tgoop.com/alialmarhoon14/383
Last Update:
فك باب السجن بالله يسجانه
اريد اشاركنه اهمومه وحزانه
(فك باب السجن بالله يسجانه)
.......
فك باب السجن ارجوك ياسجان
صار سنين ماعوَّد
علينه وبان
غريب ولا اهل يِصلون اله واعوان
خلصو كل هله
ياوسفه واعوانه
(فك باب السجن بالله يسجانه)
.....
فك باب السجن بلكن اشوفنه
ارطال امن الحديد وخاف ياذنه
اسنين مگيدينه ويجذب الونه
ياريت السجن مهدوم بنيانه
(فك باب السجن بالله يسجانه)
......
فك باب السجن بلكن اله ترويح
طاموره مظلمه وما يمرها الريح
ومن السنسله مالوم ظل وِجْريح
ليش مغلگين عليه بيبانه
(فك باب السجن بالله يسجانه)
.......
من سجن السجن محجوب عن الناس
شسوه ابن الزچيه وي بني العباس
مگيد بالحديد ويلگف الانفاس
اسنين اخمص طعش مسدود ديوانه
(فك باب السجن بالله يسجانه)
......
من البصره خذو وحده
لسجن بغداد
مدري بياذنب مشدود بالاصفاد
هذا ابن الصميده
وسيد العُبّاد
من كثر السجون مغيره الوانه
(فك باب السجن بالله يسجانه)
.......
يدعو بكل صلاته ياله الكون
خلصني يربي من سجن هارون
من هاي الحياة الموت عندي يهون
عمود الدين هذا وشيّد اركانه
(فك باب السجن بالله يسجانه)
للجسر بعباته طلعوه ملفوف
خلص جد الجواد
البالزهد معروف
گلبه ينكسر كلمن يجي ويشوف
وين اهله يجون ووين دفانه
(فك باب السجن بالله يسجانه)
لَمّن عرفِته شيعته المظلومه
يوم اگشر عليها ياصعب يومه
غريب ولاحصل له من هله وگومه
وين اللي حضر تغسيل سلمانه
(فك باب السجن بالله يسجانه)
.......
وينك ياعلي ياحاضر الشدات
الكاظم بالسجن
مسموم ويلي مات
عن اهله غريب ويجذب الونات
عله جسر الرصافه
تسوي ميدانه
(فك باب السجن بالله يسجانه)
......
الله يساعدچ يم الحسن وحسين
ليامصرع حضرتي
لياسجن ترحين
من كثر المصايب راح شوف العين
واجاچ الكاظم المسجون عنوانه(فك باب السجن بالله يسجانه)
......
مصيبة كربله هونت كل مصاب
وحتى امن الضلع
لليوم ظل ماطاب
وعين البيها صطره
تهل دمع سچاب
عله حسين التراب الصاير چفانه
(فك باب السجن بالله يسجانه)
.......
يوم حسين مامر يوم مثله وصار
راحو كل اخوته وجملة الانصار
نايم عل رمل والرمل صاير نار
الحرب والعطش والحر يبس لسانه
(فك باب السجن بالله يسجانه)
.......
ش عبدالامير المنصوري
BY جمرةُ غَضى
Share with your friend now:
tgoop.com/alialmarhoon14/383