tgoop.com/aliAlkAlk/3494
Last Update:
#قصيدة_لام_البنين
ام البنين ع تخاطب الحسين ع
خيرة يُمّة اخذلي ابسبحتي هاك
اروح اويــاك لو مــــــا روح وَيَّاك
ما اكدر اعـــــوفك
و لا اكـدر اشـوفك
يُمه مذبوح
ــــــــــــــــــــــــــــــــــــ
صــــــلاة الفجر صلــيت بدمع ينبع
و اجيتك قبل لا وجه الصُبح يطلع
ليل البـــارحة گضــــــــــيته اتلـوَّع
اخاف تـروح مني و ما بعــد ترجع
لبَسْت المقــنعة و ابســاع الاحجـــاب
ركض جيت و شمرت بروحي عالباب
صدگ عــازم رحيلك
دخيل الله و دخيلك
عني لتروح
ــــــــــــــــــــــــــــــــــــ
ابعباتي اتحــــــــزمت اول الصبحية
و مثل الريــــــح الك جابتني رجليه
شما تطلــع الخـــــــيرة انـــه متاذيه
الرحت و الما رحــت معناها مسبيه
يمكن خير اظــــــل ابدار الاحزان
احسن ما اشوفـــــــك يُمة عريان
ولو لمـــــــن تسافر
غيابك چــن حــافر
يسحگ الروح
ــــــــــــــــــــــــــــــــــــ
اذا نفـــــــرض الخــيرة زينة لو طلعت
و رحت لاهناك و اعليـك العده انجعت
بيا عين اگــدر انظــــــر جثتك اتوزعت
و بصــــــــدرك حــوافر خيـلـهم طبعت
شعاين و انته صاير كومة اسهام
و منك ينسمع بس طگ الاعظام
ضلع ما يبقه سالم
عليك و انته نايـم
بين الجروح
ــــــــــــــــــــــــــــــــــــ
بيــن امرين روحـــــــــي بنار ملتهبه
صعبة لو رحت و ان ما رحت صعبة
خدك ارد ابــوسه لشــــــــــفتي گرّبه
خاف ابظُهر باچــــــــر تاكـــله التربة
و اريد اشتم لحـــــــيتك يُمة بالحال
قبل لا تنترس مــــــــــن ذيچ الارمال
و طولك خل اشبگه
شمس باچر تحــرگه
و يبقى مطروح
ــــــــــــــــــــــــــــــــــــ
عليك شگـــد تعب گلب امك الزهره
تعبها تشـوفه باچر حـــــافر يطشره
و چف سلاب يگطع ازغــــر العشرة
ياخـذ محبسك و الخنــــصر يشمره
تبقه ابلا ستر مســـلوب الاثياب
جبينك دم يخر و ابعينك اتراب
لاختك ترفع ايدك
لَمٓــن ينحز وريدك
و الدمه يفوح
ــــــــــــــــــــــــــــــــــــ
احچي ويــاك و انه اتلوه باحزاني
باصــرني دخيلك و اطفـي نيراني
ابابك گلبي واگف حـــــاير امتاني
و الله تمرمرت يحــــسين بزماني
عگبك راح اظل لو صار الاوداع
لاني للسـمة و لانــي علـه الگاع
و حگ فورت دمائك
لاخلي لكـــــــربلائك
يوصل النوح
ــــــــــــــــــــــــــــــــــــ
الحمدلله
#علي_حسين_الكناني
BY قناة الشاعر علي حسين الكناني
Share with your friend now:
tgoop.com/aliAlkAlk/3494