tgoop.com/alialhmedey/11597
Last Update:
حان. موعد المشايه
سار. كلبي ويه الرايه
شوك. الدمعه ترسم خطوه
حسين. مكصد الوفايه
باقي لسه يحسين على وعدي
امشي والدمع يمشي على خدي
خيرك سار بينه موش الاجدام
بس درب العزاء الخطوه تحدي
بچفنك انته تحمينه
خيرك داير علينه
اذا بچفونك تحطنه
جا بيمن تغطينه
سلام الرايه. الك
وغرام الدمعه. الك
وتعبنه فدوه. الك. حسين
___________
جروح. بدربك شما تكبر
اليل. للعزاء قد كبر
نموت. وخدمتك تحيينه
نعيش. وانته منطي الاكبر
مشينه وشوكنه يسابك هوانه
وصال الحب يبو الاكبر خذانه
موش على الجدم نوصلك زحوف
ومدري بيش ابو فاظل اجانه
شايل رايه بزنوده
ويصيح عليكم العوده
يروي الحب والخيام
كريم وينشكر جوده
سلام الرايه. الك
وغرام الدمعه. الك
وتعبنه فدوه. الك. حسين
___________
هاي. جدامي الك منذوره
لون. عطشتك كل صوره
نصيح. ياهلا بزوارك
الروح ترتوي شما ازوره
رايه برايه نوصل للمناره
نموت بلا عزاء ولا زياره
يبو كلب الترضرض بين الخيول
حبك مابرد بجروحي ناره
انخلقنه حتى نمشيلك
بدموع وحسره نبجيلك
لله خيمتك منطي
والله حاب يوفيلك
سلام الرايه. الك
وغرام الدمعه. الك
وتعبنه فدوه. الك. حسين
_______________
تروح. للطبيب اجدامي
جروح. يم حبيبي الضامي
حب. موعد ويه الدمعه
بيك. ابدي كل ايامي
خلي اجدامك تحن بمشيها
بكل خطوه الدمع خل يرتجيها
الخادم والامير. بدربه خدام
مملكة الخيم ذبحو نبيها
الامير البيها عطشان
شفافه ونحره ذبلان
ضل بذيج الطفوف
الساتر باقي عريان
سلام الرايه. الك
وغرام الدمعه. الك
وتعبنه فدوه. الك. حسين
_____________
الحيل. امشي واطلب منه
دموع. تجوي كون لضعنه
نار. من خيامه لجرحي
بويل. لاربعينك سرنه
وي ممشه الهوادج والضعن روح
خلي بكلبك لمولاتك جروح
اوصل منكسر ومدنك الراس
امتثالا للبقه بلا راس مطروح
عاين كربله بعينك
وشوف شصار بحسينك
كون بصحنك نموت
ولا يطفي السهم عينك
سلام الرايه. الك
وغرام الدمعه. الك
وتعبنه فدوه. الك. حسين
✍️علي ناظم الحميداوي
https://www.tgoop.com/alialhmedey
BY الشاعر علي ناظم الحميداوي
Share with your friend now:
tgoop.com/alialhmedey/11597