tgoop.com/ahm9ll/953
Last Update:
عني رحت .. بويه وهدم حيلي الدهر
عني رحت .. شحال اليتيمه وي السهر
ماغمض اعيوني بعد.. والغالي عن عيني ابتعد
عني رحت
****
يابويه اليفارك ابو..جا هو والضحكه شكو
يمهيل ادلال البدو.. بويه بحنانك ضمني
اتلفت بحيره وألم .. بكل حسره دلالي انثلم
يا خيمه كل لحضه بسهم .. كام الهوه يلجمني
كل لحضه تاخذ عام من سنيني
بحسرة يتيمه الكبرك اتوديني
بويه علي .. تدريني اموت بغيتك
بويه علي .. صارت يتيمه بنيتك
اتيتمت واندب مدد .. والغالي عن عيني ابتعد
عني رحت
****
اتوجه عالونه كمت .. من زغري ليش اتيتمت
يابويه حيل اتألمت .. يذبح وداع الخيمه
اخواني بوداعك بجو .. بالدمعه نعشك شيعو
فوك النعش حيل أنحنو .. وزينب تضل ايتيمه
ميت ابوها التفكد الحنيه
من دونه يعني تموت كل ابنيه
ميته صرت.. يالشيعوك وما تجي
ميته صرت .. شاب الضلام من البجي
يابويه دلالي انمرد .. والغالي عن عيني ابتعد
عني رحت
****
ودعتك بسر النضر .. جم خاطر بروحي انكسر
شخلالي يابويه القدر .. بس الالم والونه
شيحضر الباجر جرح..بس لايجي بنبله ورمح
ماميزت ليل وصبح.. محضر نوايب جنه
شمحضر الزينب زماني مصيبه
بكل دمعه طاحت خضرت جم شيبه
ليل الحزن .. مايرحم بجفني الذبل
ليل الحزن .. وشلي دمعي شما نزل
ومايرحم بحالي ابد .. والغالي عن عيني ابتعد
عني رحت
****
من نعشك بجفهم عله .. جني غريبه بكربله
وعالتل دمعتي مسبله .. بيا حاله حالي اليله
نرسمة عله عيوني صور .. جم غالي مكطوع النحر
من الخيمه انضر للنهر .. واليا جرح ابجيله
عباس جنها مكطعات ازنوده
وعيونه من نبلة سهم ممروده
جني شفت .. صورة كفيلي اعللنهر
جني شفت .. بس طايح مكطع وذر
ديرت نبل فوك جسد .. والغالي عن عيني ابتعد
عني رحت
****
وصورة غريب الوحده .. وهدومه كلها مفرهده
بصدره السهام اموسده .. وينضر للمسنايه
ياخويه اخر جلمته .. والحافر اشكد لجمته
للشاطي حاول كومته .. هلبت ترف الرايه
هلبت ترف الرايه بيد اعضيده
بس الشمر ياويلي حز اوريده
شفت الشمر ..لحسيني جرد خنجره
شفت الشمر .. حز نحر اخوي وطبره
وتربع بصدره وكعد .. والغالي عن عيني ابتعد
عني رحت
****
تمت
احمد الخفاجي
BY الشاعر أحمد الخفاجي
Share with your friend now:
tgoop.com/ahm9ll/953