tgoop.com/aliQ0Q/1192
Last Update:
من سجن السجن خلصهن اسنينه
بقيود الحديد العده مــــــــگيدينه
عاش ابحسره واهات / شاف اشگد معانات
من سجن السجن خلصهن اسنينه
ـــــــــــــــــــــــــــــــــــــــــــــــــــــــــــ
الكاظم بالسجن خلصهن ايـــامه
عايش بالمأسي وليله مــــــينامه
مجِتفين ابسلاسل ايده واجدامه
جار اعليه زمانه ويرمي بسهامه
ويّآه الزمن جار / شأت بيه الاقدار
يگضيها ابسجن والعده امجتفينه
من سجن السجن خلصهن سنينه
ـــــــــــــــــــــــــــــــــــــــــــــــــــــــــــ
خلّص كل حياته امهاجر اديــاره
لاشايف هله ولا وشايف انصاره
بطاموره وميدري بليله ونهــاره
من گيد السلاسل دمّه يتــجاره
بيده الگيد مطبوع / منّه هوايه موجوع
من كثر ألالم ما غمضت عيـــــنه
من سجن السجن خلصهن سنينه
ًـــــــــــــــــــــــــــــــــــــــــــــــــــــــــــ
من كثر العذاب امغيره الــلوانه
وحده ابلايه ناصر عايش احزانه
ابلا ذمه وضمير وقاسي ســجّانه
واعليه ابحقد مفتره عــــــدوانه
بيه اتحيط الاشرار / زمره وكلها كفار
وحده ابّينهم ما واحد ايـعـــــينه
من سجن السجن خلصهن سنينه
ًـــــــــــــــــــــــــــــــــــــــــــــــــــــــــــ
مغيّب بالسجون ومحد ايشوفه
ممنوع اليزوره ويعرف اضروفه
گلبه اشتاگ لّهله وروحه ملهوفه
ايون اعله الاهل والدمعه مذروفه
منعو حتى اليزور / اهل الضلم والجور
أنــواع العذاب العـــده مشوفينه
من سجن السجن خلصهن سنينه
ـــــــــــــــــــــــــــــــــــــــــــــــــــــــــــ
عايش بالسجن ومفارگ اوطـــانه
وجسمه اصبح نحيل وروحه ذبلانه
گلبه اعله الاهل مستـــعره نــيرانه
روحه الشوفت الاحباب عــطشانه
روحه محمّله اهموم /خلّص عمره مضلوم
خلونه ابألم نبجي اعله والـــــينه
من سجن السجن خلصهن سنينه
ـــــــــــــــــــــــــــــــــــــــــــــــــــــــــــ
خلونه ابألم يا شيعه نـــبجيله
دمــعات الحزن خلونه نجريله
من سم الطغات انهدم كل حيله
ميت بالسجن ياويلي هاللــيله
موسى الليله مسموم/ مات وگلبه مهموم
فراگك والبعد يا موسى يـــاذينه
من سجن السجن خلصهن سنينه
اهدي ثواب القصيده الى
روح وآلدتي رحمها الله
✍️علي كاظم المنصوري
BY الشاعر علي كاظم المنصوري
Share with your friend now:
tgoop.com/aliQ0Q/1192