tgoop.com/almadany83/3570
Last Update:
دفن الاجساد الطاهره
رجع راعي المصيبه .. اجه يدفن حبيبه
گـعـد يـمّـه وتـدنّـه .. لـگـه الجثه سليبه
وحـيـد بلا عشيره .. يلاهي والله حيره
ابوي شلون ادفنه .. واجمعه بياحصيره
******
وصل زين العباد وسـيـد الناس
رجـع يـدفـن ابـوه وعمه عباس
العليل بياعلي يسحبهه الانفاس
لگه الجثه سليبه ومالگه الراس
...................
ابوي شلون اجمعه .. واثر حافر بضلعه
بچه وطاح على وجهه .. لگه مبتور اصبعه
الوجه عنه يديره .. يجر حسره چبيره
ابوي شلون ادفنه .. واجمعه بياحصيره
******
وگف والعين تجري وحيل محتار
يـنـاظـر جـسـم ابـوه بـكـل الاكتار
الخـيـل الداسـتـه مسوياته طشّار
وذر ويلـمـهـه بـيـش صـغـار وكبار
....................
وحيد وتجري عينه .. ويساره يطگ يمينه
عليل وحـيـل مابي .. ويـريـد اللي يعينه
علي منهو اليشيره .. مشت زينب اسيره
ابوي شلون ادفنه .. واجمعه بياحصيره
******
علي تعبان حيل وگوّه يرمش
بيش يلم ابوه وشنهو يفرش
مو ماي على گبر الوالد يرش
چان دموع فوگ الوالد يطش
...................
ضامي ودفن ضامي .. وحيد بلا محامي
وگف وايده على ظهره .. گلبي وياك دامي
لگه الوصله الاخيره .. خنصر لابو الغيره
ابوي شلون ادفنه .. واجمعه بياحصيره
******
نـزل بالـگـبـر يـمـه وچـان وحده
وجـاب تـراب لـكـن مـاكـو خدّه
سـمـع من الـنـحـر صـوت الموده
عبد الله على صدري بهيده وسده
....................
جاب الطفل بيده .. السهم ذابح وريده
على صدره يوسده .. هـذا اللي تـريده
صبح صدره سريره .. الدنيا شگد مريره
ابوي شلون ادفنه .. واجمعه بياحصيره
******
دفنه روحه على روحه وهال التراب
شحال الماتوا اهله ويدفن احباب
توجه علي بلوعه لدفن الاصحاب
الله يــســاعـده واحــبـابــه غيّاب
...................
دفن اهله وعمامه .. ودفن اهل الشهامه
ماقـصـرتـوا شكراً .. بأمان الله وسلامه
بچه واسس شعيره .. وتوارثناهه سيره
ابوي شلون ادفنه .. واجمعه بياحصيره
******
تـوجـه للـفرات شـكـبـره همّه
بقى مسك الختام لجسد عمّه
الچفوف مگطّعه وماهنّه يمّه
تـمـدد يـمّـه وبــنـحـره يشمّه
..................
لطم صدره على موده .. لگه مذبوح جوده
يعمي شلون ادفنك .. علي يقبّل زنوده
الگبر شنهو مصيره .. صغير وانت ديره
ابوي شلون ادفنه .. واجمعه بياحصيره
******
سيد علي المدني
BY شاعر اهل البيت السيد علي المدني
Share with your friend now:
tgoop.com/almadany83/3570