tgoop.com/advocatekulbayev/88
Last Update:
Озодбек Назарбеков билан содир бўлган аварияда ким айбдор?
Яқинда Ўзбекистон Республикаси Маданият вазири Озодбек Назарбеков ўзининг хизмат автомашинасида йўлни кесиб ўтаётган велосипед хайдовчисини уриб юборганлиги акс этган видеолавҳалар тарқалди.
Мазкур видеолардан келиб чиқиб кимдир ходисада айбдор велосипед хайдовчиси деса, яна кимдир айбдор вазир эканлигини, унинг мансабидан келиб чиқиб оддий инсонни айбдор қилиб кўрсатишаётганини бонг ураяпти.
Лекин, Чингиз айтганидек: “Қўўрқ-манг-лар, ҳаммаси мени назоратим остида”)
Авваламбор, мазкур ҳолат юзасидан тергов эксперименти ўтказилиши лозим. Унда О.Назарбеков иштирок этиб, йўлни кесиб ўтаётган вилосипед хайдовчисини қайси масофада кўришни бошлаганини ва бошқа иш учун муҳим ҳолатларни кўрсатиб беради.
Шундан сўнг судга оид автотехник экспертиза тайинланади. Экспертлар йўл қопламасининг намлигини, кўриниш чекланишини, тормоз изини, йўлнинг ўлчамларини, урилиш нуқталарини ва бошқа факторларни инобатга олиб, Маданият вазири О.Назарбеков бошқариб келаётган транспорт воситаси авария содир бўлган вақтда, мазкур хавфни олдини олишга имконияти бор эдими ёки имконияти йўқ эдими – шу юзасидан аниқ хулосани беришади. (ҳуқуқни қўлловчилар тилида бу “имел – не имел” дейилади)
Мазкур берилган хулосага таяниб, агарда О.Назарбеков ўз вақтида тормоз босиб ёки бошқа манёврлар билан юзага келган хавфни олдини олиш имкониятига эга бўлган бўлса жавобгар бўлади, агарда бундай имкониятга эга бўлмаган бўлса жавобгар бўлмайди.
О.Назарбековнинг жавобгарлик масаласи жабрланувчига етказилган тан жароҳатидан келиб чиқиб белгиланади. Яъни, агар О.Назарбеков ЙТҲда айбдор бўлса ва велосипед хайдовчиси енгил тан жарохати олган бўлса маъмурий жавобгарлик тўғрисидаги кодекснинг 133-моддаси билан, агарда ўртача оғир ёки оғир тан жароҳати олган бўлса жиноят кодексининг 266-моддаси
1-қисми билан жавобгар бўлиши мумкин. (тан жарохатларининг турлари ва автоавария учун жавобгарлик турлари ҳақида юқорида тўхталиб ўтганмиз)
Тўғри, бу ерда велосипед хайдовчисининг ҳам айби йўқ эмас, у белгиланмаган жойдан йўлни кесиб ўтаяпти. Лекин йўл ҳаракати қоидаларининг 77-бандида “Ҳайдовчи ҳаракатланишнинг серқатновлигини, транспорт воситасининг ва юкнинг хусусияти ҳамда ҳолатини, йўл ва об-ҳаво шароитини, шунингдек, ҳаракатланиш йўналишидаги кўринишни ҳисобга олиб транспорт воситасини белгиланган тезликдан оширмаган ҳолда хавфсизликни таъминловчи тезлик билан бошқариши керак.
Тезлик ҳайдовчига йўл ҳаракати қоидалари талабларини бажариш учун транспорт воситасининг ҳаракатланишини доимий назорат қилиб бориш имкониятини бериши керак.
Ҳайдовчи транспорт воситасини бошқариш пайтида аниқлай олиши мумкин бўлган хавф юзага келса, у транспорт воситасининг тезлигини тўлиқ тўхташни таъминлайдиган даражада камайтириши ёки тўсиқни бошқа ҳаракат қатнашчилари учун хавф туғдирмаган ҳолда айланиб ўтиш чораларини кўриши керак.”, - деб кўрсатиб ўтилган.
Кўпгина ҳориж мамлакатларидан фарқли равишда, бизда, агарда автоарияда пиёданинг ҳам айби бўлсада, бироқ хайдовчи ЙТҲнинг олдини олиш имкониятига эга бўлиб, уни олдини ололмаса, оҳирида хайдовчи айбдор бўлади.
Шу сабабли текширувлар якунида ИИВнинг расмий хабарини кутиб қоламиз, унгача, илтимос, фол очманглар.
Каналга уланиш:
@advocatekulbayev
BY Advokat Xondamir Kulbayev
Share with your friend now:
tgoop.com/advocatekulbayev/88