tgoop.com/amalbanean/12549
Last Update:
😭 نخوه وتوسل بقاضية الحاجات سيدتي أم البنين 😭
بطور : عريس الولد جابوه يتچوله
( اجيتج يـ الوفيه الليله عنَّـايه
واحلفج بالعقيله وحامل الرايه )
وقفت اليوم يم بابك اون وانحب
احلفنج اجيت بخدر المسلب
يم عباس سمحي لي اريد اطلب
صعبه حاجتي و انتي اعلم بهايه
( اجيتج يالوفيه الليله عنايه
واحلفج بالعقيله وحامل الرايه )
…………..
بالعباس احلفج حاجتي اقضيها
طالت شدتي و انتي التفرجيها
حاشه الـ تقصدچ انتي تخيبيها
معروفه كريمه ودوم عطايه
( اجيتج يالوفيه الليله عنايه
واحلفج بالعقيله وحامل الرايه )
…………
يم لـبنين اجيت انخـاج بالزهره
وباللي ظل طريح وعاري عالغبره
نظره ادخيل مولاتي ردت نظره
و اللي تنظرينه ايحصل الغايه
( اجيتج يالوفيه الليله عنايه
واحلفج بالعقيله وحامل الرايه )
……………
احلفنَّج اجيت بنحر ابو اليمه
وبالظلت تنوح وتنتـحب يمه
اريـد اتوفقيني دوم للخـدمه
واتعنى الضريح حسين مشايه
……………
( اجيتج يالوفيه الليله عنايه
واحلفج بالعقيله وحامل الرايه )
………….
يا ام عباس صعبه حالتي صعبه
يا نعم الوسيله رايـده طلبه
كل محزون انتي الـ تجبري قلبه
وماخاب التعنى لچ يا وفايه
( اجيتج يالوفيه الليله عنايه
واحلفج بالعقيله وحامل الرايه )
…………
يا أم البطل يا مقصد الوفاد
جاتچ هالجماعه ورايده المراد
وكم واحد مريض و لا علاجه فاد
يصرخلج دخيلج رايد ادوايه
( اجيتج يالوفيه الليله عنايه
واحلفج بالعقيله وحامل الرايه )
…………
سلمنا الحوايج بين چفينچ
وكم حاجه تراهي بيني وبينج
ادري تنقضي من ترفعي ايمينچ
تنحل بالعجل من اعقد الرايه
( اجيتج يالوفيه الليله عنايه
واحلفج بالعقيله وحامل الرايه )
……………….
تمت بحمدالله وتوفيقه ونسألكم الدعاء لتعجيل فرج صاحب العصر والزمان ولشفاء المرضى وقضاء الحوائج ونسأل الله القبول والمدد شفاء نينوى بنت زينب وكل مريض والفرج وفك اسر حسن ولد لميعه وكل مسجون وهدايتهم العيال والمومنين والمومنان ورزق والمحبه.
✍🏻القصيدة من تأليف خادمة الزهراء : سكينه صالح البطي
BY يااام البنين
Share with your friend now:
tgoop.com/amalbanean/12549