tgoop.com/ahgeel/4075
Last Update:
#قصص1وروايات1وحكايات.
*الخفافيش🦇*
بقلم_مال_الشام
الجزء الرابع
مرام : هاد انتتتتتتتتته ؟
ابتسم وما رد
مرام : ليك الدنيه شو صغيرة ... المره الماضيه نسيت تاخود اجرتك
الشوفير : لا ما نسيت اختي بس كنت مستعجل لان مرتي كانت عم تولد ورحت ..
مرام : طيب ليش ما رجعت اخدت اجرتك بعدين ؟
الشوفير : اجاني صبي وقلت رح سامحك فيهن لان وشك خير ... بس ما كملت فرحتي و صاحب البيت قلعنا وهلأ عم دور على بيت لاستأجر .. حواليكي شي بيت ؟
مرام : لا والله ما في حوالي ما بعرف
الشوفير : غريبه كأني امبارح مرقت قدام البناية الي وصلتك عليها وشفت حاطين انو في شقه للأجار !
مرام : شقه للأجار ببنايتنا ؟ مو معقول كلهن بيوت ملك مين بدو يأجر بيتو
الشوفير : ما بعرف سألت وقالو وحده ختيارة سافرت لعند بنتها و بدها تأجر بيتها
مرام : يه معقول !!
صفنت شوي بعدين وصلت على بيت هيفاء ... اعطيتو اجرتو ونزلت وقبل ما سكر الباب
الشوفير : لكن شكلنا رح نصير جيران
ابتسمتلو ابتسامة مجاملة و طلعت لعند هيفاء حكيتلها شو صار معي عند نجاح و عن الشب الي التقيت فيه وحسيت مو كتير مهم موضوع الشوفير لهيك ما حكيت فيه
هيفاء : وهلأ شو بدنا نعمل ؟
مرام : بدنا ننطر وليد ليفهمنا شو الي عم يصير ... هيفاء معقول اختي ما تكون انتحرت !
هيفاء : لك شو هالتخبيص ما تسدئي حكي وليد شكلو جانن .. انتي عم تحكي بجريمة قتل لو في هيك شي كان الشرطة اكتشفت !
مرام : بس انا اختي ما بتنتحر .. ما عم سدء انها انتحرت ..ريهام كانت كتلة من الأمل و الطموح ما رح تزت حالها واحلامها بهي البساطة ما عم سدء
هيفاء : معك حق .. كلنا انصدمنا بالشي الي صار بس افهمي علي حبيبتي .. لو في شي من الي حكاه وليد كان الشرطة عرفت .. ولو بتسمعي كلمتي كان لازم نشتكي للشرطة وما تردي عليه
مرام : والله ما بعرف وقتا خفت كتير .. بس يمكن معك حق
هيفاء : ايمت رح يتصل وليد !
مرام : ما بعرف ليكنا عم نستنا
هيفاء : يا ريت لو رقمو معنا نحنا نتصل عليه
صفنت شوي بعدين حكيت بغباء : لك معي رقمو اصلاً
شكلت حواجبها : عنجد بتحكي ؟
حكيت جبيني وضحكت : ايه والله
هيفاء : مرام بتحكي جد معك رقمو وتاركتينا قاعدين نستنا على اعصابنا ؟
مرام : لك شبك هو ما كان يرد من قبل ف ما خطرلي جرب انا اتصل فيه
هيفاء : اعطيني الموبايل رح تفلجيني
اعطيتها الموبايل : خدي ما رح يرد عليكي اصلاً .. مسجلتو وليد مصر
هيفاء : الله يصبرني بس ..
حطت الموبايل على ادنها وصارت تستنا .. وبعد ثواني تغيرت ملامحها و حكت بسرعه : خدي خدي ردي
رمتلي الجوال واخدت رديت باستغراب : الو هيفاء ؟ قصدي وليد ؟ .. رديت انت ؟
وليد : ما فهمت
مرام : يي اي والله رد .. لك ليش ما رجعت اتصلت مو قلتلي رح تتصل علي؟
وليد : عم فؤاد ما مشي من شغلو بعدو موجود .. حاولت اعرف ازا جابو حدا جديد بس اكيد هو ما مشي من شغلو .. اخد اجازة مرضيه كم يوم ورجع
مرام : اي شو يعني ؟
وليد : انا ارتحت شوي بس شاغل بالي سرقة بيتك .. الي فات لعندك ما سرق شي ؟
مرام : بصراحة انا ما لحقت اتفقد لان كنت خايفه كتير ولهلأ ما فتت عالبيت.. وانت ما خليتني روح على الشرطة ليمسكو الحرامي
وليد : طيب كيفو محمد ؟
مرام : منيح كتير .. خالتو ام هيفاء عم تدير بالها عليه كل الوقت وهلأ هو نايم
وليد : طيب خدي حدا وروحي تفقدي بيتك وخبريني شو رايح منو بالضبط لاعرف طمنك او قلك تنفدي بريشك
مرام : هه ! انفد بريشي ؟ قصدك جن متلك ؟
وليد : _ _ _
مرام : ألو .. ألو انت معي؟
وليد : معك ..
تطلعت بهيفاء واخدت نفس طويل : وليد انت عنجد منيح ؟ متأكد انو ما فيك شي ؟
وليد : اي منيح انا
مرام : لكن ليش عم تحكي حكي فايت ببعضو ومو مفهوم .. وليش عم تقول انو ريهام ما انتحرت
وليد : انا ..أنا ما بعرف سدئيني ما بعرف ... أحساس قوي بقلي انو ريهام ما انتحرت .. وفي شغلات ما بقدر خبرك ياهن بس انتي حاولي انتي تكتشفي الحقيقه
مرام : ازا انت عندك شي يساعدني ليش ما تجي و نتاكد سوا !! هي مرتك وام ابنك
وليد : مرام انا واحد جبان ...انا ما بدي غامر واخسر حياتي وما رح ارجع على البلد لاتاكد انو ما في خطر علي .. انتي بتقدري تعملي الي بدك ياه بحياتك بس انا لسه بدي عيش حياتي ومو حابب موت
مرام : وليد
وليد : اي ؟
مرام : اختي كتير كانت تحبك .. كانت متعلقه فيك لدرجة الإدمان .. انا كنت غار منك لان حسها بتحبك اكتر مني ودايماً احكي عليك وقلها انك ما بتستاهل .. بتعرف شو كانت تقلي ؟
وليد : _ _
مرام : كانت تقلي نحنا ما منحب الي بيستاهل .. ما منحب الي بيقدر يعطيني مقابل لمشاعرنا .. الحب هدية بدون مقابل بيعطيها الإنسان بملئ إرادتو ... و وليد شريك حياتي الي اخترتو و هو نقطة ضعفي الوحيده
وليد يبكي : اختك كزابة ... عنادها كان اكبر من حبها .. مع أني نصحتها كتير .. بس ما سمعت كلامي ..
مرام
: نصحتها بشو ؟ .. ريهام شو عملت ؟
BY عالم القصص والروايات 📚
Share with your friend now:
tgoop.com/ahgeel/4075