tgoop.com/alialmoosawe/9994
Last Update:
إبليلة الجمعه .. تحظر البضعه إبدمعها
……….
فاطمه ابليلة الجمعه تحظر اتأدي الزيارة
تمشي محنيه وگلبها مسعره و ما تطفه ناره
الباب گبر حسين توصل وبالدمع تكتب عباره
اهنانه الملاذ امن المحن
وكل الشدايد ينگضن
تدخل الزهره وبالصحن
وتنظر الكبه و مناره
وتدعي منكسره .. فاطمه الزهره .. بدمعها
والنظر يشبح .. الكبره والمذبح .. ابدمعها
……….
وتوصل الشباچ ابنها تون والحسره شديده
تقره عاشوراء ومنظر ليلة العاشر تعيده
ربي العنها العصابه السحكته وحزت وريده
تشوف ابضريحه چن صور
چن شمر و يحز بالنحر
وبصوره چن محني الظهر
و يون من فارگ عضيده
و تلمح الشفه .. امفطره وسفه .. بدمعها
ومنظر اليفجع .. جسمه المكطع .. ابدمعها
……….
تمشي والخطوات تثكل وتجر بالانفاس گوه
اتوجهت صوب الكفاله والجدم مابيه گوه
وصلت ويم گمر هاشم بالدمع والحزن تهوه
وتكله يالما قصرت
وفيت عهدك وبذلت
وباب الحوائج أصبحت
وهالاسم يوليدي يسوه
وتبجي عالرايه .. و جربته ومايه .. بدمعها
وتوصل الچفه .. بحرگه وبلهفه .. ابدمعها
……….
ترد وتزور المخيم والحزن خيم عليها
وتذكر اشلون العقليه حايره بضيعة وليها
ويلي والصيوان يلهب وزينب اتشاگف بديها
وچم طفله فرت وانچوت
والحرم ويلي اتحيرت
والحره تالي ايست
وجهزو ناگة سبيها
وتمشي عالهزل .. بت علي بمحمل .. بدمعها
تنادي يالكافل .. ها يبو فاضل ابدمعها
……….
فاطمه ابآخر زياره تكصد لغيبة ابنها
وتعتني وتلزم ضلعها وما فتر بالحزن ونها
اتگله يالمهدي اريد الشيعه يتكحل جفنها
يا يوم يا ساعه الأمر
كل ليله بغيابك تمر
ابكل لحظه ضلعي ينكسر
وشيعتك زادت محنها
الأمه تترجه .. وتندب الحجه .. بدمعها
وفاطم اليله .. ابونه تشكيله. ابدمعها
……….
سيد علي الموسوي الكربلائي
BY الشاعر سيد علي الموسوي الكربلائي
Share with your friend now:
tgoop.com/alialmoosawe/9994