tgoop.com/aliQ0Q/1393
Last Update:
https://www.tgoop.com/aliQ0Q
مجرّبه ام عباس من تنخاها
حاضره ابكل الشدد تلّــگاها
ــــــــــــــــــــــــــــــــــــــــــــــــــ
صفّي گلبك يالموالي ونـــــيّتك
ونادي يم عباس وطلب حاجتك
بالكرم معروفه مترد طـــــلبتك
بالنــــعم والــخير تترس سلتك
ما تخيّب كل شخص ناداها
مجربه ام عباس من تنخاها
ــــــــــــــــــــــــــــــــــــــــــــــــــ
اتوجه الها وخلي عينك شـــابحه
وخلي دمعاتك على الخد سايحه
اقرا لم عباس وهدي الـــــــفاتحه
تلــــگه ابواب الســــماء امفـــتحه
وحاجتك تگـضيها ما تنساها
مجربه ام عباس من تنخاها
ــــــــــــــــــــــــــــــــــــــــــــــــــ
ضحت وانطت ولدها الاربــعه
وبالحزن خلّص عمرها مگبّعه
تنادي لجل الدين هينه الفاجعه
والله عظمها وجعلها الــشافعه
الباري يشفع للذي والاهـــــا
مجربه ام عباس من تنخاها
ــــــــــــــــــــــــــــــــــــــــــــــــــ
اسِأل ام عــــباس وطرق بابهه
وگلها احلفج بم حسن ومصابهه
تستجاب وما تأخر اجـــــــوابهه
والله مترد واحد امـــن احبابهه
الله قــدسهه وكرامه انطاها
مجربه ام عباس من تنخاها
ــــــــــــــــــــــــــــــــــــــــــــــــــ
لو عجز دكتورك وعودك هــــوه
حالتك حرجه وصعب شم الهوه
حــــوله لا عندك ولا عندك قوه
اگصد الها وهيه تنطيك الــدوه
يشفي كل علّه ومريض ادواها
مجربه ام عباس من تنـــخاها
ــــــــــــــــــــــــــــــــــــــــــــــــــ
من تتطيح ابشده وتمر ابعـــــسر
تگصي بيك الدنيا ويضيگ الصدر
لا امل عندك يــــــضل ولا صـــبر
اتوجه اوحولفها بجــفوف الـــگمر
تفرج اهموم العليك ابــجاها
مجربه ام عباس من تنخاها
ــــــــــــــــــــــــــــــــــــــــــــــــــ
علي كاظم المنصوري
BY الشاعر علي كاظم المنصوري
Share with your friend now:
tgoop.com/aliQ0Q/1393