tgoop.com/alitajali/645
Last Update:
يحسين وداعة روحك … سالوفة كلبي جروحك
عاشن بيه وعشت وياهن … شما فكيت عيوني الگاهن
............................................................
اتاملك .. واتخيلك .... بحر من الاحزان
عطشان الك .. وارد اوصلك... وادري انت عطشان
كالو حبيبك منذبح بس انه احاجيك
و تسمعني اعرف سيدي لو سولف عليك
مثل الهوة للمختنك هيج اني احس بيك
مرات اشوفنك ضوة … ومرات اشم بيك الهوه
ولمن تجور الدنيا وياي … باب الله اشوفه بنينوه
يالتفهم كلش روحي … ما اسولف عن جروحي
بس جروحك ما انساهن… شما فكيت عيوني الكاهن
.............................................
كلما اعد .. ارجع اعد … اجروحك هواي
من النحر .. من الظهر … من ياهي مولاي
ماشفتك بهاي اسمعت چم طعنه مطعون
وشكم نبل بيك ارتمه ترسمهة العيون
وشکم نذل صاعد فرس فوگك يسحكون
وارجع وارد اتصورك … بالحومه كطعو منحرك
والمحبس الما ينزع …. نزعوه هو خنصرك
ياهو اليتحمل غيرك …. على الكاع اطشر خيرك
اجزائك ياهو الماهن … شما فكيت عيوني الگاهن
.........................................
حزنك كلف .. ما ينوصف … واتعده الحدود
فوك النهر .. عندك گمر … مكطوع الزنود
من طاح اخيك عالنهر كضيت الصفاح
كل حيلك وذاك العزم وي الكمر طاح
و زحت العمود من الخيم ستر الخيم راح
كلك حزن من ارجعت …. كل خطوة بيهة تشاهدت
مكسور ضهرك سيدي … واكف عجيبة وما طحت
واسمع بالونه احساسك … تبجي بحسره لعباسك
جفين عالشط خلاهن … شما فكيت عيوني الكاهن
...................................................
حرگ الخيم … طيحت علم … ومراكض عيال
راس انكطع … فوك ارتفع … ويشاهد احبال
ربطو حرايركم زلم وعيونك تشوف
وخلو عليل على الهزل وچماله مجتوف
ومدللاتك بالفله وكاتلهن الخوف
اليتسمن باسم النبي … طلعن اسيرات بسبي
والكاسر كليبك جرح … يحدي بضعنهن اجنبي
وذباحك بالهم سابيهن من ديره لديره يفر بيهن
والمايوصلهن سباهن شما فكيت عيوني الكاهن
...............................
كلشي انتهه .. ويمك بده .. عنوان الجروح
تبجي السمه .. واهل السمه… لاجلك يمذبوح
گطره ابحر هاي الخلك شما شافت الآم
جرحك نزف ما ينگطع بعيون الايام
معزب لحد اخر نفس صدرك للسهام
طبعك مثل طبع الورد.. كلش كريم و ما ترد
حتى السهم كتله هله … و وکلته من ذاك الچبد
لو اسولف عن حنيتك شكتبلك ما وفيتك
اكتب وابچي شما اقراهن .. شما فكيت عيوني الكاهن
........................................
✍️ ابو منتظر الحريشاوي
BY الشاعر ابو منتظر الحريشاوي
Share with your friend now:
tgoop.com/alitajali/645