قصيدة في استشهاد نبي الرحمة المصطفى محمد صلّى الله عليه وآله وسلّم  ،،،، لسان حال أمير المؤمنين عليه السلام .
ـــــــــــــــــــــــــــــــــــــــــــــــــــــــــــــــ

مُحمد  يا  نَبينَه 
الحِزِن خَيّم عَلَينَه
الهَجُر ما خَلّه بِينَه
الوداع
الوداع

ـــــــــــــــــــــــــــــــــــــــــــــــــــــــــــــــ

كِسَر ظَهرِي  رَحِيلَك 
يَمَن  عايِف  خَلِيلَك 
رِحِت عَنّي وعِفِتني ٱمنِ الحِزِن دَلّالي ذاَيِب 

وَداعاً  يا  حبيبي 
عَليك ايظَل نَحيبي 
عُگُب وَجهَك يَبو الزهرة  تِوَلّتني المُصايِب 

رَسِم وَجهَك يَغالِي
يِظَل  دومِ  علَبالي
چِنِت نورِ اللّيالي 

الوداع 
الوداع 

ـــــــــــــــــــــــــــــــــــــــــــــــــــــــــــــــ

يَبو القاسم  أخِبرَك 
عَنِ الأمّة التّغِدرَك 
مِشَت بِيهَة المطامِع وِنتِهَت تَحتِ السقيفة 

صُبَح هَمهَه الأساسي
تَقاسُم  للكرَاسِي 
وتَنافُس عالمناصِب والسّرائر مو نَظيفَة

ولا  تِملِك  نَزاهَة
طَمَع أسوَد عِماهَة 
إرتِفَع روحي نِداهَه

الوداع 
الوداع 

ـــــــــــــــــــــــــــــــــــــــــــــــــــــــــــــــ

يَمَن  غِسلَك  دُموعِي 
الكَفَن أصبح ضُلوعي 
دِفَنتَك وِدفَنِت يالمصطفى بلِحدَك دِليلي 

يِهِل  دَمعِي  بغَزارَة 
الگلُب مِشتَعلَة  نارَه
يَطه بفَرگتَك ظلمة اصبحت كِلّ الليالي 

چِنت ذُخري وعِمادي 
وطَمأنينة  فؤادي 
عليك أعلِن حِدادي 

الوداع 
الوداع 

ـــــــــــــــــــــــــــــــــــــــــــــــــــــــــــــــ

أصِد حالِ الزچية
أيا خَير البَرِيّة 
يخويَه وبالألم تِنزِل على اترابَك تِشِمّه 

دَمِعهَه  بدَم  تِهِملَه
الهَجُر لا ما تِحِملَه
تِوِن وَنّ اليتامى ولِلكبُر تِگعد تِكَلمَه 

السهَر ذَبّل  جِفِنهَه
الصّخَر وَنّ علَوَنهَه 
بهَضُم زادت مِحَنهَه

الوداع 
الوداع 

ـــــــــــــــــــــــــــــــــــــــــــــــــــــــــــــــ

بُقَت عگبك  تِعاني 
ولا هِجعَت  ثَوانِي
يَطه وأمّتَك مِنّ البَچي ٱعليك ٱمنَعوهَه 

عَلىٰ بابِ الوِديعَة 
تِشِب نارِ الفِجيعَة
يبو الزهرة على الزهرة بحِقِد بابي ٱدفَعوهَه 

يَبو القاسم  بَلِيّة 
ٱنكِسَر ضِلعِ الزچية 
بهجوم الناصبية 

الوداع 
الوداع 

ـــــــــــــــــــــــــــــــــــــــــــــــــــــــــــــــ

صَعُب طَه غِيابَه 
إذا  أمُرّ علَبابَه
ٱنهِدَم  ساتِرِ جُفونِي  بِالدموعِ  الهاشِميّة 
 
الفَلَك ظَل وَجهَه عابِس
بِچَت  عَينِ  النوارِس 
وبِچَه البَحر أويَ  خِلجانَه عَلَى خَيرِ البَرِيّة 

الوَحِي  نِسمَع  أنِينَه 
الحِزِن  عَمّ  المَدينَة 
على روحَه الأمينة 

الوداع 
الوداع 

ـــــــــــــــــــــــــــــــــــــــــــــــــــــــــــــــ

بقلم الأستاذ  / ستار عذاب الحچامي

قصيدة في شهادة الرسول المصطفى الأكرم صلى الله عليه وآله وسلّم ،،،،
ـــــــــــــــــــــــــــــــــــــــــــــــــــــــــــــــ


بِالدموعِ الفاطميّة
اللّيلة نِبچي ٱويَالزچّية

ـــــــــــــــــــــــــــــــــــــــــــــــــــــــــــــــ

إنتَه يا نورِ الهِدايَة
نِزلَتِ الرّحمَة بوِجودَك

والشمِس ضَيّك يِمِدهَه
والگُمَر غافي بخُدودَك

تخَضّرِالگاعِ بسَحِكتَك
وتِسجِدِ الشجرَة بسِجودَك

يا أبو الطّلّة البَهِيّة
اللّيلة نِبچي ٱويَالزّچيّة

ـــــــــــــــــــــــــــــــــــــــــــــــــــــــــــــــ

يا حَبيبَ الله ورَسولَه شوفِتَك كِل هَم تِزِيلَه
بِيتَك الكَعبَة الشّريفة وكِل عِبادَ الله تِجيلَه
وتِرتِجي مِنك شفاعَة والذّنوب شگد ثِجيلَة

بِالحَياةِ الأُخرَوِيّة
اللّيلة نِبچي ٱويَالزّچيّة

ـــــــــــــــــــــــــــــــــــــــــــــــــــــــــــــــ

يَالچنِت كَهفِ الأرامِل بگلبَك تعِيشِ اليِتَامَه
غَرّگِ العَالَم حَنانَك والكَرَم شايِل وِسَامَه
ولِلعِلِم إنتَه المَدينَة وِالجَهَل كابِح لِجامَه

وِالصّبُر عِندَك سَجِيّة
اللّيلة نِبچي ٱويَالزّچيّة

ـــــــــــــــــــــــــــــــــــــــــــــــــــــــــــــــ

هَبّت ٱرياحِ الكآبة
ولَاحَت اغيومِ المُصيبَة

والزّبورِأعلَن حِدَادَه
وموسَى مِتواصِل نَحِيبَه

والصُّحُف تِبچي ٱويَعيسَى
ومَريَم العَذرة النّجِيبَة

وكِل نَبِي بهَاي المِسِيّة
اللّيلة نِبچي ٱويَالزّچيّة

ـــــــــــــــــــــــــــــــــــــــــــــــــــــــــــــــ

بغَيبتَك فاطِم حَزينَة تنَادي وَينَك يا مُحمّد
والدّمِع جَرّح جِفِنهَه وبَيتِ الٱحزان الهَه يِشهَد
تُخبُطِ الزّادِ ابدَمِعهَه ولا نَعِيهَه بلَحظة هَوّد

بكِل صُباحِ ومَغرِبيّة
اللّيلة نِبچي ٱويَالزّچيّة

ـــــــــــــــــــــــــــــــــــــــــــــــــــــــــــــــ

يا مُحمّد هذا حَيدَر گابِعِ بحِزنَه وحَسُرتَه
بروحِتَك عَنّه تِيَتّم يَالنّبِي ورَيتَك نِظَرتَه
والصّخَرنَاح لوِنِينَه وبِالدّمَه يِذرِف عَبُرتَه

يِنعَى بِالوَنّة الشَجِيّة
اللّيلة نِبچي ٱويَالزّچيّة

ـــــــــــــــــــــــــــــــــــــــــــــــــــــــــــــــ

امّدّد وكِلهَه تِعوفَك بَس عَلِي شَالِ الجَنازَة
غَسّلَك وِدموعَه نادَت عَازِتَك يا خويَه عَازَة
أمّتَك نِكرَت وَصِيتَك ولِلحُكُم رَادَت حِيازَة

مَا رَعَوا ذِيچِ الوَصِيّة
اللّيلة نِبچي ٱويَالزّچيّة

ـــــــــــــــــــــــــــــــــــــــــــــــــــــــــــــــ

كِل سَنَة ٱمصابَك يِجِينَه يا أبا القاسم يَغالي
نِحيِي ذِكرَاكِ الأليمَة ونِحزَنِ بهَاي الليالي
شمَا گِصَت دِنيانَه بِينَه نِصبِر إحنَه ومَا نِبالي

وِحنَه يا خَيرِ البَرِيّة
اللّيلة نِبچي ٱويَالزّچيّة

ـــــــــــــــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي

قصيدة في شهادة الرسول المصطفى صلّى الله عليه وآله وسلّم ،،،،،
ـــــــــــــــــــــــــــــــــــــــــــــــــــــــــــــــ


الليلة سُكّانِ السمَاء بالعَويلِ و بِالبُكاء
تصِيح لِلّهِ البَقاء المُصطفى رَاح

ـــــــــــــــــــــــــــــــــــــــــــــــــــــــــــــــ

الليلة هَالكون ٱنفِجَع ناحَت نُجومَه
وِالبَحَر مِضطَربَة وِحمَرّت رِسومَه
وِالجِبَل فوگِ السهَل تارِك غُيومَه
والحِزِن أعلَن عَلى الوَادِم هُجومَه

وِالشمِس ضَيهَه ٱنكِسَف
وِالقَمَر نورَه ٱنخِسَف
الكعبَة صَاحَت يا وِسَف
المصطفى رَاح

ـــــــــــــــــــــــــــــــــــــــــــــــــــــــــــــــ

طُور سَيناء الخَبَر أشعَل لَهِيبَه
الصُحُف وِالتّورَاة نَاحَن لِلمُصيبَة
وِالزّبورِ اليِنسِمِع وَنّه ونَحِيبَه
وعِيسَى بِالإنجيل ظَل يِندِب حَبيبَه

الليلة آياتِ الكِتاب
تِبچي دَم مِن هَالمُصاب
حَانَ آذانُ الغِياب
المصطفى رَاح

ـــــــــــــــــــــــــــــــــــــــــــــــــــــــــــــــ

طَه چانَت شَوفِتَه لِلأمّة نِعمَة
وِبدُعاءِ الهادي تِنزِل إلهَة رَحمة
إيطِگ وَرد بالگاع مِن يِسحَگهه جِدمَه
والحَجَر رَدّ السلامِ ويِنطِق ٱسمَه

بدَعوِتَه ٱنشَقّ القَمَر
بضَربَة إيدَه طَگ نَهَر
وِنحِنَى لَجلَه الشّجَر
المصطفى رَاح

ـــــــــــــــــــــــــــــــــــــــــــــــــــــــــــــــ

والعَدو بفَضلَه ٱعتِرَف طَه وشَهَدلَه
ورَأفِتَه وعَطفَه وحَنَانَه اليِحچي عَدلَه
شگد عَظيمة أخلاقَه تِعجَز يَالتّعِدلَه
ما يِرِد خايِب أبَد واحِد گِصَدلَه

كامِل ولَله الكمال
فارِسِ بسوحِ القِتال
صَدّعِ ٱمصابَه الجِبال
المصطفى رَاح

ـــــــــــــــــــــــــــــــــــــــــــــــــــــــــــــــ

رَاحِ أبوالزهرة وتِرَك فاطِم تِعانِي
ما تِفارِگ ناظِرَه چانَت ثَوانِي
طَه قُرآن وإهِي السّبعِ المَثانِي
إتشوفَه لو حَتّى بحِلِم ظَلّت تِتَانِي

تنادِي وِالمَدمَع جَرَه
عُگبَك آنَه ٱمحَيّرَه
گلبِي صَاح بمَجمَرَه
المصطفى رَاح

ـــــــــــــــــــــــــــــــــــــــــــــــــــــــــــــــ

وأُبوحسين الصّارعُگبَه ٱويَ اليِتَامَه
فرَاگه جَمرة وتِسعَر ليومِ القِيامَة
لِيلِ المفَارَگ بِدَه وخَيّم ظَلامَه
وأعلِنَت أُمتَه ٱنقلابِ علَلإمامَة

حَيدَرَة فَحلِ الفُحول
مگابِل الزّهرة البتول
بدَمعَة وَحدَة علَلرسول
المصطفى رَاح

ـــــــــــــــــــــــــــــــــــــــــــــــــــــــــــــــ

وِالدّمِع عَالهادي ما يِنشَف مَسيلَه
غَير طَه وأهلَه ما نِملِك وَسِيلَة
يَمتَى نِگصِد لِلمَدينَة ونِعتِنِيلَه
ونِمشِي مَشّايَة بمَواكِبنه الجَلِيلَة

ونِعقِد بطَيبَة العَزاء
ونُرفَع بصَحنَه اللّواء
نِنطِلِق مِن كربلاء
المصطفى رَاح

ـــــــــــــــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي

نعي في شهادة الرسول الأكرم صلّى الله عليه وآله وسلّم ،،،، لسان حال الزهراء عليها السلام .
ـــــــــــــــــــــــــــــــــــــــــــــــــــــــــــــــ

يبويه الدار ما تنطب بَليّاك
إذا رايد تروح انروح ويّاك
حال الضيم حالي اليوم بَعداك
أهِلّ ادموع عالوجنات مِن دَم

رِحِت عَنّي وعِفِت بِنتَك يَتيمَة
يبو القاسم يبو النفس الرحيمة
چِنِت إلهَه ولَبو الحسنين خَيمة
عگب عيناك كِلّ الضيم يِلتَم

أروح اوياك يالوالد تِمَنّيت
وتشوف الصار يالمختار ياريت
وتشوف شلون مِن هِجموا على البيت
سِطَر عَيني وعَلَيّه الكون عَتّم

يبويه اخلاف عينك شَبوا النار
وبَعَدهه اتحوم روحك داخل الدار
تِمادَت أمّتَك بالشّر يَمُختار
ولا واحد حِشَمني وچان مِهتَم

تعال وشوف ضلعي شلون مكسور
وصِدَر منهم كِلّ الچان مَحذور
على الصبر الجميل اليوم مگدور
لَچن فرگاك خَلّه الكون أظلم .

ــــــــــــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي

قصيدة في شهادة الرسول المصطفى محمد صلى الله عليه وآله وسلّم …. مِن قصائد المُلَمّع
ـــــــــــــــــــــــــــــــــــــــــــــــــــــــــــــــ

تَنـــــعاكَ الـــنُورُ وطــهٰ
والشمسُ ينوحُ ضُحاها

لَيــــلُ رَحيــلِكَ يَغشاها
لَيــــلُ رَحيــلِكَ يَغشاها

ـــــــــــــــــــــــــــــــــــــــــــــــــــــــــــــــ

هالليلة أملاك السّمَه
تِذرِف دَمع محزونة

أوّلها جبريل الوَحي
تِهمل مرارة ٱعيونه

وبطيحِتَك شاع الخَبر
والكـون ٱتغيّر لونَه

طه النبي اليوم ٱرتَحَل
والعــايلة ٱيوَدعـونه

موسـىٰ يبكيكَ ونُوحُ
عِيسىٰ بالحُزنِ ينـوحُ

والأرضُ عليكَ شَجاهـا
لَيـــلُ رَحيــلِك يغشاها

ـــــــــــــــــــــــــــــــــــــــــــــــــــــــــــــــ

هالليلة مهضوم الوصي
وهِجمَت عليه أحزانَه

مِتصَبُّر بهالفاجعة
بتَسليمَه وبإيمانَه

رَاح الأخو الچان السّنَد
ومَحّد يِسِدّ ٱمچانَه

عالمصطفى ٱيهِل مَدمَعَه
وَي فاطمة الحيرانَة

نادى والدّمــعُ غَزيرُ
قلبي لِلــحُزنِ أسيرُ

والحَمدُ عليك تَلاها
لَيلُ رَحيلِك يَغشاها

ـــــــــــــــــــــــــــــــــــــــــــــــــــــــــــــــ

هالليلـة فاطم نادبة
وساتِر جِفِنها ٱتهَدّم

تصيح بهضُم يا والدي
كِل عمري راح أتألّم

روحي العَليك ٱمعَوّدة
ومِن عگبك آنه أتيَـتّم

مو بَس دَمِع عيني تِصُب
من فرگتك تهمِل دَم

تَبكيكَ مَعي الحُجُراتُ
وبأحشائي الزّفَــــراتُ

تنعىٰ الزهـراءُ أباها
لَيلُ رَحيلِك يَغشاها

ـــــــــــــــــــــــــــــــــــــــــــــــــــــــــــــــ

يالهادي يا مَن بالفَضِل
عِدوانَك التِشهَدلَك

يالصادق بقول وفِعِل
مَحّـد تِنَـكّر عَدلَك

يالمُصطفى وكِل غانمة
منسوبة لَك وترِدلَك

مالَك شَبيه برَحمتَك
يتشافى كِلمَن صَدلَك

بالحكمةِ بَحرُكَ زاخِر
واللُّـبُّ بِكُنهِكَ حـائِـر

قَدْراً قَد حُزْتَ وجاها
لَيلُ رَحـــيلِك يَغشاها

ـــــــــــــــــــــــــــــــــــــــــــــــــــــــــــــــ

يا أشرَف وأعظَم بَشَر
رَبّ العَرِش يخـتارَه

مِن قابَ قوسين ودَنا
وأصبَح كَهِف أسرارَه

وكِلّ العِباد ٱتعَلّمَت
مِن غِيرِتَه وإيثارَه

بيوم الوَطيس ولَو حِمَه
تلوذ الزّلِم بَكتارَه

يا خَيرَ الناسِ مَقالا
فَــذّاً وبَلَغتَ كمَــالا

والنّفسُ تُقىً أثراها
لَيلُ رَحيلِك يَغشاها

ـــــــــــــــــــــــــــــــــــــــــــــــــــــــــــــــ

لمصابك ٱعيون الفَلَك
تِجري المدامع طوفان

وحَتّى الجماد بطَيحِتَك
ظل ٱيرَدّد بالأحزان

واويلاه ٱعللمصطفى
وتِسمَع وَنينه الأكوان

مشلولة الإيد الغِدرِتَك
لِلهُدى أنهِدمَت أركان

وعليكَ الطّورُ تَصَدّع
ثغــرُكَ لِلسّــمّ تَجَـرّع

والكـعبةُ لاحَ بُـكاها
لَيلُ رَحيلِك يَغشاها

ـــــــــــــــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي

قصيدة في إستشهاد النبي صلى الله عليه وآله وسلم ،، لسان حال الوحي وهو ينعى المصطفى ،،،،

ــــــــــــــــــــــــــــــــــــــــــــــــــــ


بدمعة وحِزِن أبقى أنعاه
يا المصطفى واويلاه

ــــــــــــــــــــــــــــــــــــــــــ

مِن انزَلِت شِفتَك على
فراش المنية ٱمدّد

دمعي انسچب منظر كَلِف
فراگك صَعب محمد

أنعى بحزن وَانَه الوحي
أحضر رحليك وَشهَد

وليل الألم والفاجعة
عالدنيا أصبح سرمد


يا مَن چنت إنتَه اضواه
يا المصطفى واويلاه

ــــــــــــــــــــــــــــــــــــــــــــــــــــــــ

مَوقِف صَار ومِنّه اسألِت
هل هاذي أمة طه

گالوا عليك إنتَه تهَجُر
وأنت الذي نَجّاهه

ولو ما وجودك ياالنبي
الأمة ابتِلَت بلواهه

أمة استحقت قارعة
من ضَلّت بمَسراهه

طعنة ظَهَر يا وسفاه
يا المصطفى واويلاه

ـــــــــــــــــــــــــــــــــــــــــــــــــــــــــــــ

عنك مشوا متفرقين
تحت السقيفة الأصحاب

نِكرَوا وَصِيتك يا حَيف
بأهلِ الكساء الأطياب

رَادَوا وَصيّك مجتوف
للبيعة قسراً ينجاب

وموقفهم من أمّ الحَسَن
عصروهه صَحبك بالباب

وتنادي آ يا طفلاه
يا المصطفى واويلاه

ــــــــــــــــــــــــــــــــــــــــــــــــــــــــــ

بسَيفِ الحِقِد يا المصطفى
صابوا علي بالهامة

والدّم يِخَضّب لِحيِتَه
وضاگ الهَجُر وَالامَه

وزينب تنوح لروحِته
وظلّت تنوح ايتامه

والعَدِل والحق فگدوه
وانفجعت الإمامة


والعِلم ناح لفرگاه
يا المصطفى واويلاه

ــــــــــــــــــــــــــــــــــــــــــــــــ

بإبنه الحَسَن دار الوكت
چبده بسموم تگطع

وحسين اخوه يعاينه
وگلب العقيلة ملوّع

وتصيح زينب يا علي
لِبنَك اريدك تفزع

وَينك يا حمّاي الحِمَى
يا بويه رَيتك ترجع

والحَسَن يلفُظ چبداه
يا المصطفى واويلاه

ـــــــــــــــــــــــــــــــــــــــــــــــــــــــــــ

وبكربله صار امصاب
بسَيّد شباب الجنة

بحَرّ وعِطَش ذِبحَوا هَلَه
والماي انحَرَم مِنّه

ظامي انذبح صدره انهشم
بخيل العِده السحگنه

شال النحر بيده الشمر
بأعظم مصيبة ومِحنه

عالرّمل مَحّد واراه
يا المصطفى واويلاه

ـــــــــــــــــــــــــــــــــــــــــــــــــــــــ

بقلم الأستاذ/ ستار عذاب الحچامي

نزال

قصيدة بلسان حال الزهراء عليها السلام ، تنعى أباها المصطفى صلّى الله عليه وآله وسلّم ...
ـــــــــــــــــــــــــــــــــــــــــــــــــــــــــــ


أويلاه غاب نور المصطفى
أويلاه غاب نور المصطفى

ـــــــــــــــــــــــــــــــــــــــــــــــــــــ


آنه فاطم يابو فاطم
من عفتني بنوحي

للمآسي سلمتني
وللهضم وجروحي

چنت أبويه وچنت اخويه
وأنت توأم روحي

يالچنت لسراري كهفي
ونته مسمع بوحي

لچن آه شوفي منك ما اكتفى
أويلاه غاب نور المصطفى

ــــــــــــــــــــــــــــــــــــــــــــــــــــ

مِن جمالك من وصالك
مِن عَذِب بسماتك

مِن سكونك من هدوءك
مِن درر چلماتك

عيوني ما شبعن يطه
ولوقع خطواتك

بالأمان أشعر عليّة
من تگع نظراتك

عفتني وي جروحي النازفة
أويلاه غاب نور المصطفى

ـــــــــــــــــــــــــــــــــــــــــــــــــ

من چنت يا بويه تدخل
وبحنانك داري

أشعر بخير وسعادة
يا كهف أسراري

تمشي جدامك رحمتك
يا جلال الباري

كون اشوفن وجهك آنه
ليلي ويه انهاري

حياتي عگبك اعليها العفى
أويلاه غاب نور المصطفى

ــــــــــــــــــــــــــــــــــــــــــــــــــــــ


غادرتني بويه وَدري
عگبك يظلموني

أمّتَك نكروا وصيتك
بويه ما حشموني

جاروا عليّة بفعلهم
وبالضلع صابوني

شِعلَوا النار علبابي
ومِن فدك حرموني

يتيمة دمعي بالدم اذرفه
أويلاه غاب نور المصطفى

ـــــــــــــــــــــــــــــــــــــــــــــــــــــ


تدري بعدك آنه تالي
يالنبي محزونة

مِن شفت جور السقيفة
وحيدر يظلمونه

صُبّت ٱعليّة المصايب
وبابك يحرگونه

بيت مهبط للملائك
قسراً ايدخلونه

جنيني غدر أُمتَك يخطفه
أويلاه غاب نور المصطفى

ــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي

للصحن جينه. نواسي مهدينه
العسكري بيده. ايسجل اسامينه
*******
الخدمه نوعيه بيها روحيه ابدار الامام
نرفع الرايه واحنه وفايه بهذا المقام

اليوم كردوس الخدم رافع شعاره
والتحيه تختلف جوه المناره
عالامام نسلم ونقره الزياره

نقترب منه وهوه يقبلنه
بالصحن نشتم ريحت الجنه
*******
كل ايادينه بيد مهدينه نبع الحنان
سيد النعمه وعطره نشتمه بهذا المكان

من نطب سامره ياخذنه العشك وين
وشحلات الهوه يم العسكريين
ما يرد خالي اليدك باب الامامين

اشمحله سامره الناضر تسره
وحلف المهدي خادم الحضره
******




كل سنه نعاهد حضرت القائد ونحي العزاء
بالصحن نصطف وخدم نتشرف الراعي العطاء

الرايه هاي المنتظر يشرف عليها
يعني عطر العسكري موجود بيها
بعلي الهادي ونرجس احنه مزوريها

تبقه رايتنه رمز خدمتنه
بدار ابو صالح تعله صيحتنه
******
كل سنه وكل عام تلتم الخدام بوسط الرواق
وللضريح نصد ولحضه من نبعد نموت اشتياق

ونرجع نطوف الكبر ويزيد حبنه
بالامام المهدي متعلك كلبنه
يمته يوم الثار يالغايب ندبنه

دوم ندعيله وكلشي نحجيله
صاحب المرقد ويانه كل ليله
******







الارض سامره تحضر الزهره والهم تنوح
تنصب الماتم والدمع من دم وتبدي الجروح

تعتني يم الامامين الحزينه
اتنادي يبني توني اجيت امن المدينه
تصيح ليش اوليدي جبده مسممينه

عالولد تنعه وتذرف الدمعه
وتدري بالمهدي منكسر ضلعه
*****
تمت
تحسين الخفاجي

على الحسن ويلي وويلاه
......
يالناعي انعى بعالي الصوت
شد الرحال السفرت الموت
اشلون العظيم ايضمه تابوت
يونس بجاله من بطن حوت

بكسرت الخاطر صار ينعاه
.....
مات بغدر سم اليكرهون
واعليه جرت دمعات العيون
اظلم صبح من بعد هالكون
والعرش ناح اويه الينوحون

عظمه المصيبه يلي تهواه
.....
هالساعه روح المهدي ياناس
متوجرة ابنيران الارجاس
ازغير بعدة وشيب الراس
بفراك ابو ما ظلت انفاس

جم لوعه عاش بسبب فركاه
......
وين اليواسي بدمعت العين
قائم محمد ناصر الدين
ذايب دليله من الونين
ما شاف راحه بهاي السنين

سهم اليتم من زغرة صاباه
......
يم النعش متمدد يصيح
ساعه يكوم وساعها يطيح
اشبه بسعفه وتاخذا الريح
فاكد الحيل ودمعته تسيح

من البواجي انعمت عيناه

.......
شيع المهدي والدة اليوم
مو بالمدامع لا بالدموم
عظمه المصيبه حكه مالوم
بيه انزرع كل حزن معصوم

الله يعينه العظم بلواه
.....

للمهدي نرفع تعزيتنه
بلطمت صدرنه الشرفتنه
تحت امره نوضع تضحيتنه
ما نخلف اويا قافلتنه

لخر نفس باقين وياه
......
الحمدالله رب العالمين
اللهم صل على محمد وال محمد
موسى الخادم

أبو ذيات في شهادة الإمام العسكري عليه السلام .
ـــــــــــــــــــــــــــــــــــــــــــــــــــــــــــــــ


تِحِضرَك فاطِمة الزهرة لَوَنهَه
تُوِن وِجــبَال تِتفَطّر لَوَنهَه
تِــشاهِد حَالَك ٱتغَيّر لَوَنهَه
يِگطّع چَبدِتَك سِمّ المِنيّة

ـــــــــــــــــــــــــــــــــــــــــــــــــــــــــــــــ

شتِريدِ الدنيا مِن عِندك وَشِلهَه
سِمهَه ٱحشَاك گطّعهَه وَشَلهَه
وخَلّص حَتّى مِن عَيني وَشِلهَه
وبُقَت بَس بالدّمه ٱعيوني جِرِيّة

ـــــــــــــــــــــــــــــــــــــــــــــــــــــــــــــــ

إلَك ما أبخَل بحَــسرَة وَجِرهَا
مُصابَك جَمرَةِ ضلوعي وَجَرهَا
عَليك الدمعة مَذروفة وَجِرهَا
ٱنكتَب باللّوح يَم رَبّ البَرِيّة

ـــــــــــــــــــــــــــــــــــــــــــــــــــــــــــــــ

**

هوسات في شهادة الإمام العسكري عليه السلام.
ـــــــــــــــــــــــــــــــــــــــــــــــــــــــــــــــ

وَسفة ٱبن النجابة والشرف ظلموه
ما رَاعَــوا گرابة جَدّه وحِـشموه
سَليل الدّين أهـــل الجور سَمّوه

مصدوع الدِين وأركانَه

ـــــــــــــــــــــــــــــــــــــــــــــــــــــــــــــــ

وعلى امصابه الملائك تِهمِل العَبرَة
وَبو صـــالِح دِلِيله يِلهَب بجَمرة
ضَـــــجّت بالألم والدمعة سَامَرّا

ولِبسَت ثوب اسود حَزنانة

ـــــــــــــــــــــــــــــــــــــــــــــــــــــــــــــــ

إبن حَيدر علي باب العِلِم مظلوم
ودَارَه مظلمة وبالوَنّة هذا اليوم
طايِح يا وسافة والچبِد مسموم

وظَل خالِي وموحِش دِيوانَه .

ـــــــــــــــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي