tgoop.com/alfehbawe/2575
Last Update:
الهــلا بلسان طوعه مال بدويـــه
معزبه بوكت ماچانت عــزوبــــيه
اخترق قانونها كل القوانيـــــــــن
بطاسة ماي دخلت گلب الحسين
،،،،،
بوكت چان الشجاع يخاف
من روحه ويســــــــــد داره
اول بيت بالكوفــــــــــــــــــه
انفتح وتلگه خطـــــــــــــاره
الهلا بلسان طوعه تگــــــول
سيد يمتلك شــــــــــــــــــاره
الهوه لو هب تنشده بـــشوگ
بالكت جايب اخــــــــــــــباره
اليّگول الكوفه بسمچ خل نسميها
سبع فوات الچ هيه ونواحيـــــــها
تشعل نار يم الباب يوميـــــــــــــن
بطاسة ماي دخلت گلب الحـــسين
،،،،،،
اعله نار الشوگ منتظــرة
وبيدها گاعدة وتــــحسب
وتفوّح چلمة اتفضــــــــــل
يمسلم والحنان يهــــــــــب
بيدها طاسة مالت مــــــاي
من ناگوط ماي الحــــــــب
اتعرف مسلم يجي تـعــبان
ومتانيته للمـــــــــــــــغرب
الزلم تندار فدوه يم عـــباياهــــــا
مره وتسوه الف رجال وگفتهــــــا
والجيته شكر صلت ركعتـــــــــين
بطاسة ماي دخلت گلب الحـسين
،،،،،،
مره وتسوه عشيرة شيوخ
تنعد بألف زلمـــــــــــــــــــه
مسلم من اجه مكــــــسور
طوعه ظلت تحزمــــــــــه
سابع جار يعرفـــــــــــــــها
عفيفه ومنبع الحشـــــــمه
تراب جدامها التاريـــــــخ
واجب ينحني ايشمـــــــه
مبخرة البيت طوعه وتنتظر جيته
وديوان الضيافه العصر فارشتـــــه
نقيه وضل ذكرها خالد سنيـــــــــن
بطاسة ماي دخلت گلب الحـسيـن
،،،،،،
ابن نساب ويميــــــــــز
ويَعرف ابنادم امن اصله
گبل ما چفه دگ الــباب
شاف الدار بي خصــــله
بيها أمعتبرة وبت نــاس
وهذا الرايد ايحصـــــله
مسلم غايته ايصلـــــــي
لله ويختلي بوصـــــــله
لگه مصلايه مفورشه ولگه تربــه
وسجد مسلم شكر لله ودعه ربـه
شم ريحة وفاء وفاضت العيـــــن
بطاسة ماي دخلت گلب الحـسين
،،،،،
دخل مسلم الدار وشـــاف
بكل حايط اسم غالـــــــي
مكتوب النبــي المخـــــتار
وحدرة اسم الوصي الوالي
لمن شاف اسم حســـــــين
ضلت دمعته تلالـــــــــــــي
حط ايدة اعله اسمه ونـاح
وچان اسم السبط عالـــــي
حچه وي الحسين ودمعته بعينـه
حط بنتي حميده بخيمة أسكينــه
يبن عمي اليتم يحسين مــــــوزين
بطاسة ماي دخلت گلب الحسيــن
،،،،،،،
لخادم الحسين ع
محمد الفهداوي
BY قناة الشاعر محمد هادي الفهداوي
Share with your friend now:
tgoop.com/alfehbawe/2575