tgoop.com/akeelalankoshi/7802
Last Update:
السيدة الرباب تخاطب وتوصي الشمس خوفا منها على عبدالله الرضيع في صباح الرحيل عن كربلاء
———-
بهيده يخيوط الشمس
نام عبد الله من امس
ابني من كد الترافه جنه ماي
لاتبخرينه غصب عفته وراي
يكعد بصوت الهمس
بهيده يخيوط الشمس
....... .......
ياشمس زودي عله راسي ولاتأذينه تره
بشوغت الام الحزينه اشتكيج لحيدره
يالي ماشابع مناغه وينك وين الثره
تموت من تفكد ضناها والله يايمه المره
ياسهر عمري وتعب ذيچ السنين
منين ماشمه اشم عطر الحسين
بيه متعلگه النفس
بهيده يخيوط الشمس
————
ياشمس عبد الله هذا طفل ظل بلا نعش
حافظه جروح البجسمه كلهن لحد الخدش
عذرچ من الزهره شنهو لو تاذيله رمش
تلبسچ اليل وسواده بشهكه يم رب العرش
هوه والمحسن يجون عله الصراط
وبيده جبريل اليمدلهم بصاط
لاتلمسينه لمس
بهيده يخيوط الشمس
—————
راح اعد جروحه كلها وابتدي بجرح السهم
رجله ضربت حجر بيه وچفه مچوي من الخيم
وعينه حمره وبيها موقف شايل هموم والم
مدري من ضربو رقيه مدري من طاح العلم
وشفّته الترفه العطش يبسها حيل
وصدره مثل حسين ابو ساحكته خيل
بكل جرح منهن احس
بهيده يخيوط الشمس
————
ياشمس لوما اروحن غصب وي ضعن السبي
جابقيت بصفه عنچ خيمه اسويله العبي
هضمه تتغير ملامح وجها لو اي ميزه بي
طفل بس رسوم وجها نسخه من جده النبي
مـن تچويّنه تچويّن الرسول
ومن تلچمينه تلچمين البتول
هاي الچ محنه و درس
بهيده يخيوط الشمس
—————
اخ يانار الفراگ المامثل چويچ چوي
عبد مات واني عدله يمه گلبي شكد جوي
ياثمر عمري الفگدته وماوصل وكت الحوي
التوي مـن الصوط مره ومره اشوفك والتوي
زغير عمرك حيل وي كلمة شهيد
عيد ميلادك بعد ماوصل عيد
وانه اله محضره البس
بهيده يخيوط الشمس
————
وردة اشوفك يمي تذبل واني اون ون الحمام
لادمع بعيوني ظل ولاضوه وصارت ظلام
من شفت ريگك تفطر والله لومه الدم حرام
چنت اگصلك وريدي وتروه من دمي وتنام
لو يصير افديك انه على الموت افوت
ولو اموتن دونك شلذها من أموت
يازمان شكد شرس
بهيده يخيوط الشمس
————
الشاعر عقيل العنكوشي
BY الشاعر عقيل العنكوشي
Share with your friend now:
tgoop.com/akeelalankoshi/7802