tgoop.com/alialmoosawe/2739
Last Update:
يعباس يالله حظر رايتك
بعباس گوم اصنع خيمتك
يالله يابو الغيره منك رايده تعاهدني
حان وكت البيه ابويه ليمتك سلمني
مثل ما تاخذني كون بچفك ترجعني
خويه يابو الغيره اعرفك والله ما تتركني
يعباس فدوه اروح ليمنتك 1
اعرف اطباعك يخويه اني المربيتك
وتكبر بعيني واشوفك وشكثر تانيتك
واذكر بيوم الحملتك وبالحضن خليتك
واني من يوم الي شفتك يالوفي سميتك
يعباس من الطفوله شيمتك 2
غالي عندي واغله مني واشم بيك أنفاسي
بيك اشوف دوم ابويه وبيك أحس احساسي
ما أذكرك يا بو فاضل واعتقد ما ناسي
رايتك لو ودعتني راح أشدها براسي
يعباس بيدي الزم جربتك 3
انه اعرفك بالكلايف غظب الله بسيفك
واحد انته كبال عسكر والعدد ميخيفك
ما تشيلك كاع والله لو فزعت لحيفك
تقبض أرواح وتذلها الموت صار بكيفك
يعباس بدت خويه ساعتك 4
شفتك بوسط الحرايب عالجثث تتبختر
يندم اليدناك والله عليك ياهو اليكدر
والعده احتارت تنادي رد علينه حيدر
والأرض بدموم غرگت صار يوم المحشر
يعباس كلها هابت هيبتك 5
هالعده تنادي دخيلك لمن يشوفونك
الدنيا كلها اتصير حمره بخزره من عيونك
تغير ألوان الطفوف وما تغير لونك
ما تعب زندك واشوف اعداك ميهمونك
يعباس ما تثني بضربتك 6
لو رحت يالغالي ارجع هيبتي بوجودك
عيني مشبوحه عليك ورايتك وزنودك
يا شهم رد للمخيم يالوفيت وعودك
هلشمر يتمنه بعدك يدنه يم حدودك
يعباس الحرم كلها بذمتك 7
خايفه عليك برحيلك ما ترد لخيامك
وعالنهر توگع صريع أبين جور أيامك
يوصلك لو تهوه جثه رماد حرگ خيامك
وما اضن تفزع إليه گوه مابجدامك
يعباس صعب أشاهد حالتك 8
تمت
خادمكم سيد علي الموسوي الكربلائي
BY الشاعر سيد علي الموسوي الكربلائي
Share with your friend now:
tgoop.com/alialmoosawe/2739