tgoop.com/aliQ0Q/1373
Last Update:
https://www.tgoop.com/aliQ0Q
يضلعي ومصابه يستري وحجابه
يبـويه اشتكيلك هجوم الصحابه
ابحقد عاملوني / وابد ما رعوني
امن اجوني العصابه
ــــــــــــــــــــــــــــــــــــــــــــــــــ
اخبرك يا مـــحمد بالجره وبالــصار
حقد اهل السقيفه اعله الزجيه اندار
نكرو فاطـــمه بنت النبي الــمختار
اجوني ابلا إذن طـــــــبّو عليّ للدار
تسب بيه وتشتم ضــــــــلت الفجّار
ورضّو ضـــــلع اليه ونــــبّتو بسمار
ابدموع الفجيعه صحت يا شريعه
اعله ايد السقيفه تموت الوديــعه
النواصب ولوني /وابد ما رعوني
امن اجوني العصابه
ــــــــــــــــــــــــــــــــــــــــــــــــــ
يبويه إلي جره ما خـــــاطر ابـالي
الصحابه من غبت ما رحمو ابحالي
خلو عيني حمره ودمعتي اتـــلالي
الما سبني دفعني او روّع اطــفالي
المحسن شاهديته اينازع اگبــالي
خابت يا مــــحمد بــــعدك امـالي
يريتك تجيني تسكّت ونيني
تشوّف الجرالي وتشاهد جنيني
احرموه وحرومني /وابد ما رعوني
امن اجوني العصابه
ــــــــــــــــــــــــــــــــــــــــــــــــــ
اسولفلك يبويه وبالگلب حسره
نيران الصحابه ابابــي مـستعره
وبوجه الزجيه ضل اثــر سطره
يآ لوعت مصابي ولوعة العصره
ضعلي اتكسّر وما ينجبر كـسّره
ولا جِني الزجيه فاطمه الزهره
ولوني ونخيتك بألم حشميتك
انهضمت ابغيابك انه او عاتبيتك
اعله عيني اسطروني/وابد ما رعوني
امن اجوني العصابه
ــــــــــــــــــــــــــــــــــــــــــــــــــــ
اسولفلك بعد عن هضمي ومصابي
واسمع يا محمد حــــجيي وعتابي
لذت بالباب احفض ستري وحجابي
عـــليه اليندعي اول يـــــدّفع ابابي
وبناره حرگ يـا بويه جــــــــــلبابي
اجر گوه النفس من شــدة اصوابي
يگلي اطفي عينج واسكّت ونينج
ادفــعج بـــــديه وسگط جنينج
شكثر عذبوني /وابد ما رعوني
امن اجوني العصابه
ــــــــــــــــــــــــــــــــــــــــــــــــــ
حرمه وتندفع بيد الزلم صــــــعبه
وعليها الظالم ايـعيل ويشن حـربه
حقود وناصبي وكل الحقد صـبه
يلم اعله الزجيه ويجمع ابــحزبه
لا يعرف نبيــيّه اولا ذو القـــــربه
ضربني وما شفت من شدة الضربه
ضربني وعماني دفعني ورماني
طحت عالوطيه وتهدّم كــــياني
طريحه اتركوني /وابد ما رعوني
ــــــــــــــــــــــــــــــــــــــــــــــــــ
الجان امن الصحابه انحسبه ونعدّه
نكث بيعة محمد وأخلــف ابـــعهدّه
ردّ لـلــــــــجاهليه وما وفه بوعده
تــماده اعله الزجيه وما لزم حـــدّه
اجه وبــــكل وقاحه اعليه يــتـعدّه
ذبل عــودي مثل ما تــــذبل الورده
الالــــــم ذبلاني الهضم شيباني
الدهر ما رحمني جرحني زماني
يبويه اشتموني/وابد ما رعوني
امن اجوني العصابه
علي كاظم المنصوري
BY الشاعر علي كاظم المنصوري
Share with your friend now:
tgoop.com/aliQ0Q/1373