tgoop.com/alialmoosawe/2730
Last Update:
يا سلام الله على جاسم ايه للحب لو توصف
حاير بأمرين شفته لو عرس لو جثه بالطف
راح للزفه وبطفه مكتوبه المنيه
راح يم عمه وكل همه مكتوبه المنيه
......
قصة حب عجيبه .. والحاله غريبه
فرحه ويه المصيبه .. وشيجيبه .. عني لو راح
صح چن عمره ورده .. بالف فارس أعده
ضيم اعله اليضده .. وشيرده .. الماي لو طاح
غيره امن الهواشم .. بحب حسين هايم
عينه اعله الفواطم ... يرد سالم .. ويه الافراح
بس اعرف صفاته .. لا ميعز حياته
فرحان بمماته .. وشحلاته .. شمس مصباح
تارك بأيدي وصيه ومن الدمع ثوبي تخضب
يگلي يا يمه مصابي يهون عن مصاب زينب
شاف بالحومه مرسومه ساعات الوصية
راح يم عمه وكل همه مكتوبة المنيه
..........
نضرة عينه جنه .. وبغيره تعنه
وكاتب من الحنه .. شما تمنه .. فوگ الچفوف
يتمنه المنيه ... بأرض الغاضريه
عينه تصد عليه .. والاذيه .. لمن يشوف
يحچي بعينه چلمه .. و يگلي ييمه
چفچ خل الزمه .. و آرد اشمه ودمعه مذروف
وصاني بوصيه .. يمه بهالمسيه
جثتي تضل رميه .. عالوطيه .. بين الصفوف
يمه لو خلصت حياتي فدوه لحسين وعضيده
الفاتحه اقري عليه الغيبه لو صارت بعيده
راح اتوكل واتحمل يا يمه الاذيه
راح يم عمه وكل همه مكتوبة المنيه
........
سالم يمه ريتك .. ترجعلي نخيتك
بس انته الحويتك .. والمنيتك .. تمشي هاليوم
صح هذي الإمانه .. تحط كلشي بمكانه
يا يوسف زمانه .. امك انه .. وگلبي مهموم
لتطول رحيلك .. وين الگه بديلك
بنص روحي اشيلك .. واشتكيلك .. والحزن دوم
اغله من حياتي .. يا قبلة صلاتي
يا كل امنياتي .. يالمماتي .. گبلك إيحوم
لا تصدگ لو عفتني ابقه مرتاحه بزماني
عيني متعوده عله شوفك لو رحت عميه تراني
بيك أحلامي أيامي يا جاسم زهيه
راح يم عمه وكل همه مكتوبة المنيه
........
يا اغله الغوالي .. بيك الرأس عالي
يا عمري ودلالي .. يضل سؤالي .. يبني شتريد
رايد ثوب عرسك .. بچفوفي البسك
وادعي الله يحرسك .. يلي حسك .. فرحة العيد
گول اطلب ييمه .. منك ولو چلمه
گلبي ويه دمه .. ليك اسلمه .. ولو شنو تريد
شموعك بالصواني .. هلهوله وتهاني
واليومك اتاني .. يا حناني .. ونبض الوريد
راح اطش ورد السعاده وفرحتي ماضنها تكمل
ابالك الفرحه الچبيره لو هويت اووذر ترحل
لا تتأخر ما اگدر تتركني سبيه
راح يم عمه وكل همه مكتوبة الوصيه
........
اعرف كل صفاتك .. يا روحي وغلاتك
منذوره حياتك .. وبمماتك .. تذبل اورود
شفتك بالحرايب .. سويت المصايب
تصنع بالعجايب .. والكتايب .. عنك شهود
ترباة الفوارس .. وبسيفك مدارس
بيك احتار عابس .. ما تنافس .. اله بالجود
محتاره زلمهم .. وبكثرة عددهم
ما تندل دربهم .. عذبتهم .. ناوي وبزود
يا حسين تنادي بالطف زلزلتها الگاع بيهم
ولو تنادي يبو فاضل والله ما تلحگ عليهم
نار نضراته وصولاته بالطف حيدريه
راح يم عمه وكل همه مكتوبة المنية
........
يالضحيت دمك .. لجل حسين عمك
شي وصلني يمك .. أرد اشمك .. روحي وياك
يبني شلون اشوفك .. دم حنه چفوفك
بالمدمع اطوفك .. ما اعوفك .. يــــمه انخاك
وجروحك اعدهن .. محتاره شيشدهن
بعيوني شفتهن .. تجري كلهن .. دمعي اذاك
شيبني مصابك .. اشايف من شبابك
الموت ولا غيابك .. وبعذابك .. يبني منساك
إحظنتك بكثرة جروحك وسلمت بيدك وصيه
طلبتي بالجنه يبني خل مكاني ويه الزچيه
آه دعتك يالعفتكم مرمي عله الوطيه
راح يم عمه وكل همه مكتوبة الوصية
..........
سيد علي الموسوي الكربلائي
BY الشاعر سيد علي الموسوي الكربلائي
Share with your friend now:
tgoop.com/alialmoosawe/2730