tgoop.com/alitajali/640
Last Update:
استعداد ..كل المواكب تستعد
استعداد...شدو حزمكم ياولد
هذا رزقنا بكل عام...رفعو شعار الخدام
استعداد
___
بهمه شيلوهه ونصبوهه بالغيره الخيم
جتنا مشايه وفايه وبجفهه العلم
اتحظر بمايك وبچايك وتلگه الزلم
بالغيره يله اتحزمو وبسم الحسين اتوكلو
صيحو هلا وتفضلو.. حياكم الله
درب المشي درب العشق ....لو دورت غرب وشرق
ماكو مثل هذا رزق بي نعمه الله
شدو العزم..وخلوهه تشهد كربله
شدو العزم..صيحو هلا وميت هلا
وعيونكم لا متنام..رفعو شعار الخدام
.............................................
اتحظر بروحك وجروحك سجل موقفك
وانت ابو الغيره والديره خادم عرفتك
خادم حسينك وبعينك شايل خدمتك
افرش دربهم بالهله ..مايك واكلك سبله
المايرضه ينزل نزله.. ضيف بخيمكم
جتف بجتف وتكاتفو.. ياغيره يلكلكم كفو
بالدنيا يلحكم منو.. ويوصل كرمكم
للحسين .. هالخدمه بالدم انحيت
للحسين.. غصباً عليها المارضت
بعيون كل الظلام.. رفعو شعار الخدام
................................................
عزب بكلشي لليمشي وكله بخدمتك
تسرح عيوني وضنوني برفة رايتك
خيمتي اجفيهه واطفيهه لو ماشالتك
الخيمه لو ماكفتك..افرش عيوني بخدمتك
بنص كلبي تصبح بييتك.. وبنص العيون
هذا عهد عندي ونذر.. وماينقبل بيه العذر
لخدام ابو اليمه جسر.. گلبي ويعبرون
مد سفرتك.. للزاير الكاصد مشي
مد سفرتك.. معزب وضيفك منتجي
وتحزمو لهاي حزام.. رفعو شعار الخدام
.....................................................
حتى شايبنه واكبنه بالزود انعرف
هاي غاجيته وعوجيته ذباهه ووكف
واكف ينادي اولادي هالخدمه شرف
الوصلت سنينه التسعين.. بالخدمه شو رد عشرين
رايد يوفي وي حسين.. لاخر عمر
شدها جفيته حزام.. واكف بنص الخدام
مو عالصدر دك الهام.. لام الخدر
راجع شاب.. ماهمه كل هذا التعب
راجع شاب.. چن عمره لحسين انكتب
بالمجلس اول لطام.. رفعو شعار الخدام
.................................................
هذا ضل عهدي وللمهدي شايل رايتي
عاهدت روحي وبجروحي باقي بخدمتي
مااكف نوحي لمذبوحي ناذر دمعتي
بدنينا حبيت اثنين.. الخدمه ودموع العين
هذا غرامي وي حسين.. من الصغر
بس خدمته أطيب الروح.. مذبوح وابجي المذبوح
أبالي عايش ميروح.. طول العمر
عشكاناه.. عشك النوارس للبحر
عشكاناه.. من النحر حد نحر
يمه الگلب جن وهام... رفعو شعار الخدام
.................................................
✍️. ابو منتظر الحريشاوي
BY الشاعر ابو منتظر الحريشاوي
Share with your friend now:
tgoop.com/alitajali/640