tgoop.com/ahmedalbasrawi/1587
Last Update:
للإمام الحسن المجتبى (عليه السلام)
مشاي
من كـربله ماشي حسين
و امغرِّگه ادمـوعه العين...گاصد للحسن
ولن جاي
گاصد إله الحسـن يزور
ولوعة صفر وي عاشور...بالـدرب التقن
بسبعة صفر...چبد ونحر...الهاضمهم ضعن
خطـوه خطـوه..وممـشه گـوه..كـثـر مـا بـيـهـم ألـم
الحسن چبده..حسين عنده..مدري چم رمح وسهم
على الشوگ انتچو لكن...الشوگ المُتعب ايعذبه
وهو الشوگ طبـع البيه...حـتـى السـالـم ايتعـبه
واليمشي بچـبد ممـرود...خطـواته شكثر صعبه
وبـمـمشـاه يِهِـم حـسـين...بـس امـثـلـث بگـلبه
وايطيح
ومـره إلـه اتهـل ادموع
ومره إله اتطيح ضلوع...من ذاك السحگ
وايصيح
مشتاگ إله شگد مشتاگ
مـا ينحـمـل بـعـد فـراگ...طوله الينعشگ
ريته حضر...چبد ونحر...الهاضمهم ضعن
ـــــــــــــــــــــــــ١ــــــــــــــــــــــــ
بچبده ثلمه..شگد يألمه..ويمشي يبچي اعله النحر
ولــرقــيــه..خَـــذَه امـيّـه..مِــن البــيــر ومــو نـهـر
خـاف مـن النـهـر يـاخــذ...وتگـلـه كـل نـهـر عـايل
النهر من عنده ما أشرب...چي خَسَرّني ابو فاضل
چـنـت امدلـلــه بـجــالـه...لـكــن مـا بـقـى الكـافل
وصح گطعوله عمي چفوف...لكـن من وگع كامل
وچفوف
راوونه مــــن الـعــبــاس
واصعب بعد جرح الراس...من صار برمح
والخـوف
إي حگنه ونخاف هواي
لا والــــــــد لا وفــــــاي...راحو بالذبح
وكلشي قهر...چبد ونحر...الهاضمهم ضعن
ـــــــــــــــــــــــــ٢ـــــــــــــــــــــــــ
ايألمه نحره..ايألمه صدره..ويمشي يبچي إعله الچبد
اتـمـنـه جـاسـم..كونـه سـالــم..ولـلحـســن ويّـاه يـرد
اشحلاة القاسم ايگلك...اجالـك يالحسن هسه
وكُبَر مثل الگمر طالع...وسالـم جبته ومعرسه
بالطـف لـكـن الوادم...على البي ريحتك تقسه
ظـالم ظـالم بجسمه...سيـفه بحقـده ويغرسه
اتعنيت
لِيـِه اركـضـت بـس مذبـوح
وكل جسمه ياخويه جروح...اودعني ورحل
وابچيت
خويه بكثر دمعي عليك
وارثيـته سـاعه وارثيك...مـن حـان الأجـل
وعنده أثر...چبد ونحر...الهاضمهم ضعن
ـــــــــــــــــــــــــ٣ـــــــــــــــــــــــــ
بلحظه وگفو.. بلحظه ركضو..شاهدو لنهم بعض
مو حـچـيـهـم..مو بـچـيـهـم..ينسمع صار النَبَض
حضنو واحـد الثـاني...حضنة فـاطـمة لمحسن
وسمعو صوت بس چنه..معـشـوگ الهـم امبيّن
لنه الكافل من الطف..اجه بگدما لاخوته ايحن
ونـزل كل الحـمام هناك...حضـره ويمـهم مأمن
وهناك
گـعدو بالدموع اردود
إلهم بعد شي مفـگـود...زينب ما اجت
وياك
مـاهـي يكـافـل لايتام
ونگصد اتلاثتنه الشام...وندري اتعَذبت
بحزنه گمر...چبد ونحر...الهاضمهم ضعن
ـــــــــــــــــــــــــ٤ـــــــــــــــــــــــــ
إلها راحو..ويمها طاحو...مـثل طيحتـها بسبي
ها يزينب..وهي تنحب...لسه من سوط اجنبي
وگـالت ها يإخواني...طـلب من عدكم اتأمل
اريـد لكربـله اتـعنـه...بهودج مـو على الهِزّل
الدرب كثر المواكب ذيچ...گالو صاير امهيل
ما بي لا شمر لا سوط...اليخدم بس المعدل
وانروح
هناك ونحيي الزوار
وانسجل ازغار كبار...أنصار العدل
مجروح
مـا زاير النه انخليه
وبچَفنه إلا انداويه...ضداً بالحبل
ونبقى فخر...چبد ونحر...الهاضمهم ضعن
ـــــــــــــــــــــــــ٥ـــــــــــــــــــــــــ
نسألكم الدعاء والفاتحة لوالديَّ
أحمد البصراوي العبادي
BY الشاعر أحمد البصراوي العبادي
Share with your friend now:
tgoop.com/ahmedalbasrawi/1587