باچر هلال السمه 
                    يطلع بلون الدمه 
               بيه دمه محراب حيدر 
                  لو ضلع من فاطمه 
،،،،،،،،،،،،،،،،،،،،
            باچر يطُر السمه هلال الحزن 
            باچر اسمع فاطمه تنوح وتون 
             والمدامع باچر تجَرح الجفن 
               وبلياليك على زينب تجن 
                 تشوفك وتجري الدمع 
                  وتذكر صواب الضلع 
                 گلب من زينب تِكَسَر 
                  لو ضلع من فاطمه 
،،،،،،،،،،،،،،،،،،
             هلالك يهل ويهل منهه الدمع 
             كل گلب للشيعه باچر ينفجع 
             الارض تحزن والسموات السبع 
             تبچي والافلاك باچر تنصدع 
              تشوف ثوبك بالسمه 
               ملطخ بفيض الدمه 
              شيبك بدمه تعفر 
              لو ضلع من فاطمه 
،،،،،،،،،،،،،،،،،،
              ياهلال الحزن ريتك لاتهل 
             تشوفك العين ومدامعهه تهمل 
             قوس ترمي گلوبنه بنار ونبل 
             ومنك النشاب يذبح چم طفل 
             چم مصيبه بشوفتك 
             العين تدمه بهلتك 
             والدمع من عيني احمر 
              لو ضلع من فاطمه 
،،،،،،،،،،،،،،،،،
          زينب تشوفك ودمعتهه تصب 
          من يهل هلالك يذوب الگلب 
           ذكرتهه بالسبي وذاك الدرب 
          وتذكر بديوانهم لمن تطب 
           تشوف چم طفله وطفل 
           چفوفه داميهه الحبل 
           عليه دليل امه تفطر 
            لو ضلع من فاطمه 
،،،،،،،،،،،،،،،،،،،
          ياشهر ليلة محرم شافتك 
          فاطمه وذاب الدليل بشوفتك 
          مثل يوم الباب صارت هلتك 
          وذكرتني بيوم حيدر طلعتك 
           خذت من عيني الوسن 
           هلالك وسم الحسن 
            بالطشت چبده توذر 
            لو ضلع من فاطمه 
،،،،،،،،،،،،،،،،،
          بطلعتك ياشهر دلالي انچوه
          ذكرتني بالچفوف وباللوه 
         وعلي الاكبر من ضهر مهره هوه 
          كون موتي وطلعة هلالك سوه
          ولا اشوفك من تهل 
          وذكر صواب الطفل 
          مدري هذا صواب منحر 
         لو ضلع من فاطمه 
،،،،،،،،،،،،،،،،،،،،،
 خادم الحسين ابو اسحاق الفحام

   ( قصيده للعليله ع)
،،،،،،،،،،،،،،،،،،،،،،،،،،
    حنيت ياليل شكثر لحبابي 
   جبت الگلب وزرعته شجره ببابي 
        بالدرب طشيت العمر 
         حنيت ياليل شكثر 
  جبت الگلب وزرعته شجره ببابي 
،،،،،،،،،،،،،،،،،،
  گالو نرد من سافرو 
  مات الورد عالمااجو 
  شحال الگلب لمن مشو 
     بضعونهم 
 عيني بقت تجري دمع 
 ونار الجفه تشب بالضلع 
 والروح مضويه شمع 
   لعيونهم 
   ياليل ساعاتك تزَّيد اشواگي 
   هم مثلي يشتاگ المشه بفراگي 
     قاسي الجفه وماينگدر 
     حنيت ياليل شكثر 
   جبت الگلب وزرعته شجره ببابي 
،،،،،،،،،،،،،،،،،،،،
  ياليل احسك من تجن 
  بيك الگلب كلش يحن 
  ويعيش لحظات الحزن 
  بغيابهم 
   مانمت عاشرت النجم 
   بكل نجمة اشوفنهم رسم 
    ممنونه كلش للحلم 
     من جابهم 
   لوما حلمهم ليلتي مانامهه
   نامت عيوني وتحلم باحلامهه 
   بلكن حلم منهم يمر 
    حنيت ياليل شكثر 
   جبت الگلب وزرعته شجره ببابي 
،،،،،،،،،،،،،،،،،،،
    لمن مشه ضعن الاهل 
   ماظل بعد عندي امل 
   وحسين عن عيني رحل 
     وشلوني 
  بعيونه اشوفن دمعته 
  يبچي عله حالة طفلته 
  شحال اليودع بنيته 
   وبعيوني 
    شفته عثر باول مسير اجدامه 
    من شاف مذبوح الورد جدامه 
      شفته هوهَ وشاله الصبر 
       حنيت ياليل شكثر 
    جبت الگلب وزرعته شجره ببابي 
،،،،،،،،،،،،،،،،،،،،،،،،،
    عالنوگ اشوفن كل هلي 
    ومني الدمع صار يهلي 
    تمنيت هم محمل الي 
    وياهم 
      تمنيت بدموع النظر 
   وياهم امشي بهالسفر 
   وي والدي وعمي الگمر
     والگاهم 
    عن يمنتي وعن يسرتي يباروني 
     وبسفرتي عن حالتي ينشدوني 
       شبيدي الجرح ماينجبر 
      حنيت ياليل شكثر 
    جبت الگلب وزرعته شجره ببابي 
،،،،،،،،،،،،،،،،،،،،
    ياليل والله تحيرت 
    وبظلمتك سكته صرت 
    هاكثر ياليل صبرت 
      بجفاهم 
    لابيه اعيش لوحدي 
    ولاظنه يرجع والدي
    ولابطل من مناشدي 
     ونساهم 
      ياليل طولت السهر وأحزاني 
     حيل ارده اضم عبدالله بين احضاني 
        يسليني وگعد وانتظر 
        حنيت ياليل شكثر 
     جبت الگلب وزرعته شجره ببابي 
،،،،،،،،،،،،،،،،،،،
خادم العليله (  ع ) ابو اسحاق الفحام 
 

                  (لسان حال العليله ع )
،،،،،،،،،،،،،،،،،،،
             عَله هونك،،، مسرع تمشي ليش 
              من دونك،،، اموت وما اعيش 
                     نبض گلبي بديك 
                   الگلب عايش عليك 
               من دونك،،، اموت وما اعيش 
،،،،،،،،،،،،،،،،،،
      على هونك يالمشيت ومسرع بممشاك 
          ابد ماريد عمري الما اعيشه وياك 
           ابويه وبين نبضاته الگلب خلاك 
           تدورك عيني يمي وبالبعد تلگاك 
           عله هونك،،، العمر عگبك خراب
            من دونك،،، اعيش وي العذاب 
                     واحس البيَ بيك 
                    الگلب عايش عليك 
               من دونك،،، اموت وما اعيش 
،،،،،،،،،،،،،،،،،،،
        بضعنك بويه راحن ضحكتي ودنياي 
          وردة روحي ماتت يالاخذت الماي 
          چنت روحك وماظن عايش بلياي 
           ياطلعة صبحهه وياصبَيْ عيناي 
           عله هونك،،، الصبح بعدك ظلام 
             من دونك،،، فلا عيني تنام 
                 لون بيدي اجيك 
              الگلب عايش عليك 
            من دونك،،، اموت وما اعيش 
،،،،،،،،،،،،،،،،،،،،
           مسرع ليش يالماخذ انفاس الروح 
        رحت عني وغدت كل الانفاس جروح 
          عليله وما اظن احمل بواچي ونوح 
         اصير شحالي عگبك يالنويت تروح 
          عله هونك،،، السفر لو عني طال 
           من دونك ،،، وهم عمري وخيال 
           وعلى الصار شبديك 
           الگلب عايش عليك 
           من دونك،،، اموت وما اعيش 
،،،،،،،،،،،،،،،،،،،،
            قصة شوگ مكتوبه بدمع وآلام 
           دمعي حروف وسطور الكتاب ايام 
           سهر عيني تگظي الليل ابد مانام 
           امس شخصك اجاني بطايف الاحلام 
           عله هونك ،،، يخطار الجفون 
           من دونك،،،  فلا ردت العيون 
           الحلم وداني ليك 
           الگلب عايش عليك 
           من دونك ،،،اموت وما اعيش 
،،،،،،،،،،،،،،،،،،،،
          رسم ضعون تمشي وبيهن الاحباب 
          ونوگ ابعاد ومغطيهه ذاري تراب 
         ورسم صورة عليله وواگفه على الباب 
          تصد بعيونهه وتتنطر الغياب 
          عله هونك،،،  يناوي على الرحيل 
           من دونك ،،، بعد ماعندي حيل 
            اجيلك واعتنيك 
            الگلب عايش عليك 
           من دونك،،، اموت وما اعيش 
،،،،،،،،،،،،،،،،،،،،،،،
          على هونك تدري بيَ بلانِفَس ظليت 
            ميته الروح بجفاك ودفنهه البيت
          خذت كلشي بحياتي وكلشي ماخليت 
          اروح وياك بويه بضعنك تمنيت 
           عله هونك،،،  ردت وياك اروح 
           من دونك ،،، اعيش بلايه روح 
            شكثر رادت تجيك 
           الگلب عايش عليك 
          من دونك،،، اموت وما اعيش 
،،،،،،،،،،،،،،،،،،،
خادم الحسين ابو اسحاق الفحام 

                     يمك يحسين 
                     خليت اثنين 
                    روحي ودلالي 
                     يمك يالغالي
                     خليت اثنين 
،،،،،،،،،،،،،،،،،،،،،
             بنظرات الموادع شافتك عيني 
                تگلي لاتروحين وتخليني 
           مو بيدي المشي يحسين تدريني 
               عدوك لليسر رايد يمشيني 
                       لو بيدي وياك 
                       ابقه انه هناك 
                      وشكيلك حالي 
                       يمك يالغالي 
                      خليت اثنين 
،،،،،،،،،،،،،،،،،،،،،،،
          ماردت امشي عنك ياضوه عيوني 
            شبيدي ومااظن يمك يخلوني 
           وعگب الخدر للشامات يسبوني 
           بيدي حبال واسمعهم يشتموني 
                    عيني تصد ليك 
                      وتحشم بيك 
                       ظلن آمالي 
                      يمك يالغالي 
                     خليت اثنين 
،،،،،،،،،،،،،،،،،،،،
               يمك روحي ظلت يا بعد روحي 
           مثل جرحك غميجه وتنزف جروحي 
             خذت وياي وني وغربتي ونوحي 
         ارخصني وگلي يختي وي الضعن روحي
                       امشي بلا روح
                        مليانه جروح 
                        تفكيري وبالي 
                        يمك يالغالي 
                        خليت اثنين 
،،،،،،،،،،،،،،،،،،،،،،
            مشيت وعيني ظلت للجسد تصبي
              ويمك ياعزيز الروح ظل گلبي 
             ويه الايتام يصعب يالولي دربي 
              عليَّ عيونهم طول الدرب تربي 
                         ليَّ ينظرون 
                      ابچي ويبچون
                     ورسمك يبرالي 
                        يمك يالغالي 
                        خليت اثنين 
،،،،،،،،،،،،،،،،،،،،،
             سفرتنه طويله وصعبه نمشيهه 
             حرم وايتام ياهو اللي يباريهه 
                 لاانت ولا عباس يحديهه 
              ولا راية كفيل ترفرف عليهه 
                     الچانت بحماك 
                      تسبيهه عداك 
                     وتنده يالوالي 
                      يمك يالغالي 
                      خليت اثنين 
،،،،،،،،،،،،،،،،،،،،،
             رحت والروح ظلت يالولي يمك 
               كل نسمة التمر بعطرك تشمك 
             اختك خويه كون بروحهه تضمك 
                عنك رايحة ويمك تظل امك 
                        يبني تناديك 
                      جاوبني شبيك 
                      گطعت اوصالي 
                        يمك يالغالي 
                       خليت اثنين 
،،،،،،،،،،،،،،،،،،،،،،،
خادم الحسين ابو اسحاق الفحام         

              
               (الرباب تخاطب الرضيع)
،،،،،،،،،،،،،،،،،،،،،           
                  لو بيدي نسمات الهوه 
                  لجرحك اسويهن دوه 
                  نحرك ودلالي سوه 
                  فوگ الرماح تگطعن 
،،،،،،،،،،،،،،،،،،،،،
            لوليتلك وانت عله رمحك غافي 
               خافن تفز يا نومة العوافي 
             مو عالرمح ياريتك عله چتافي 
               تغفه وتلوليلك ييمه شفافي 
                     نايم وعيني تناظرك 
                   تبچي عله حالة منحرك   
                   احلام امك التتنطرك 
                   فوگ الرماح تگطعن 
،،،،،،،،،،،،،،،،،،،       
          شفتك على رمحك غفن جفنينك 
            نومة مدلل يبني نامت عينك 
            كلش ترف وين الرماح ووينك 
           بحر الشمس وبلا غطه مخلينك 
                نحرك على راس الرمح 
                 يحچيلي آلام الجرح
                نحرك وگلبي المنذبح 
                فوگ الرماح تگطعن 
،،،،،،،،،،،،،،،،،
           نحرك شكالي من الرمح يالغالي 
            لكن شبيدي الرمح كلش عالي 
           امشي وصور رمحك تظل تبرالي 
              تمرد بروحي وتمرد بدلالي 
                 شكلك تغير بالشمس 
                مابيك من صورة أمس 
                وانياط دلالي احس 
                فوگ الرماح تگطعن 
،،،،،،،،،،،،،،،،،،،،           
          مو عالرمح ردتك بوسط أحضاني 
             تنام والوليلك بصوت اشجاني 
             بس وحدك ماعندي غيرك ثاني 
             يالشوفتك زيدت يبني احزاني 
                 يالنايم بحر الظهر 
               وامك على جمر الصبر 
               آمالي وسنين العمر 
               فوگ الرماح تگطعن 
،،،،،،،،،،،،،،،،،،،
            ربيتك وروحي تتاني ارباهه 
            وفگدك  ييمه بلا امل خلاهه 
             سواهه دهري يالولد سواهه 
            شال السنين وللرماح انطاهه 
                 ماچنت يبني محسبه 
                  للرمح كل ذاك الربه 
                 گلب امك وحلم الصبه 
                فوگ الرماح تگطعن 
،،،،،،،،،،،،،،،،،،
            عاتبت رمحك والرمح ظل حاير 
              يگلي مثل طف كربله ماصاير 
            ياطفل يگدر عالضمه يضل صابر 
            وماصارت الميت يطشره الحافر 
                 المن اصد متحيره 
                 من كل رمح منحر جره 
                 منحرك شفته ومنحره
                 فوگ الرماح تگطعن 
،،،،،،،،،،،،،،،،،،
 خادم الحسين ابو اسحاق الفحام

                          ( نعي)
،،،،،،،،،،،،،،،،،،،
             عباتي جمر صارت بيش اغطيك 
           واظن حر الشمس يحسين ماذيك 
             يخويه شلون ارد عنك وخليك 
               نايم عالرمل والرمل يچويك 
            واظن خيولهم من سحگن عليك 
               اثر حافر يخويه طَبَعَن بيك 
             وتشكي ضماك محد قبل يسگيك 
              يخويه من المخيم جيتي ليك 
              اشكيلك ضرب متني وراويك 
             واگعد يمك وعن حالي احاچيك
             تلوج عله الارض شفتك مخليك 
              وكلش موجعك سهمك اثاريك 
             وصحت ياطارشي ياريت اوديك 
               توصل للغري لحيدر اوصيك 
،،،،،،،،،،،،،،،،،،،،،،
خادم الحسين ابو اسحاق الفحام 
             

           اعلن حدادك يامحب اعلن حدادك 
          انشر سوادك عالارض انشر سوادك 
،،،،،،،،،،،،،،،،،،،،،
        يامحب انشر رايتك وي القميص البالسمه 
       الطم وواسي باللطم اخت الحسين وفاطمه 
      هالليله الاملاك بحزن تنشر قميصه البي دمه 
     بعين البصيره تشاهد اوصال الحسين مخذمه 
           احرگ فؤادك بالبچي احرگ فؤادك 
           انشر سوادك عالارض انشر سوادك 
،،،،،،،،،،،،،،،،،
    طشر ضلوعك باللطم بكل ضلع كون يضل اثر 
    خل يجري من صدرك دمه ويذكرك بدم النحر 
    چفوفك يگطعهه اللطم وتواسي چفين الگمر 
    سجل اسمك بسجل الخدم وتميز بهاي البشر 
           اجعل مرادك خدمته اجعل مرادك 
           انشر سوادك عالارض انشر سوادك 
،،،،،،،،،،،،،،،،،،
  احضر مجالس خدمته وسجل اسمك بسجل الخدم
        وزع الماي بمجلسه بچفين شيال العلم 
  خدمة حسين اعظم شرف هاي الحقيقه ومو وهم
      ماجور بالمجلس تره كلمن نعه وكلمن لطم 
             انذر اولادك للعزه انذر اولادك 
          انشر سوادك عالارض انشر سوادك 
،،،،،،،،،،،،،،،،،
  من تحضر بمجلس عزه تسجلك بديهه ام الحسن 
    دمعاتك يصيرن ضوه بگبرك اذا عيونك بچن 
     بشهر المحرم والحزن ماجور لو گلبك حزن 
     خل عينك تصب الدمع وليلك يمر بلا وسن 
         هالخدمه زادك بالحشر هالخدمه زادك 
         انشر سوادك عالارض انشر سوادك 
،،،،،،،،،،،،،،،،،
     هنا ناعي ينعه بحسرته هنا شاعر يردد شعر 
     هنا شايب يون بقهر گلبه عله زينب منكسر 
    وهنا شفت حرمه بچت تذكرت زينب والخدر 
   حب الحسين وخدمته صك جنتك يوم الحشر
            وحسين رادك يالتريده حسين رادك 
             انشر سوادك عالارض انشر سوادك 
،،،،،،،،،،،،،،،،،
       لوردت تحضر مجلسه احضر بمكنون الگلب 
     خل يظهر عليك الحزن وبكل وقار انت تطب 
         جسام والاكبر تره تلگاهم بهذا الدرب 
       درب الحسين ومنهجه لليقره تلگاهن كتب 
            اكتب امجادك بالكتب اكتب امجادك 
            انشر سوادك عالارض انشر سوادك 
،،،،،،،،،،،،،،،،،
خادم الحسين ابو اسحاق الفحام   

                           

                 دليني يماي العين دليني 
             خل اسمع ونينك واسمع ونيني 
            روحي تمردت من شافتك عيني 
            چنك مو هذاك حسين يحسيني 
            اجيتك والوجل يبن امي واليني 
           وحزنك والهضم يحسين غاطيني 
               لسبالي تگابلني وتحاچيني 
             وتشور عليه راي وبيه تدليني 
               وترد وياي للخيمه تمشيني 
            وترد خدر التفرهد من نساويني 
          وتطفي نارنه الحرگت صواويني 
         ومن شفتك صحت يالزهره عينيني 
               خلي نلايمه مابينچ وبيني 
             ياريته يفك عينه ويحاچيني 
                خليني اذكره بهاي خليني 
                انه مخدرة حيدر يسميني 
              يقبل بالغرب يمشي ويخليني 
               يانشعة ايامي وزهوة سنيني 
               عگبك ما اريد العمر تدريني 
            وشيسوه العمر والشمر يسبيني 
            واسمع صوت من نحرك يناديني 
              يزينب لاتروحين وتخليني 
            يختي بظل عباتچ يختي فييني 
            عن حر الظهر والشمس غطيني 
              لچن ما ردت اگلك يالمبچيني 
            عباتي احترگت وگامت تچويني 
،،،،،،،،،،،،،،،،،،،،،،
خادم الحسين ابو اسحاق الفحام

           حرگو خيمنه يا علي حرگو خيمنه 
           حرگو خيمنه يا علي حرگو خيمنه 
،،،،،،،،،،،،،،،،،،،،
              مدللاتك يا علي حرگو خيمهن 
              لا اخو العدهن ولا حماي عدهن 
               للوطن ياهو الذي باچر يردهن 
               لليسر باچر يروحن ياضمدهن 
          والله انهضمنه يا علي والله انهضمنه
            حرگو خيمنه يا علي حرگو خيمنه 
،،،،،،،،،،،،،،،،،،
               للسبي باچر يحيدر ياخذوهن 
             هنه بس نسوان ويشتمون ابوهن 
                مدللاتك بالحبال يگيدوهن
               يمشن ويبرالهن چتال اخوهن 
          تدري انشتمنه يا علي تدري انشتمنه 
            حرگو خيمنه يا علي حرگو خيمنه 
،،،،،،،،،،،،،،،،،
             زينب ام الخدر يا حيدر سبوهه 
              حرگو الخيمه عليهه وطلعوهه 
               حرمة النسوان ابداً مارعوهه
              بت علي الكرار مسبيه خذوهه 
             ذبحو زلمنه يا علي ذبحو زلمنه 
           حرگو خيمنه يا علي حرگو خيمنه 
،،،،،،،،،،،،،،،،،،
             يا علي الچانت ابد ما شايفيهه 
             طلعوهه والحبل شدوه بديهه 
           تدري بيهه مخدره ويصعب مشيهه 
               رادتك يا حيدر تلحگ عليهه 
               زايد المنه يا علي زايد المنه 
            حرگو خيمنه يا علي حرگو خيمنه 
،،،،،،،،،،،،،،،،،،،
              چنه بحماك وچنت خيمه علينه 
             تدري شنهي الصار بالطف يا ولينه
                راحو الوليان بويه ونولينه 
            واحنه بس نسوان شنسوي شبدينه 
            خصمك ظلمنه يا علي خصمك ظلمنه 
             حرگو خيمنه يا علي حرگو خيمنه 
،،،،،،،،،،،،،،،،،،،
            بويه اجتنه الخيل لخيمنه وولتنه 
                ناس تطلب ثار وبداً مارعتنه 
              حرگت خيمنه علينه وطشرتنه 
            عگب حرگ الخيم ردت فرهدتنه 
             محد رحمنه يا علي محد رحمنه 
            حرگو خيمنه يا علي حرگو خيمنه 
،،،،،،،،،،،،،،،،،
             ذبحو حسين العده وذبحو كفيلي 
             بلا خيم گظيته يابو حسين ليلي 
             بويه عندي ايتام گامت تشتكيلي 
             وانه من كثر الهضم مهدوم حيلي 
              بالهيمه همنه يا علي بالهيمه همنه 
             حرگو خيمنه يا علي حرگو خيمنه 
،،،،،،،،،،،،،،،،،،
            ردتك بطف كربله تشوف الجرالي 
             شلون مرن يا علي عليَّ الليالي 
            حرت المن اشكي يالمهيوب حالي 
              راحو الخوان غالي يتبعه غالي 
           كون انت يمنه يا علي كون انت يمنه 
           حرگو خيمنه يا علي حرگو خيمنه 
،،،،،،،،،،،،،،،،،،،،
               يا علي للكوفه مسبيه خذوني 
               لمجلس بن زياد بويه طببوني 
              شتمو الزهره الزچيه وسمعوني 
             وبعد لارض الشام ياحيدر سبوني 
             عالترب نمنه يا علي عالترب نمنه 
             حرگو خيمنه يا علي حرگو خيمنه 
،،،،،،،،،،،،،،،،،،،
 خادم الحسين ابو اسحاق الفحام     

               موجعتك يحسين الخيل 
                مسحوگ ومتغير حيل 
                  مثلك أبداً ما صاير 
                ميت ومطشره الحافر 
                مسحوگ ومتغير حيل 
،،،،،،،،،،،،،،،،،،،،،،،،
          يالحلوات رسومك گلي شسوت بيك 
        شلهه الخيل وياك وتسحگ حيل عليك 
            لوبيدي اگعد واتلگاهه وما خليك 
       انطي ضلوعي لسحگ الخيل وما انطيك 
                رسومك يبن امي الحلوات 
                   مسحوگات ومتغيرات
                  گلب اختك يمك حاير 
                   ميت ومطشره الحافر 
                   مسحوگ ومتغير حيل 
،،،،،،،،،،،،،،،،،،
          يالچانت بيك من الجنه هوايه اوصاف 
             قرآن الله حروفه بوجناتك تنشاف 
         روحي عليك من النسمات التسري تخاف 
           گلبي بكعبة رسم حروفك صله وطاف 
                 ياكعبة روحي من اشتاگ
                    ياحلم العين الينباگ
                   يا صوره تبچي الناظر 
                   ميت ومطشره الحافر 
                   مسحوگ ومتغير حيل 
،،،،،،،،،،،،،،،،،
        بعينك چانت عيني تشوف هوايه طيوف 
          يالچنت النور اليهديهه والبيك تشوف 
         فزت مره وشافت ظلمه وشافت خوف 
        شافت غربه وشافت حيره ودم وطفوف 
                 شافت مذبوح وعريان 
                بالخيل تسحگه الفرسان 
                 ويمك مكسورة خاطر 
                 ميت ومطشره الحافر 
                 مسحوگ ومتغير حيل 
،،،،،،،،،،،،،،،،،،،
          عيني تدور ياهو تفزعه بهذا اليوم 
          ياهو يرد الخيل الداست عالمظلوم 
          صاحت ياسكنه وياليلى ويم كلثوم 
         بن امي تطشر بين الگاع وخيل الگوم 
                  شفتك متوذر يحسين 
                 ما شافت مثلك كل عين 
                 وشلون ندفنك باچر 
                 ميت ومطشره الحافر 
                مسحوگ ومتغير حيل 
،،،،،،،،،،،،،،،،،،،
        حشمت اهل الغيره الطاحو وسط الكون 
              ياعباس ويا شيخ الانصار وجون
             بلكن هاشم من يسمعوني يفزعون 
        وگبل الخيل عله حسين المرمي يلحگون 
                  منهم ما حصلت جواب 
                  تمنيتك يا داحي الباب 
                  يم حسينك لو حاضر 
                  ميت ومطشره الحافر 
                  مسحوگ ومتغير حيل 
،،،،،،،،،،،،،،،،،،،،
         من فوگ التل درت عيوني عله العباس 
           وينك يا نوماس الغيره الما ينجاس 
         تدري حسينك طاح وحاطت بيه الناس 
          واشرف ما بالدنيا بحافر خيل انداس 
                    ردتك تحضر يالوفاي 
                     وتگطر بشفافه الماي
                    ما صارت بس بالعاشر 
                    ميت ومطشره الحافر 
                    مسحوگ ومتغير حيل 
،،،،،،،،،،،،،،،،،،،،،
خادم الحسين ابو اسحاق الفحام        

                           ( نعي)
،،،،،،،،،،،،،،،
               ابد لا صارت ولا شفناهه
               هاي بس بكربله اسمعناهه 
،،،،،،،،،،،،،،،،،
             هاي بس بكربله صارت تره 
              عالعيال الخيم نار موجره 
            اطفال ظلت بالبراري مطشره 
            هامت وماظن بعد تلگاهه
،،،،،،،،،،،،،،،
             تحيرت زينب بجمع العايله 
             من لهيب النار فرت بالفله
             سمعنه صارت هاي بس بكربله 
            كربله عله الضيف يا مقساهه
،،،،،،،،،،،،،،،،،
           ارده اعاتب كربله وابدي العتب 
           ليش ما طفيتي بخيمهه اللهب 
           ليش يا كربله وگليلي السبب
           ما جمعتي عيالهه وياهه 
،،،،،،،،،،،،،،
             ليش ظلت بيچ زينب حايره 
             تدور عله العايله المتطشره 
            زينب وتدرين بيهه مخدره 
            ومنهه اخذتي بتربتچ ولياهه 
،،،،،،،،،،،،،،،،،،
           وبعد گالو بيچ  يم المشرعه 
          گمر طايح والچفوف مگطعه 
          وزينب خلاف الكفيل مروعه 
          حين طاح من الكفيل لواهه
،،،،،،،،،،،،،،
          واگفه عله التل تدير عيونهه 
          لبو اليمه ودمع تجري جفونهه 
          والاطفال وياهه وينشدونهه 
          حسين راح وبالشدد خلاهه 
،،،،،،،،،،،،،
         تريد توصل للحسين تناشده
         وخاف من تطلع يشوفوهه العده 
         تخبره رادت بالجره عليهه وسده 
         تودعه وتخبره بخبر ممشاهه 
،،،،،،،،،،،،،،،،،
        ابد ما صارت مثل هاي وجرت 
        ومثل زينب فلا حرمة تحيرت 
        چنهه مو زينب وحيل تغيرت 
        والدهر ضيم وقهر راواهه
،،،،،،،،،،،،،،،
        يامحب اسمع بعد هذا الامر 
        عالمسامع صعبه تطره وتنذكر 
        شنهي شافت بت علي بوكت العصر
        وليش ذيچ الشوفه ماتنساهه
،،،،،،،،،،،،،،،
         دنت يم حسين سمعت ونته 
        جرح فوگ الجرح صاير شافته
        ياجرح ماذيك خويه نشدته
        عالمثلث اشر ودلاهه 
،،،،،،،،،،،،،،،،،
        شافت جروحه فلا الهن عدد 
         مايفيد ضماد لا ينفع بعد 
         توجهت لارض الغري يابو الشدد 
         جيب لجروح الحسين دواهه 
،،،،،،،،،،،،،،،،،،،
         ما اظن يا كربله مثلچ ارض 
        لو ندور بالفله طول وعرض 
        زيارتچ صارت عله الوادم فرض 
        الباري خلد ارضچ وعلاهه 
،،،،،،،،،،،،،،،،
خادم الحسين ابو اسحاق الفحام

             ( عقيدتنا راسخة بالحسين)
،،،،،،،،،،،،،،،،،،،،
                        بكل اللغات 
                        انت الحياة 
                       انت الحسين 
                        انت النجاة 
،،،،،،،،،،،،،،،،،،
               تصفحنه تاريخ البشر وقرينه 
             بكل معجزات اهل الفلك مرينه 
              غيرك حقيقة ومنذبح ملگينه 
                انت السفينه الباچر تنجينه 
                       انت الحبيب 
                       انت الطبيب 
                      انت الحسين 
                       انت النجاة 
،،،،،،،،،،،،،،،،،،،،
              يحسين انت الامل انت الغايه 
                اول شهيد بدمه يرفع رايه 
               ثورات صارت بالسنين هوايه 
               بس ثورتك ظلت افكار وآيه 
                        بثورة نعوش 
                      هِدَمتْ العروش 
                       انت الحسين 
                        انت النجاة 
،،،،،،،،،،،،،،،،،،،،،،
                يا بسملة قرآنا المنحوره 
            بطف كربله بدمك كتبت السوره 
           خطيت نهج الله بجميع اسطوره 
          من عله ترابك كِمْلتْ اوضح صوره 
                         سر البقاء 
                        في كربلاء 
                       انت الحسين 
                       انت النجاة 
،،،،،،،،،،،،،،،،،،،،،
           يحسين دم جرحك يداوي جروحي 
           وروحك النبض اللي يعيش بروحي 
            لجلك بچيت ولجلك يظل نوحي 
             ماتنهدم بسمك تظل صروحي 
                        مُلكَكْ اصير
                       انت الامير 
                      انت الحسين 
                       انت النجاة 
،،،،،،،،،،،،،،،،،،
             من فطرس وبينت عدنه آياتك 
           والباطل هدمته بصدح صرخاتك 
             كل ارض صارت كربله لآهاتك 
              ننولد ونعيش بصده هيهاتك 
                     انت الذبيح 
                    بسمك نصيح 
                    انت الحسين 
                     انت النجاة 
،،،،،،،،،،،،،،،،،،،
              باچر اذا صار الحشر مولانه 
               كلمن يبين مذهبه وعنوانه 
            بس حبك اليحضر هناك ويانه 
            نحلفك بضلع الزهره لا تنسانه 
                        لامانضيع 
                      انت الشفيع 
                     انت الحسين 
                      انت النجاة 
،،،،،،،،،،،،،،،،،،،،،،،،
خادم الحسين ابو اسحاق الفحام      

                     اجانه الليل اجانه 
                      يشمعتنه وضوانه 
                     بظلام الليل اريدك 
                      يشمعتنه وضوانه 
،،،،،،،،،،،،،،،،،،،،
             اجانه الليل واحنه بلايه والي
             حرم وايتام ومضيعه الغوالي 
             محيت البال بس انت عله بالي 
             بظلام الليل وحدي وهذا حالي 
                       اَلِمَنْ باليتامه 
                    قسه عليهه بظلامه 
                    بظلام الليل اريدك 
                    يشمعتنه وضوانه 
،،،،،،،،،،،،،،،،،،،
            بظلام الليل والوحشه وسكونه 
              احس الخوف يرعبنه بعيونه 
               الفكر يرتاب بفكاره وظنونه 
                   تمنيناك ياعزنه وابونه 
                       تمنيتك تجينه 
                     يبو الروح الحنينه 
                     بظلام الليل اريدك 
                      يشمعتنه وضوانه 
،،،،،،،،،،،،،،،،،،،،،،
              ام جسام مذهوله عله ابنهه 
             وظلام الليل مايرحم جفنهه 
             وليلى هناك گطع گلبي ونهه 
            ورباب عله الطفل زايد حزنهه 
                    عبدالله تريده 
                  وتحاچي وريده 
                 بظلام الليل اريدك 
                 يشمعتنه وضوانه 
،،،،،،،،،،،،،،،،،،،،
             اجانه الليل بآهاته وحنينه 
           الگلب يشتاگ ويفطره ونينه 
             ردت عباس بالرايه يجينه 
          تصير عله الحرم خيمه يمينه
                يعباس من اشوفك 
                تغطيني بچفوفك
                بظلام الليل اريدك 
               يشمعتنه وضوانه 
،،،،،،،،،،،،،،،،،،،،
              غربه وليل ودموع ويتامه 
             وليل الفرگه ياذينه بظلامه 
              يدري الكافل النار بخيامه 
          وشمر يحسين يشتمني بكلامه 
                  واسمعه ومن اسمعه 
                   تصير بعيني دمعه 
                   بظلام الليل اريدك 
                   يشمعتنه وضوانه 
،،،،،،،،،،،،،،،،،،،،،
               اجاني الليل وانت عني رايح 
                وظلام الليل ذكرني بملامح 
              چنت بيهه امسي وبيهه اصابح 
            الهجر يحسين حيل لگلبي جارح 
                   چنت كل يوم اشوفك 
                   صعب يالوالي اعوفك 
                    بظلام الليل اريدك 
                     يشمعتنه وضوانه 
،،،،،،،،،،،،،،،،،،،،،،،
خادم الحسين ابو اسحاق الفحام     

                    بكل قوانين الارض 
                     دفنة الميت فرض 
                    بالطقوس العالميه 
                    بكل ديانات البريه 
                    دفنة الميت فرض 
،،،،،،،،،،،،،،،،،،،،،،،،
              ارده اناشد اهل العقول الحكيمه 
             شوكت صارت دفنة الميت جريمه 
            ليش يبقه حسين مرمي بگاع هيمه 
               ودفنته من الجنايات العظيمه 
                      واليخالف هالامر 
                    بامر طاغوت العصر 
                   عكس مذهب ال اميه 
                      بكل ديانات البريه 
                      دفنة الميت فرض 
،،،،،،،،،،،،،،،،،،،،،
             بكل ديانات الارض ربك فُرَضْهه 
               الميت يوارونه وتلمه ارضهه 
             وال اميه اظهرت بالطف بغضهه 
             خالفت قانونهه ونكرت فَرُضهه 
                   وبفكرهه الناصبي 
                  خالفت شرع النبي 
                  بالديانه وبالوصيه 
                 بكل ديانات البريه 
                  دفنة الميت فرض 
،،،،،،،،،،،،،،،،،،،
               ابد بالتاريخ ما مرت علينه 
            ميت وبالخيل جسمه مهشمينه 
             ربك بمنهاجه وبمضمون دينه 
            والاحكام البيهن يوصي نبينه 
                   اكرام للميت دفن 
                 مو سحگ خيل وطحن 
                  تغير فوگه الاعوجيه 
                    بكل ديانات البريه 
                   دفنة الميت فرض 
،،،،،،،،،،،،،،،،،،
          اجه السجاد ولگه اجساد الهواشم 
          شاف ابوه حسين والاكبر وجاسم 
           جثث بيهه رماح وسهام وصوارم 
           مغيره بحر الشمس ذيچ المعالم 
                   بظهر مطوي بعلته 
                      هالمناظر اذته 
                  صاح وين الهاشميه 
                    بكل ديانات البريه 
                    دفنة الميت فرض 
،،،،،،،،،،،،،،،،،،،،
           وگف ينظر والعيون يصب دمعهه 
             يعاين الاجساد ويحير لوضعهه 
          مگطعات اوصالهه ويصعب جمعهه
           بده بدفن حسين والچلمه سمعهه 
                   الطفل يكسر خاطري 
                   نحره يشبگ منحري 
                  ونشكي للباري سويه
                    بكل ديانات البريه 
                    دفنة الميت فرض 
،،،،،،،،،،،،،،،،،،،
            دفن انصار الحسين وگال عنهم 
            ذوله بالتاريخ ابد ميصير منهم 
             وراح يم النهر من كمل دفنهم 
            وگف يم عباس ويخبره بحزنهم 
                  عمي صرنه بياوضع 
                   يا ديانه ويا شرِع
                 اجسادكم تبقه رميه 
                  بكل ديانات البريه 
                   دفنة الميت فرض 
،،،،،،،،،،،،،،،،،،،،،،
خادم الحسين ابو اسحاق الفحام        

ليسـتة #مؤسسة منبريون الحسينية🌻.
#التثبــيت_سـاعـه
#الحــــــــــذف
بـعـــد نشر اللسـتـةّ بـ4  سـا؏ـات
� غَـير مبري الـذمـةّ ٲمـام الله ڪـل من يـحذف البــوت دون ؏ـلمنا
استقبل 300 عضو
━━━━━━━━━━━━━━━━━━
للإشـــتِـراك 👇🏻.

وإرسل قناتك هُنا : @ahmed_alziwar0

--------------------------------------------------

قناة تعليم الرواديد الالحان
https://www.tgoop.com/ahmed_alziwar1