tgoop.com/almadany83/3574
Last Update:
رد الألـم شفت الهـلال العالي
نار الخيم مافـارگـت خيالي
رد الحزن عليه .. واتذكرت رقيه
مافـارگـت خيالي..مافـارگـت خيالي
******
رد الشهر .. واذكر گمر .. يم النهر مغيبه
غاب الضوه..خنگه الهوه.. واليبعد شيجيبه
يافاطمه..ظلمه السمه.. من حلّت المصيبه
صوت استمع.. من الضلع..يازينب الغريبة
...........................
شهر الحزن معروف يامحرم
ظليت اون من اذكر المخيم
مچويه ليش اديه .. واتذكرت رقيه
مافـارگـت خيالي..مافـارگـت خيالي
******
لمَّن يهل..اذكر طفل..مذبوح وي حياتي
صحت بهضم..وين الزلم..حرگو طرف عباتي
والخيل اجت..ليه اعتنت..صارت ركض صلاتي
شردن ركض..طول وعرض..من عاينت خواتي
.................
حيهم صحت زينب غدت وحيده
گمت وطحت والمشرعه بعيده
كل واحد بنويه.. واتذكرت رقيه
مافـارگـت خيالي..مافـارگـت خيالي
******
يلچم جرح..جايب رمح..والراس فوگ اشوفه
ينظر الي .. بويه علي .. معقولة راح اعوفه
واذكر بعد .. راعي الوعد.. من گطّعو چفوفه
حط رايته.. يم جربته..كعبه ونهر يطوفه
....................
محني الظهر اذكر حسين اجاني
طاح الگمر ماعندي غيره ثاني
جايب چفوف اخيه .. واتذكرت رقيه
مافـارگـت خيالي..مافـارگـت خيالي
******
ياكربله .. چف حرمله .. لمّن ذبح رضيعه
جابه ويون ..هاچ الابن .. مذبوح يالوديعه
صدري اختنگ..گلبي احترگ..من اذكر الشريعه
واذكر حچي .. نوح وبچي .. واتذكر الفجيعه
...................
بنت النبي ظلت وحيده بحيره
فشله انسبي وآني الچنت اميره
صاحولي ياسبيه .. واتذكرت رقيه
مافـارگـت خيالي..مافـارگـت خيالي
******
شفت الشمس..كسفت امس..شمر اعتله على صدره
فوگ العطش..طگه اثنعش..وبسيفه حزله نحره
خيل وبشر.. حفروا نهر..من داسو على ظهره
رد سلّبه.. من خضّبه.. خنصر غده يبتره
....................
وبعاشرك سلبو تراچي بنته
اتذكرك يسطر رقيه شفته
ياعمه الحگي اليه.. واتذكرت رقيه
مافـارگـت خيالي..مافـارگـت خيالي
******
بس النسه .. ذاك المسه .. للشام من خذونه
وشگد صعب.. بس الغرب.. ياخويه رافگونه
سوط وحبل..وعلى الهزل.. ياوسفه من سبونه
بارض العده.. حزني ابتده.. شبث وشمر ولونه
................
ماتت وسف طفله على راس ابوهه
كلشي اختلف زينب يموت اخوهه
وزغيره عالمنيه .. واتذكرت رقيه
مافـارگـت خيالي..مافـارگـت خيالي
******
سيد علي المدني
BY شاعر اهل البيت السيد علي المدني
Share with your friend now:
tgoop.com/almadany83/3574