tgoop.com/al_mahdy_2024/150
Last Update:
📝: كلمات الشاعر أحمد الذهبي
🎙: باسم الكربلائي
📄: الله يعلم
الله يعلم هذا يا دم
قطره منه تسوه زمزم
دم اطهر من الماي
ما شايف ابدنياي
مو جرح بالشد يطيب .. العله لأيام المشيب
كسرة الوالد عمر
يلگه كل ايامه سود .. البيته خيمه ابلا عمود
ليله وفراشه جمر
الناس اذا تلبس جديد .. شيلبس الدافنله عيد
بروحه يا فرحه التمر
اليخسر الأب اشوراه .. امعلعل وضايع دواه
وكشخته دموعه الحمر
الگلبه جمره تعرف امره
من تشوفه دموعه عمره
المرهم يكتله الداي
ما شايف ابدنياي
بويه لا ترحل تعال .. ازغيره واحتاج الدلال
بزغري ليش تعذبت
زينب ويازينب آخ .. والسمع سالفتي داخ
من الطفولة وشيبت
آني مثل امي صفيت .. للحزن هم عندي بيت
هم مثلها اتحاربت
الغربة مو غربة ديار .. لو خيم تحرگها نار
ابموت ابويه تغربت
العافه گلبه جروحه صعبه
بعينه حتى الجنه غربه
النار انجوت بحشاي
ما شايف ابدنياي
هذا مو وكت الرحيل .. حمل الموادع ثگيل
عالحسن يابو الحسن
صعبه وانا اسمي الكريم .. اسمي من باچر يتيم
الله لا ينطي الزمن
هجمت ارياح الخريف .. كسرت اضلوع المضيف
نكست راية وطن
اشتريها الفرحه بيش .. وآني لابس جرحي ليش
وانت لابسلك جفن
روحي صلفه تگلي تصفه
العينه راحت يمته يغفه
حتى ابحلم ما جاي
ما شايف ابدنياي
هاك اخذني وشمني زين .. بلكي بأنفاس الحسين
گلبك ايردله النبض
لحظة افراگك ضماي .. يالعطشلك گلبي ماي
يرتوي ابغيرك رفض
من انگطع نبع الحنون .. ما يهمني اشما يكون
اويه النهر ما عندي حظ
ابنك الخيره امن اديه .. يا گلب يصبر عليه
يطلب من الله العوض
بيش ابدلك ماكو مثلك
غصني ذابل واعطشتلك
غيثك رحل بضماي
ما شايف ابدنياي
مو گمر اني من اجيت .. شفتك اجنازه وطفيت
جرحي شگ صدري وطلع
لا سهم بعيوني طاح .. لا خذت صدري الرماح
ليش احس چفي انگطع
مو مهم لو ما اشوف .. مو وجع ضرب السيوف
موتتك بويه الوجع
العمره دنيه وما ابوه .. بالله يا ناس اسألوه
من حنان الاب شبع
العنده شده الأب يسنده
يا فراغك من يسده
مثلك سند وياي
ما شايف ابدنياي
منحني جاي الهلال .. البيته ويدري الجمال
بروحة الوالد رحل
المات ابوه عيده الجروح .. العيد گلناله امشي روح
لهلك احنه ابلا أهل
هذا رمضان احنه غير .. مفارگين الوجهه خير
اليمشي ويوزع أمل
تسوه ديرة من الحنان .. البويه من ذاك اللسان
گلبه ما يعرف زعل
البويه منه بحب تلمنه
كلمه لكن تسوه جنه
بلسانه حلوه اهواي
ما شايف ابدنياي
BY بـــآنــتـظار الـــقائـم ؏ـج ✨🥺
Share with your friend now:
tgoop.com/al_mahdy_2024/150