tgoop.com/ali_falah_wasti/593
Last Update:
قصیده لیلة الثامن
من دم نحرك تتحنه عرسك باجر بالجنه
عکب السهر یاجسام ضاعت جمیع الأحلام
********
لساني دوم يبني يلهج ابذكراك
تعبني يبعد امك ليالي ارباك
چنت یبني تجي ترعاني و انه ارعاك
هسه راح اشوفك تمشي صوب اعداك
عافيتي ابجالك يبني تعب ارباك الشيبني
اشسوت ابحالي الأيام ضاعت جمیع الأحلام
*******
کل اُم تحسب الزفت ابنها احساب
عمامه و ولد عمه و جَمعة الأحباب
و انه عرسك ییمه ایخلی بیه اصواب
ازفك للحرب يبني ابدمع سچاب
اترفرف روحي و ما تهجع اجري دم ابقه المدمع
و ابگلبي تبقه الألام ضاعت جمیع الأحلام
*********
کل ما اذکر اسمك يالولد اشهگ
جرح گلبي ابغيابك يكبر و یغمگ
الزمن هیهات مثلك یالولد یطلگ
ولا عگبك تره باب الگلب یندگ
احچي ابدمعات اعیوني لا تسئل عني اشلوني
گلبي ابفركتك ينضام ضاعت جمیع الأحلام
********
یجاسم من ارید امشي اظل اعثر
اتذكر ايامك و ابقه اتحسر
کل ظني گلت گدامي من تکبر
الساعات الشدد ویایه تتحضّر
والحسره الذبحت روحي عكبك راح ابقه ابنوحي
لا تنسه ذیچ الأیام ضاعت جمیع الأحلام
**********
یالتشبه ابوك الحسن يايمه
شایل هیبته و قوته مثل عزمه
لا تنسه وصيته ابركبتك ذمه
تضحي ابروحك الخاطر ابواليمه
اتضحي ابروحك يوم الطف من كلها اكباله تسطف
عمك تشوفه جدام ضاعت جمیع الأحلام
*********
یجاسم یبني ارید العمك اتعنه
اخذ رخصه ييمه للحرب منه
گله اعله الشهاده روحي تتمنه
و الهل موته عمي والله اتهنه
گله اتشجعني امي انطت سيفي وي هدمي
اوگف ابوجه الظلام ضاعت جمیع الأحلام
********
لخادم الحسین علي فلاح الواسطي
محرم الحرام
1444
BY الشاعر علي فلاح الواسطي
Share with your friend now:
tgoop.com/ali_falah_wasti/593