمه زينب ياعلي وچل الليل
إلحك بناتك بالفله ومضيعات
———
يلي بالشده نِعرفك حاضر تِعين المحتار
يلي تعرفك أمته عون ويمين المختار
ماظن يفوتك يالِذي بدرب السمه تحيط أخبار
بيا حاله تدري بعيلتك وبيا وضع يالكرار
عيالك أخبرك يالفحل ولوها
وأخت الگمر عالشاطي طاح أخوها
أو والي الحرم عالگومه مايگوه إعليل
بلا خيمه زينب ياعلي وچل الليل
إلحك بناتك بالفله و مضيعات
———-
يا ابو اليتامي يا علي إتفرح اليتامى إمرادك
ثمانين وأكثر بالهظم بطف كربلاء أحفادك
شتصير زينب ضيعت تگعد تنوح أولادك
لو تجمع إضياع الحرم وينك تعيد أمجادك
لو مشت يم جسم الذبيح العطشان
منهو اليلمها وبالبراري النسوان
اتورثت هم الياذي والحمله إثجيل
بلا خيمه زينب ياعلي وچل الليل
إلحك بناتك بالفله و مضيعات
———
عن زينب انقلك خبر من عُظمه معذور المات
بيا وكت حيدر يالولي حرمه الكم بچوله إتبات
فزعاتك وكشف الكُرَب لقاصي ودني متعنيات
الابدى زينب ياعلي دون المَلا لهالفزعات
كُبر الهظم لو يُنطه أسبقيه
للحشر أَولَه تبقى الغاضريه
محنتها مو مالت بُعُد لا تأجيل
بلا خيمه زينب ياعلي وچل الليل
إلحك بناتك بالفله و مضيعات
_
ساعات ويطر الفجر ياذيك صبحه لو طر
گبل الشمس ياحيدره إِلهزله بالطف تظهر
متعوده عالعِز بزرتك موش لمثل هالمنظر
باچر نحس من أَوِلَه ومكتض يحيدر بالشر
الحطيت چف الكافل بإديها
بالحبل باجر تمشي إمگيدها
وما بيها خله حسين أبداً من حيل
بلا خيمه زينب ياعلي وچل الليل
إلحك بناتك بالفله و مضيعات
————-
والعظمى كلش ياعلي باجر نزيله بكوفان
ديره الذي چانت لها إومِتسَيده بيها النسوان
يوم الشماته إيحل غداً وأكثر خصومك عربان
بس بالصور هيئة بشر وداخل ضميره ثعبان
باچر يحيدر يظهر إلي مكنون
وعمدا لزينب عن إِحسين إيسألون
وما أدري باجي دمع بالعين إيسيل
بلا خيمه زينب ياعلي وچل الليل
إلحك بناتك بالفله و مضيعات
————-
اكرم مجانات البلد إتطلبه الغُرُب عالمعهود
وباچر مضيفك ياعلي بفاكرة زينب موجود
والضيف لو عيّه يِصَل لدار العميد المنشود
يِصبَح على السيد فرض يتلگى ضيفه المهدود
ولو صار والضيف الأمر مو بيده
اعله الشيخ واجب يكفل الشديده
وكل صعبه عن ضيفه بعزم كون ايشيل
بلا خيمه زينب ياعلي وچل الليل
إلحك بناتك بالفله و مضيعات
____
بالكوفة لا ثالث لهم واحد فقط من إثنين
إضيوفك اذا ما ليك إجوا لعداك باچر ماشين
ومو هينه ياحيدر علي بنتك تطب إدواوين
ريت السمه فوگ الأرض أنطبگت گبل هذا الحِين
إشضل يسوه بالعيشه لون هذا صار
چا منهي تِسعد لَون زينب تحتار
ومنهي الي تسوه الغانمه والتبجيل
بلا خيمه زينب ياعلي وچل الليل
إلحك بناتك بالفله و مضيعات
—————-
ادري جساره مني أنه هذا التقدم كله
لزينب أحشمك ؟ يالوصي بس هذي تكفي عِلّه
لاچن وحگ المصطفى لعليه ربك صله
كل هذا من نار الذي إبوسط الگلب مشتعله
نكعد نسولف ياعلي بهظمها
نار بگلبنا وهم نواسي أُمها
ومو بس دموع الراس هم دمه يسيل
بلا خيمه زينب ياعلي وچل الليل
إلحك بناتك بالفله و مضيعات
- أبو زينب علي الظالمي
BY الشاعر أبو زينب علي الظالمي
Share with your friend now:
tgoop.com/aboZainabaldalime/6334