tgoop.com/ali_falah_wasti/616
Last Update:
ابدمعتي یحسین اجیتك لحظه وحده مانسیتك
خویه دلالي انهدم وینه شیال العلم
****
تسعر ابگلبي المصیبه و جیتك ابنوح و أنین
خویه شیبني مصابك وحگ دمع ام البنین
گوم و اتلگه خواتك ادري بیك انته الحنین
الیوم صادف یاحبیبي هوه یوم الأربعین
جیتك ابدمعي اعله گبرك عن وضعنه راح اخبرك
گلبي یحسین انخذم وینه شیال العلم
****
الله لي راویك خویه من الضرب متني وگع
الشمر من شفته اعله صدرك گلبي یبن امي انشلع
گتله عوف حسین عوفه چنه ما شاف و سمع
تالي حرگو کل خیمنه و ماشفت واحد فزع
خویه من حزو وریدك عالنهر ینحب عضیدك
بیها ما واحد سلم وینه شیال العلم
**
من طحت فوگ الوطیه ثوبي بالنار احترگ
کثر ما دخان صاعد صدري یاخویه اختنگ
مدري بیش ایطالبونك اليّ صدرك ینسحگ
عمت عین الوکت خله ابسرعه هیچي نفترگ
صعبه احچي عالجرالي ایشیبن حته اللیالي
ابعمري مزروع الألم وینه شیال العلم
****
طفو اشموعه یخویه وسفه جسام الشباب
الیشبه الهادي محمد عاف بیه اشچم مصاب
گمر هاشم عالشریعه سابح ابدم الخضاب
و المهد خالي و تهزه خوفي لتموت الرباب
شکوتي محد سمعها هظمتي محد جرعها
حرگو اعلیه الخیم وینه شیال العلم
***
یاحسین و راح اجرحك من اگلك بالأمر
و الحرایر عگب عینك داسن اشگد عالجمر
صعبه یبن امي اگلك یحدي بالناگه الزجر
و الذبحني ایسب ابویه ییقه کل الحظه الشمر
خویه عالناگه الهزیله راحت ابگوه العقیله
العده باعوها الذمم وینه شیال العلم
****
خویه جیت ابأربعینك و اصرخ ابهل الفاجعه
جبت من الشام عیله امجرحه و امروعه
خل یجي یستقبل اخته الطاح فوگ المشرعه
ارد اگله خویه انهض یبو اچفوف امگطعه
یابوفاضل ارد اگله هاذه نومك مو محله
ابعینه مصیوب السهم وینه شیال العلم
****
لخادم الحسین علي فلاح الواسطي
15صفر
1444
BY الشاعر علي فلاح الواسطي
Share with your friend now:
tgoop.com/ali_falah_wasti/616