tgoop.com/abohijer/1741
Last Update:
يالزهرءا مو مال فراك
لعيونج بساع اشتاك
اجلي السفر يا يمه
مابيه وحمل لجمه
لعيونج بساع اشتاك
*****
كسر الكلب ما ينجبر شل الحال
وعيوني تجري على الوجه هماله
وليفكد امه من الصغر يبقه وحيد
وبس الحزن طول العمر يحلاله
وانا الفكدت امي بعمر ثلث سنين
وجدامي تمشي ويا نعش تبراله
مابيه حيل الفركتج وانا صغير
سهام البعد وسط الكلب جتاله
لو سولفو طاري ظلوع
انا الحسين ابجي دموع
فراكج صدك ماذيني
وطولج رسمته بعيني
لعيونج بساع اشتاك
******
ظلمه المنازل والدرب راح النور
والزهره راحت ياخلك من عدي
حسباتي كثرن ولوكت شل الحال
كل حسبه تاخذ بالكلب وتودي
روحي الحزينه تمرمرت من النوح
محتار اناشدمن بقيت الوحدي
مر الصبر ما ينحمل يا دنياي
ولايم افكد المشت ما يدري
من الزمن شفت شكال
وبعدج صدك شل الحال
بغربه الوكت خلاني
وانا الحرت بحزاني
لعيونج بساع اشتاك
********
غطاني حزني وما شفت راحت بال
وشال الفراح يوم المشت غاليتي
يا دنيه كافي من الهظم ولجمات
شاب الكلب شعدج بعد خليتي
ظليت اناطر بالدرب لمته تعود
مارد خبر يوم الجفت من بيتي
ما بيه حيل انكل جدم راح الحيل
وي امي راحت يا زمن عافيتي
من الحزن واللجمات
ورده وذبل غصني ومات
ديره وخلت وياها
كل عمري ما انساها
لعيونج بساع اشتاك
******
يم الحنان وسلوتي طولج ظاع
وانا انتظر منج خبر لو جيه
انشد عليج بكل كتر حته الباب
ومتاني طولج بالدرب يوميه
وين الكه مثلج بالخلك يم حسين
يم الرحم يم الوفاء وحنيه
عالفركه ماضل كل صبر بالدلال
يصعب علي ليل الهجر مابيه
ذكره البقت شيله وثوب
يمه البعد ما مرغوب
ليل اليمر سهريته
ودم الجفن بجيته
لعيونج بساع اشتاك
******
فراشج ليكيته وما شفت طولج بيه
وظليت اعاين كل كتر واتنطر
وتذكرت يام الحسن ليل الفات
وكلبي الترف من الحزن يتفطر
فراكج جبل ما ينحمل وانا صغير
يمه وغلاتج عالبعد ما أكدر
ياساعه اشوفج يا وكت وتردين
خلصته لجمات الوكت واتحسر
بطاريج اتذوب الروح
وتفرغت بس للنوح
يالعشتي وسط عيوني
عنج فلا يغيروني
لعيونج بساع اشتاك
******
ابو هاجر المجراوي
BY ابوهاجر المجراوي
Share with your friend now:
tgoop.com/abohijer/1741