tgoop.com/advocatekulbayev/35
Last Update:
“Класс” босиб қамалиб кетаётганлар....
Ҳозирда жиноят қонунчилигини қўллаш соҳасида “ажойиб” тенденция мавжуд. Агарда Сиз “Одноклассники” ижтимоий тармоғида диний контентларга “класс” белгисини боссангиз ва бу контентлар экспертиза хулосасига кўра “ақидапарастлик ғоялари билан йўғрилган” деб топилса Сиз Ўзбекистон Республикаси Жиноят кодексининг 244-1-моддаси 3-қисми “г” банди билан (Жамоат хавфсизлиги ва жамоат тартибига таҳдид соладиган материалларни Интернет жаҳон ахборот тармоғидан фойдаланиб тарқатиш) жавобгарликка тортилиб, 5 йилдан 8 йилгача қамалиш тахдиди остида қоласиз. Эътибор беринг бу оғир жиноят ҳисобланади. Мазкур модда билан жиноий жавобгарликка тортилишингизга сабаб эса Сиз “класс” белгисини босишингиз натижасида мазкур материаллар сизнинг “друзья”ларингизга кўринишидир.
Энди бу квалификация қанчалик тўғри ёки нотўғри эканлигини қуйида ҳуқуқий жиҳатдан кўриб чиқиб, ўз шахсий фикримизни билдириб ўтамиз:
биринчидан, “Одноклассники” ижтимоий тармоғининг расмий саҳифасига сўров йўллаб, “класс” белгисига таъриф бериш сўралганида, “Класс – бу ижтимоий тармоқдаги баҳо бўлиб, у фотосурат, изоҳ, ёзув ва бошқа контентларга қўйилиши мумкин. У фойдаланувчнинг нашрга нисбатан ижобий муносабатни билдиради, контент ёққанидан гувоҳлик беради”, - деган жавоб олинди. Шу сабабли мантиққа ҳам тўғри келмайдиган, лекин ҳозирги кунда амалиётда кенг қўлланилаётган - фойдаланувчи контентга шунчаки муносабат билдиргани каби хатти-ҳаракатини таъқиқланган материалларни тарқатиш деб баҳолаш каби амалиёт мутлақо адолатсиз бўлиб ҳисобланади.
иккинчидан, ақидапарастлик ғоялари билан йўғрилган деб эътироф этилаётган мазкур материалларни статистикасини текширганингизда мазкур контентларга минглаб фойдаланувчилар кўриб “класс” белгисини босишганини гувоҳи бўласиз. Энди ҳимоя томонида асосли ва ҳақли эътироз пайдо бўлади – агарда ҳақиқатан мазкур ҳолат 5 йилдан 8 йилгача озодликдан маҳрум қилишга сабаб бўлувчи оғир жиноят деб топилиши лозим бўлса, нима сабабдан қолган “класс” белгисини босган фойдаланувчиларнинг шахси аниқланиб, уларнинг хатти-ҳаракатларига ҳуқуқий баҳо берилмайди? ҲМҚО органлари фақатгина шахсини аниқлай олган фуқароларни жавобгарликка тортиши, қолган “айбдор” фойдаланувчилар, улар минг чандон фаол ҳаракат қилишган бўлишсада жавобгарликка тортишмаслиги жиноят кодексининг “фуқароларнинг қонун олдида тенглиги”, “одиллик”, “жавобгарликнинг муқаррарлиги” каби принципларга умуман амал қилинмаётганлигини, ҲМҚО органлари томонидан шунчаки “результат” (натижа) қилиш учун ҳаракат қилинаётганини кўрсатади.
учинчидан, “Одноклассники” сайтининг мобил платформаси кўздан кечирилганда “класс” тугмаси телефон экранининг ўнг томонида, қўлга яқин жойда туриши, “Лента” юқорига ҳаракатлантирилиб “листать” қилинганда “класс” белгисини беҳосдан босиб юбориш хавфи юқорилигини кўриш мумкин. Шунингдек, мазкур “класс” белгисини қайтариб олиш имконияти ҳам мавжуд бўлиб, “класс” босилган ҳолатни “тарқатиш” сифатида баҳолаш қанчалик заиф далилга асосланишини кўриш мумкин. Қолаверса “класс” белгисини фақат телефон эгаси эмас, балки бошқа ҳар қандай шахс ҳам босиши мумкинлиги ҳақиқатдан йироқ эмас.
P.S. Мазкур постни ўқиб “Одноклассники”да “класс” боссам жавобгар бўлмас эканман деган эрта хулосага келманг. Чунки мамлакатимизда бу турдаги казусли вазиятларга “муносабат” ўзгармаган. Барибир 244-1-модда ва бошқа моддалар билан жавобгар бўласиз. Шу сабабли Абу Салоҳ, Абдуллоҳ Зуфар, Содиқ Самарқандий каби шахсларнинг контентларини умуман кўрмасликни ва “класс” босмасликни қатъий маслаҳат бераман.
Каналга уланиш:
@advocatekulbayev
BY Advokat Xondamir Kulbayev
Share with your friend now:
tgoop.com/advocatekulbayev/35