tgoop.com/ahmedalbasrawi/1582
Last Update:
منهاج محرم الحرام لعام 1446 هـ
شهيـد وماكو حاجه اتغسله بمـاي
بس الرمـل غـطه اجـروحه الهواي
مسحت الرمل عـنه
لـو بـي صــار دفـنه
عمه عمه
شفت حسين.. شوف العين.. اگعد عنه سولفلي
كِله الگـيت.. لو لمـيـت.. جسمه مـن الرمل گلي
اذكــره امـحــاوطـيـنه... وحجـر صـوب جبـيـنه
وجزء من عنده وادماه... شفت طاح اعله عينه
وسـهم يا عمـه شـفـته... طــاح بـوسـط شـفـته
هـذن بـالـراس والـراس... ويـــاه مــــا دفـنـتـه
چـا جسمه يعمه شبـاوعت بيه
ومرتين الحوافر سحگت عليه
أَخـــذَن وذَر مـنـه
لـو بـي صـار دفنه
عمه عمه
ــــــــــــــــــــــ١ـــــــــــــــــــــــ
العـسكر چـان..عالعطـشان..بكل جارح يِصـوبونه
سهام ونار..ارماح احجار..وحتى سيوف يرمونه
والامـثـلـث بـصـدره... اموتـن مـن اذكـره
ظهـره الچـان عباس... سهم متعدي ظهره
وراسه السيف لاحه...و رَد لـيـنـه بجراحه
ونطيته ضماد بس آه...مـوتتـنـي النياحه
تعـده الخوذه ذاك السيـف للراس
واحس الألم بي وي جر الانفاس
وتخيل گلبي حزنه
لـو بـي صـار دفـنه
عمه عمه
ــــــــــــــــــــــ٢ـــــــــــــــــــــــ
شفـت ازلام.. ترمـي سهام.. غيمه ونزلن بجسمه
بنحره تطيح..بصدره الطيح...وناگع أصبح بدمه
وگع من مهره وحده... والطيحه اعله خده
وجسمه سهام متروس... وسهامه التسنده
وگعد بالدم تخضب... بسهم النحر يسحب
وجر السهـم وارماح... بالخـاصـره اتصـوب
وتِوذِر بي اشوف سيوف وارماح
دِفَنته شلـون عمـه بذيچ الجراح
بسِـهـامـه الألـمـنـه
لـو بـي صـار دفنه
عمه عمه
ــــــــــــــــــــــ٣ـــــــــــــــــــــــ
من مگفاه.. واويلاه.. بنحره الشمر ظل يطبر
ويضـحـكون.. ويصيـحـون..كَـثر بالطبر كَـثر
وراسـه الشـمـر شـاله...واتـبـاوع عِـيـاله
والعــبــاس مـذبــوح...لـكـن دم بـچــاله
وبعد احداث صعبه... بدت خيل التگلبَه
وكثر ما داست اعله...وصل حافـر لگلبه
وعليـل انت يا عمه وما إلك حيل
شكثر لميت ابوك الطشرته الخيل
وخنـصر ماكو شفنه
لــو بـي صــار دفـنه
عمه عمه
ــــــــــــــــــــــ٤ـــــــــــــــــــــــ
للكفال.. شنهي الحال..شحـالـك عمـه بِچـفوفه
عم هواي.. وبعد هواي..مشتاگه وعلي لشوفه
يمتى لكربلـه انرد... اريد بصفهـم اگـعد
بـلكـي بشـم التراب...شويه لگلبي ابَـرِّد
جـاوب يالعـقـيـلـه...رحـلـتـنـه طـويـله
بعـد يا عمـه بالشام... الدمـوع الثگيله
بسناسلنه ونطب ليزيد ديوان
بس ندخـل مثـل هيبة القران
وعـمــه الراي إلـنه
لـو بـي صـار دفنه
عمه عمه
ــــــــــــــــــــــ٥ـــــــــــــــــــــــ
نسألكم الدعاء والفاتحة لوالديَّ
أحمد البصراوي العبادي
BY الشاعر أحمد البصراوي العبادي
Share with your friend now:
tgoop.com/ahmedalbasrawi/1582