tgoop.com/alomajya/15481
Last Update:
في مشهد من فيلم Frida
كان فيه (فريدا) وحبيبها (ديجو) أول مرة علاقتهم تاخد مرحلة تانية أو توصل يعني إنهم يكونوا مع بعض في نفس البيت
فريدا بحكم حالتها الصحية والحادثة البشعة اللي حصلتلها كان جسمها فيه أثار خياطة وعمليات .. فـ خافت لو حبيبها شاف المنظر ده ينفر منها أو يتضايق من شكلها وقبل أي حاجة تحصل بينهم .. قالتله "i have a scar" أو (أنا عندي جرح) وكشفتله الجرح قدامه
كان رد فعل (ديجو) إنه دقق في أثر الخياطة لثواني وبعدين قالها "you're perfect" (أنتي مثالية)
في اللحظة اللي بين كشفها للجرح وبين رد فعل ديجو .. ملامح فريدا كلها كانت بتعبر عن قلبها اللي بيترعش من الخوف من رد الفعل السلبي .. لكن لما الرد جه عكس توقعها فرحت زي الأطفال بالظبط
الفكرة المقصودة من المشهد كانت على لسان مخرجة الفيلم (جوليا تيمور): اللي قالت إن كل حد فينا عنده (علامة منفرة) سواء جسدية فـ هتبقى ظاهرة أو نفسية فـ مش ظاهرة وبتفضل سر لحد ما تقرر تحكيها وتكشف عنها للي الشخص اللي بتحبه .. وأكتر شيء ممكن يسعدك ويحسسك بالأمان لما الشخص التاني بيكون رد فعله إيجابي ومش بيشمئز من السر ده على عكس كل الناس
(إنك تكشف وجهك القبيح قدام اللي بتحبه ورغم كده مايحسش بإشمئزاز أو خوف)!
وده اللي خلى فريدا تحب ديجو حب ماتكررش لأنه قبلها زي ما هي .. بجروحها وتشوهاتها اللي هي نفسها كرهتها لكن هو ماكرهّاش .. علشان كده كانت بتقوله طول الوقت
"i love you more than my own skin"
(أنا بحبك أكتر من جلدي نفسه) <3
BY هل ترانا نلتقي ..❤️
Share with your friend now:
tgoop.com/alomajya/15481