tgoop.com/alshuhadaaltafu70/3342
Last Update:
عند خروج الامام الحسين ع من المدينه الى كربلاء ماذا قالت سيدتنا فاطمه العليله الى الحسين ع
---------------------------------------------------
لاتسافر . ابدارك تخلي عليله
لاتسافر ..روحتك بويه ثگيله
لاتسافر… لاتسافر
*
خل اسولفلك يبويه شوف يالغالي ونيني
بويه لاتبتعد عني الخاطر ادموعي البعيني
لاتروح وهذا حالي تذبح افراحي وسنيني
ارجع بهذا قرارك جارح ويجرح حنيني
لاتسافر ..مرضي بويه مالي حيله
لاتسافر. تترك ابدارك عليله
*
انهظم بويه وعاين ليش ماتنشد يغالي
ماتكلي بويه گومي ليش بس هذا سؤالي
وانه بالسكته احظر جهزت بويه احوالي
شو صحتهم بويه كلهم وماگلت بويه تعالي
لاتسافر. تگول سفرتته طويله
لاتسافر. تترك بدارك عليله
**
بويه يا كل امنياتي وكلها احلامي الزهيه
بويه ما احمل قرارك تعوفني هاي المسيه
سفرتك اعرف طويله ودري مامنعدها جيه
صعبه صعبه وحيل صعبه الابو يترك بنيه
لاتسافر . خلي عمتنه العقيله
لاتسافر . تترك ابدارك عليله
البيه مرض نعرف يبويه كون وياه اليعينه
مايتركونه يعاني سلوته بوحده بونينه
تروح بويه بس اگلك خذت عمري وكل سنينه
يعني بويه هايهيه تروح بويه وماتجينه
لاتسافر . منهو بعدك اشتكيله
لاتسافر . تترك ابدارك عليله
سفرتك بويه تاذي اعرف شگد راح اعاني
بويه راح ابقه اعله بابك العمر كله اتاني
وما اضن بويه اعيشن راح اموتن بويه اني
شنهو ضلتي ياحبيبي والحزن ضيع الواني
لاتسافر . الحزن تارس شليله
لاتسافر .تترك ابدارك عليله
*
وياك خليني يبويه بالدرب لا ما اتعبك
بويه ارويك بدمعتي لو عطشت انه اشربك
ضلعي خليه اعله ضلعك لو اجت خيل وتسحگك
بويه احسبني عبايه من الشمس احميها جثتك
لاتسافر. بويه مهظومه ونحيله
لاتسافر . تترك ابدارك عليله
*
خادمه اهل البيت
امل فلوحي الموسوي
اسألكم الدعاء
والرحمه لوالدي
◾️◾️◾️◾️◾️◾️◾️◾️◾️◾️◾️◾️
https://www.tgoop.com/alshuhadaaltafu70
BY قناة رثاء شاعرات في رحاب الحسين ع
Share with your friend now:
tgoop.com/alshuhadaaltafu70/3342