tgoop.com/ahbbtoka/28915
Last Update:
هاني ولدي زي ماوعدتو أوفيت بوعدي قال حايخش طب وقلت ليهو بجيب ليك العربية وطبعا نجح بامتياز
مرة أمو ساقت عربيتو مشوار وعملت بيها حادث بسيط وباب العربية إتأثر من الصدمة لكن القزاز كويس والباب بفتح وبقفل عادي لكن هاني الحاجة دي عملت ليهو كك في راسو ودي حاجة عادية تأثر الزول بعربيتو بس أنا كنت بحسب الموضوع من ناحيتين (بحثك عن الكمال لحاجاتك واحتمالات فقدانك ليها بالكلية) تحت إصرار هاني وعنادو وديت العربية صلحتها وفكرت لو جارت الأيام وهاني فقد عربيتو البحصل شنو
اثناء مابفكر في الموضوع دا باب البيت دقة ومشيت لقيت دا التجاني غفير المدرسة وخش معاي في الموضوع باعتباري رئيس مجلس الاباء وهو غفير مقيم في المدرسة وقال إنو عندو ولد أخو ممتاااااز حا يجي يقيم معاهو وبما إنو انا بمثل مجلس الاباء وأنو باب بيت الغفير فاتح علي بيتي ف من الادب انو يستأذن منو .. اكبرت فيهو التصرف دا وشكرتو وقلت ليهو مرحب بيهو وطلبك مقبول
بعد كم يوم ظهر شاب قدر هاني ولدي لكن طويل وجسمو ملان ومربط وشكلو عامة هادي ووديع وعرفت انو اسمو الخير وهو قريب الغفير وجا من البلد ياداب وهو مازول قراية لكنو خريج خلوة وسبب جيتو داير يسترزق وماعندو خبرات غير إنو كان راعي وحطاب ومن حفظة القرآن .. يعني مابديك طريقة تساعدو في وظيفة .. المهم بقى معانا في حلقة التلاوة وبعدها بمرق يداقش في السوق
الخير بقى مهم في الحارة لما زول يكون داير يقطع شجرة أو يحفر حاجة ومرات بغسل العربات المهم اي شغلة قدامو بقشها وهو ماشي
.. قبل الشتاء ولما الناس تبدأ تقطع في الشجر القدام البيوت الخير بكون سوقو حار لانو بجفف الأشجار دي يحولها لي حطب ويربطها بطريقة ظريفة ويمشي يبيعها ومرات بمشي حتات بعيدة جدا يلم الحطب .. يوم وانا مارق متأخر بالعربية لقيتو شايل كتلة كبيرة جدا ولما عبرت جمبو اديتو التحية بالبوري وشاغلتو وهو رغم الوزن الكبير الفوق رأسو وقف وهاظرني وضحك معاي وكان مبسوط بسطة عجيبة وونستو سمحة بس انا قاعد في مقعد العربية وهو شايل فوق رأسو وخجلت منو قلت ليهو نتلاقى بعدين في الجامع .. بعد الحلقة ناديتو على انفراد وطرحت ليهو موضوع انو يحاول يشتري درداقة لانو الاحمال دي ممكن تعمل ليهو مشكلة وسألتو موفر قروش قدر شنو وطلع المبلغ العندو تلاتة وعشرين ألف وختيت عليها سبعة واشتريت الدرداقة جبتها ليهو ووالله السرور الشفتو في وشو ماحصل قابلني بيهو زول ولا حتى هاني ولدي لما اشتريت ليهو العربية وبقى كل مايمرق بالدرداقة وخاتي فيها الكوريك والطورية والناس يشاغلو يقعد يدعي لي بالخير لحدي مايغيب عن الانظار وتبتلعو شوارع الحارة ولانو اصبح شخص حبوب ومشهور وسط الناس بقى في ناس كتار بعرفوني اني الاشتريت درداقة الخير مع انو مساهمتي كانت بسيطة
.
الخير غاب يوم كامل عن الجامع وسالت قريبو الغفير قال لي عندو شوية حمى وفتور وتاني مشيت عليهو عديل لقيتو راقد في عنقريب تحت راكوبة قصيرة والرقراق خاشي بكل إتجاه مع انو الجو سخن .. الخير شافني وحاول يقوم لكن قواه خايرة قعدت جمبو اتونست معاهو شوية ومرقت إتذكرت ناس البيت بكونو لسة نايمين ومشيت الكافتريا الفي بداية الشارع زبطت ليهو عصير مشكل وشوية أكل مش ولا بد كدة وقعدت معاه
تاني يوم مشيت ليهو ومعاي هاني ولدي شلنا شوية فواكه ولقيت الزول عندو اكياس كدة بتاعت زبيب قلت اشيل ليهو كم كيس يتعملن ليهو عصير .. قعدنا معاهو وحسيت بحاجة في جيبي ولما هبشتو لقيت دا الزبيب بدل اختو في الكيس ختيتو في جيب الجلابية .. جمبنا جك موية غسلت شوية منو وناولتو للخير والخير مجاملة لي دخلو في خشمو وقعد يمضغ .. عاينت ليهو وشفتو غمض عيونو وكانو بختبر في الطعم .. ابتسم وعاين لي وسأل ( دا شنو يا الشيخ) قلت ليهو معقول مابتعرفو دا ما زبيب .. ضحك وقال لي أول مرة اضوقو .. ناولتو تاني وبدأ يمضغ براااااحة ويهمهم من الحمى وشفت دمعاتو جرن لحدي ماوصلن المخدة وجيتو قريب قلت ليهو مالك يا الخير قال لي والله يا الشيخ دخلتني خوفة لما أموت ابقى من الناس القالو فيهم اذهبتم طيباتكم في الحياة الدنيا
.
مات بعدها بساعات
دفناهو وفي المقابر كل ما اعاين لي هاني ولدي كل واحد فينا يقبل غادي ومايقدر يمسك دموعو .. الناس متحيرين فينا وماعارفين الدرس الاخير الادانا ليهو ولد صغير كان اسمو الخير ضاق الزبيب قبل مايموت بساعات واحس انو انفق الطيبات كلها في الدنيا واتناول من نصيب الآخرة البِهناك
__ سهل الطيب 💚 💚
BY احببتك💜
Share with your friend now:
tgoop.com/ahbbtoka/28915