tgoop.com/alialialqran/12708
Last Update:
وين تردون بضعنكم وين بويه يحسين
*
عني مشيتو بويه وجزيتو
واشكد صحت وراكم بس ما اجيتو
من سارن النوك جن كلبي مبيوك
وكل ما يبعد ضعنكم يتكاثر الشوك
ضليت اون عليكم وصفك باليدين
وين تردون بضعنكم وين بويه يحسين
**
انشد عليكم روحي انه بيكم
حته الهوه الاشمه ياخذني ليكم
اكعد عله الباب وترجه الاحباب
حسرات اكضي ليلي وبكلبي الصواب
عكبك طحت اعله وجهي بالعتبه مرتين
وين تردون بضعنكم وين بويه يحسين
***
انه العليله وياهو اشتكيله
رحتو وليلة سفركم ما منها ليله
يمته ترجعون وشلت العيون
غير بويه انه العزيزه عدكم تكولون
ريضو صحت وراكم ودموعي بالعين
وين تردون بضعنكم وين بويه يحسين
***
نار بدليلي وسهرانه ليلي
تدري الهجر كتلني وهد بويه حيلي
عفتوني وحدي ودمعي اعله خدي
رحتو وضلن صوركم بس هنه عندي
كلش طول سفركم يالعني ماشين
وين تردون بضعنكم يابويه يحسين
**
بيه الحمل مال وتغير الحال
وجدمي ضل بجفاكم بالكوه ينشال
بطيفي شفتكم وتذكرتكم
كل عمري بويه تدري ما زعلتكم
حادي الضعن يكلي لازم ترجعين
وين تردون بضعنكم وين بويه يحسين
*
بيه الوكت دار وكلبي يشب نار
وحشه وضلت عكبكم ما تنطب الدار
لميت الهدوم وترجه كل يوم
ومن عادت اليتاني ما يعرف النوم
ضلمه الدنيه شفتها عكب البعيدين
وين تردون بضعنكم يا بويه يحسين
*
تمت
تحسين الخفاجي
BY نشر القصائد الحسينية لجميع الشعراء
Share with your friend now:
tgoop.com/alialialqran/12708