tgoop.com/aboZainabaldalime/6337
Last Update:
محرم ١٤٤٦ هـ
قصيدة/ ميمر لليلة العاشر
حل العصر ليل اوداع .. مجبل على المهيوبه
…
حل العصر يعني الليل ساعة ويخيم اعليها
وهالليله غير الاهات وغير الدمع مابيها
بت الوصي هذا الليل بس هذا وي واليها
وباچر يصبح غبّاش … الهم على المسلوبه
——
غبشه المصايب ولباب أم المصايب تلفي
وأشكد شموس لعدنان سيوف ال أمية تخفي
باچر چثيرات إنجوم من سمه الحره تطفي
ويعم ظلام الآهات … وأم الخدر منهوبه
——-
أم الخدر هذا القول لصبح الرزا ويتبدد
وأم المصايب يعلاه ليوم الحشر يتسيد
باچر غيوم النبكات إعله الفاضله تتردد
والدهر ويه الحوراء … إهوايه يِغير إسلوبه
——-
هوايه بحياة الحوراء أنماط وكثر تُستَحدَث
الما سامعه غير الصار بسب وشتايم تنغث
باچر صدگ أخت حسين هموم أم حسن تتورَث
والحزن باچر غبّاش … يچسي العقيله ثوبه
——-
ثوب الحزن يُنشَر راح ومكَدَرَه هالچِسوه
وبس الدمع للحوراء ماعدها أبد كل سلوه
حد الكفاله لم عون وبس باچر إويه الإخوه
ومن العصر ويه السوط … هذا الدهر وخطوبه
——-
متعِوده المغرب چان لو حل عليها وخيم
نور السبط يجلي الليل وعتمة ظلامه الأعظم
وهذا الوكت بيه عباس ذاك الشهم يتحزم
يحرس خِيام الحوراء … وبشيمته منصوبه
——-
باچر يحل وكت الليل وبنت الوصي أبلا حامي
لا يمها كافلها ولا الاكبر علي و الضامي
باچر دوايرها إتدور كوفي زنيم وشامي
وباچر فلا بالنسوان … كأم الخدر مصيبوبه
_أبو زينب علي الظالمي
BY الشاعر أبو زينب علي الظالمي
Share with your friend now:
tgoop.com/aboZainabaldalime/6337