tgoop.com/alitajali/659
Last Update:
يالرايحه وعفتيني مل الدمع من عيني
بيمن يداوي جروحه الفارك عزيزه روحه
يا زهرتي حاجيني
……………
يالرايحه وعفتي جرح بكليبي تلهب ناره
بالدنيا احس كلشي وكف بس دمعتــي تجاره
شحال اليطب بيته ولكَه محبوبه ماكو بداره
يالرحتي ماكَلتي شعجب محبوبي شنهو اخباره
كَلب التعوفه أحبابه يموت ويدكَه بابه
يغفه على ونته ونوحه الفارك عزيزه روحه
يا زهرتي حاجيني
..............
اذكرهن ايام المضن وياج يا محلاهن
انسه انا كلشي مستعد بس هنه ما انساهن
تاهن سوالفنه ومشن كَليلي وين الكَاهن
صرت انا ادور رويحتي يمكن ضعت وياهن
ياروحي ضاعت روحي بين الصور وجروحي
يادمعته المفضوحه. الفارك عزيزه روحه
يا زهرتي حاجيني
.............................
اشتاكلج غصبن عليه وامشي بدمعتي لكبرج
مثل الطفل ابجي واون محيرني كلش امرج
صح ميته بس هذا الكَلب ليهسه شو ينتظرج
يا فاطمه ذابل علي بعدج وداعت عمرج
يا زهرتي وكل حيلي. مانمت بعدج ليلي
بس دمعته مسموحه الفارك عزيزه روحه
يا زهرتي حاجيني
...........................
يا فاطمة خلصت بعد عشرتنه ذيج الحلوه
وهذا العمر ها يم حسن ضاع وبعد مايسوه
بجفني الدمع وي السهر صار بغيابج سلوه
تدرينه كَلبي كل بشر غيرج ابد مايهوه
يا فاطمه حاجيني. شتنفع بلاج سنيني
المن الضيم يبوحه. الفارك عزيزه روحه
يا زهرتي حاجيني
............................
هذا حالي بغيبتچ يبچي الصخر ياحالي
يا فاطمة يموت البشر لو بيده يدفن غالي
مو انتي هاي بالكَبر مدفونه راحه بالي
من يوم رحتي وداعتج بس الحزن يبرالي
يا فاطمه وغيابچ ياكل بروح احبابچ
جثه وتضل مطروحه الفارك عزيزه روحه
يا زهرتي حاجيني
.......................
ابو منتظر الحريشاوي
BY الشاعر ابو منتظر الحريشاوي
Share with your friend now:
tgoop.com/alitajali/659