روحي طير وعايشه بالغاضريه
شلون هسه وكرّبت مني المنيه
و آنه بديار الغرب
عيني ظلت عالدرب
اخواني بلكت هالمسه يمرون بيه
. . . . . . . . . . . . . . .

آنه زينب . والهظيمه . من كرب مني الاجل
بدار غربة . ولا اخوتي . منهم الطارش وصل
انتظرهم . بالثواني . والدمع عالخد همل
حسره بيه . من بعدهم . وانكطع خيط الأمل

علكت عيني بدربهم والدمع هل
وبطريق الغاضريه الروح تسأل
اسأل ودمعي يصب
عيني ظلت عالدرب
اخواني بلكت هالمسه يمرون بيه
. . . . . . . . . . . . . . .

ذكرياتي . من اخوتي . جمره تسعر بالكلب
ما تمرني . لحظه وحده . دمعي ما يجري ويصب
الغاضريه . بيها حيلي . طاح دامي اعله الترب
والاشد من . كيدوني . وكمت بسياط انظرب

آنه بنت المصطفى بس مارعوني
يسروني وكيدوني وشتموني
آنه بت من وانضرب ؟
عيني ظلت عالدرب
اخواني بلكت هالمسه يمرون بيه
. . . . . . . . . . . . . . .

فاركتهم . وانتظرهم . كبل موتي مره بس
يمهم اكعد . واحجي كلشي . كبل لاودع النفس
من الطفوله . ما عفتهم . صبح وي طلعت شمس
همه جانوا . ضي عيوني . وانطفه بعيني الأمس

بعيني ظلمه الدنيا لمن فاركوني
وهسه كربت ساعتي وهم ما اجوني
الانتظار شكد صعب
عيني ظلت عالدرب
اخواني بلكت هالمسه يمرون بيه
. . . . . . . . . . . . . . .

الكوفه ظلت . جمره بيه . وآنه ام طبع الأبي
الجانت ارضي . وأرض ابويه . هسه ادخلها سبي
وآنه زينب . سورة العز . آنه والمصحف ابي
يشتموني . يضربوني . مارعوا جدي النبي

مارعوا كدر النبي بحرمة بناته
وكلبي يتعثر ابنبضة مستحاته
ابّين نبضات الكلب
عيني ظلت عالدرب
اخواني بلكت هالمسه يمرون بيه
. . . . . . . . . . . . . . .

الشام غربة . وخارجيه . كاموا يصيحون الي
وآنه ما بين . الهضيمه . ورهبة اندب يا علي
وين ولدي . ما اجوني . وين خواني وهلي
وللزجيه . امي اندب . بيها كل هم ينجلي

أبالي ظلت ذكريات امي الحنينه
والمصيبتها عشت عمري حزينه
وياها جنت بكل خطب
عيني ظلت عالدرب
اخواني بلكت هالمسه يمرون بيه
. . . . . . . . . . . . . . .

موتي راحه . من عذابي . ومن همومي وكل الم
بلكت انسى . لوعة الطف . وقصتي بحرك الخيم
ساعة اغمض . بيها عيني . يبقى دمعي اللي انسجم
فوك خدي . صورة راسم . نحر وجفوف وعلم

سنين اتنطر تجي ساعة مماتي
تخلص سنين المحن وبدأ حياتي
ويطفه كلبي المنعطب
عيني ظلت عالدرب
اخواني بلكت هالمسه يمرون بيه
. . . . . . . . . . . . . . .

خادم اهل البيت عليهم السلام
عمار العيساوي الكربلائي

#گعدة_للسيدة_زينب_عليها السلام

اخت الكواكب بنت البدور
انتي امتداد اليوم عاشور
انتي العقيلة الفاطمية
ياريحة من الغاضريه
انتي امتداد اليوم عاشور
 . . . . . . . . . . . . . . . . .

طالعت تاريخ عمرج بين صفحات النوايب
شفتج ابكل سطر دمعه معاشره عيون المصايب
شفتج بيوم الزجيه گلبج اعله الباب ذايب
يازينب انتي امن الزغر
شاهدتي بسمار الصدر
فاطمة مغذيتج صبر ... صبر لوداع الحبايب

بس يا صبر يحمل الصدرين
صدر الزجيه وصدر الحسين
يا صبر يحمل هالرزيه
ياريحة من الغاضريه
انتي امتداد اليوم عاشور
 . . . . . . . . . . . . . . . . .

ابلاية ام عشتي يتيمة وحيدر اتكفل رباتج
وجان ابوج ابكل مسية ايشاركج هم نايباتج
واقتضى المقدور طبره ابسجدته اتفزز صلاتج
وعصر الحسن عصر الفتن
شاركتي اخوج ابهالمحن
من حيدره السم الحسن ... شفتي جم غصه ابحياتج

قصتج كضت يوم أشد من يوم
من شفتي اخوج الحسن مسموم
وبدموعه كاتب لج وصيه
ياريحة من الغاضريه
انتي امتداد اليوم عاشور
 . . . . . . . . . . . . . . . . . .

مصيبتج بالطف يزينب ما مثلها اعله الوطية
ذبحة حسين وبنينه وإخوته وصحبه سوية
وكفتج جانت عظيمة فوك تل الزينبية
يبن امي صحتي اشيتضخ
احسبها من غير الذبح
الف وتسع مية جرح ... غير رض الاعوجية

غير العطش من غير الوداع
وبس دمعج الدرب السبي امتاع
اشسببلج الخنصر اذيه
ياريحة من الغاضريه
انتي امتداد اليوم عاشور
 . . . . . . . . . . . . . . . . . .

لليسر رحتي يزينب واليسر ترعب صفاته
وانتي تدرين بطريقج حافه عيون الشماته
بين عثره وعثره ضامي امن العطش يبست لهاته
بديوان ظلام والوكت
ما جان ابد دمعج يكت
بس امن اجه الراس ابطشت ... وشفتي بعيونج صفاته

الراس ابطشت من شفتي خلاه
وبالخيزرانه يظرب اشفاه
بيج ايتشمت جي سبيه
ياريحة من الغاضريه
انتي امتداد اليوم عاشور
 . . . . . . . . . . . . . . . . .

التمت اهمومج يزينب طير وتحوم اعله راسج
وانتي بفراش المنيه وين اهلج وين ناسج
اشحالج وانتي غريبه يا وصف يوصف احساسج
وشكثر هالموقف صعب
تموتين بديار الغرب
مرسوم بالدمع اليصب ... ثوب صبرج مو مقاسج

يا زينب ولاذ الصبر بيج
واني ادري بالغربة تأذيج
اختاريتي موتج يم رقيه
ياريحة من الغاضريه
انتي امتداد اليوم عاشور
 . . . . . . . . . . . . . . . . .


خادم أهل البيت عليهم السلام
 عمار العيساوي الكربلائي

#ولادة_الامام_الحسن ع


هذا الضوه منين ؟ من بيت الوصي
نور الرسالة الأحمدية .. ابيت الزجيه
. . . . . . . . . . . . . . . . .

شلون مصباح ايتلاله نور اركان الوسيعه
بي صفات النبي الهادي وفرّح اكليب الوديعه
بي صفات الكرم كلها وتنتصر بيه الطليعه
نوره انتشر ارض وفضا
وانفاسه طيب وموعضه
وجهه بسمار المرتضى .. ونفس نظراته البديعه

النسبة جماله يوسف ما وصل
اتخيل . اجه من الله هديه .. ابيت الزجيه
. . . . . . . . . . . . . . . . .

الباري للزهره هداها وشوف شنطاها هديه
زينة الدنيا البنون وبالحسن دنيا زهيه
شلون مولود وصفاته ميزه عن كل البريه
الخالق انطاها اهديته
سيد شباب الجنته
وعالارض نوره ورحمته .. وحطها بيدين الزجيه

ابتسمت المشكاة ومصباح الضوه
ضوّه الثره وضوّه الثريه .. ابيت الزجيه
. . . . . . . . . . . . . . . . .

فرّح كلوب التوالي حيدر ابطلّت ضياءه
وللشرك منتكسه رايه انكسرت ابشوفة بهاءه
وللكرم مشعل توكّد وصار لمضيفه انتماءه
واشتهر حاتم بالزمن
لو ردت اقارن بالثمن
صينيه بمضيف الحسن .. وما يصل خيط ابرداءه

اصل الكرم وين بمضيف الحسن
سفرة مضيفه الهاشميه .. ابيت الزجيه
. . . . . . . . . . . . . . . . .

استبشر القدس ابوجوده وفرحت عيونه الحزينه
ومكه مبتشره تخلي فوك بيت الله زينه
وصارت اعله الارض كلها بيه تتباها المدينه
وصوت البقيع امن اعتله
ابجيت الحسن مية هلا
وقدمت تهاني كربله .. للوصي وبضعة نبينه
وقّع الميثاق من جود وكرم
اصل الكرم عنده سجيه .. ابيت الزجيه
. . . . . . . . . . . . . . . . .


خادم اهل البيت عليهم السلام
عمار العيساوي الكربلائي

#استشهاد_الإمام_علي ع
لسان حال الامام الحسن ع



ليلة وداعك يا علي ودلالي ذايب
بلحظة رحيلك تبتدي حرب المصايب
يا والدي آنه الحسن .. بين المصايب والفتن
                    دلالي ذايب
        . . . . . . . . . . . . . . . . . . .

لحظة رحيلك يا علي غصه اعله غصه
واهل الفتن يا والدي شافوها فرصه
شرّعوا قانون الحقد وابتده نصه
سيرة علي ما تنذكر للناس قصه

بين حقدهم والغدر واضح طريقه
طاحت مقانع وانكشف وجه الحقيقه
وجوه الحقيقه اتكشفن .. بين المصايب والفتن
                    دلالي ذايب
        . . . . . . . . . . . . . . . . . . .

باجر يذبحون الفجر بي راسك انصاب
وقصة سجودك تنحضر يا داحي الباب
تصدر فتاوى الزيف ويدونولها كتاب
وناس التحبك يا علي ايسمونها ارهاب

حبك فريضه يا علي ويدرون بيها
لكن ضمايرهم حقد صار ايعميها
تدري ضمايرهم عمن .. بين المصايب والفتن
                    دلالي ذايب
        . . . . . . . . . . . . . . . . . . .

سيف الغدر يا ابا الحسن قاطَع صلاتك
بس يبقى صوتك يعتلي من بسملاتك
يترس نواعير العدل مجرى صفاتك
اعدل عداله اعله الارض فترة حياتك

اصحاب الأقلام الاجيره يفرهدونك
حرفوها الالقاب اللي بيها ايلقبونك
القابك امن اتزورن .. بين المصايب والفتن
                    دلالي ذايب
        . . . . . . . . . . . . . . . . . . .

الفاروق الاكبر يا علي يا سيف الإسلام
جف الله انته اعله الكفر يمهدم الاصنام
مَن غيرك ايسويها بفراش النبي اينام
كلب الأسد كلبك ترف من تلتقي ايتام

انته اقلعت باب الحصن والرايه بيدك
كل الملوك الها شرف تصبح عبيدك
يالعشت عمرك بالمحن .. بين المصايب والفتن
                    دلالي ذايب
        . . . . . . . . . . . . . . . . . . .

لحظة رحيلك يا علي من تبتدي ابهم
انظر حبيبت كلبك اتهل الدمع دم
حساسه وانته ياعلي بأحوالها اعلم
الها جنت فوك الشفايف انته مبسم

رحت ورحل عنه الفرح يا حيدر ابعيد
المن بعد يا والدي نستقبل العيد
والعيد شمعاته طفن .. بين المصايب والفتن
                    دلالي ذايب
        . . . . . . . . . . . . . . . . . . .

راحل يبويه ومن تلاكي امي الزجيه
كلها يسبّح بسمج الصبح ومسيه
كللها تحضرني اذا جتني المنيه
وخل تحضر حسين التهشمه الاعوجيه

وانته يحيدر كونك اويه الزهره حاضر
تخفي الطشت عن زينب وتخفي الحوافر
تباري السبايا لو مشن .. بين المصايب والفتن
                    دلالي ذايب
        . . . . . . . . . . . . . . . . . . .


خادم أهل البيت عليهم السلام
عمار العيساوي الكربلائي

#استشهاد_الإمام_علي ع
محاورة بين رأس الحسين ع ورأس الامام علي ع



راس الوصي الراس السبط يتناشد ابمصابه
مابين طبرة وحز نحر ياهو الاشد عذابه
كل واحد اشيشوف .. من غدرت السيوف .. بالامامه
            . . . . . . . . . . . . . . . . .

صوت من نحر الحسين .. الراس امير المؤمنين
يعينك الله اعله المصاب .. من يحمل مصابك
سيف مسموم اللي صاب .. راسك وزاد العذاب
وسم حقدهم اقسه جان .. من شدة اصوابك
تجاوب الطبره بونين .. امصابك اعظم يا حسين
بالحجر من يظربوك .. وتمسحها ابثيابك

آنه انصبت وانت اوكفت لي واخوتك تعينك
ولمن يظربوك ابحجر لا اخوه لا بنينك
وحدك وسط الوف .. من غدرت السيوف .. بالامامه
            . . . . . . . . . . . . . . . . .

طبرتك وكت السجود .. امصيبه وتخذم الجبود
راسك الشايل هموم .. اثكل امن الطبره
تعاين الزينب تنوح .. وعندك تزيد الجروح
الدللتها يعز عليك .. من تهل العبره
الطبرة من تنزف تكول .. انته المصابك مهول
عالرمح راسك يصير .. المخيم تنظره

وتشوفه بالنار احترك واتجوّة اليتامه
اتنخي الجسد بس الجسد خيل اطحنت عظامه
تصد لليتامه خوف .. من غدرت السيوف .. بالامامه
            . . . . . . . . . . . . . . . . .

يكله يا راس الأمير .. يا ملاذ الكل فقير
انظر الأيتام اجوك .. مجتمعه اعله بابك
حين سمعوا بالطبيب .. بالدوه كاتب حليب
عصروا العوز واجوك .. ايتامك احبابك
كوم واتلكه الزغار .. عيونهم بيها اعتذار
كلها تصرخ وين ابوي .. ما تحمل غيابك

عاين يرأس المرتضى بان الحزن عليهم
يم بابك التموا هظم بجّه الصخر بجيهم
تسعي والك تطوف .. من غدرت السيوف .. بالامامه
            . . . . . . . . . . . . . . . . .

براس ابو الحمله جواب .. يكله وانته اعله التراب
من كبل حز الوريد .. تنظر هالقيامه
بين نيران الخيام .. بالحوافر بالسهام
بالسياط وبالحبال .. مجتوفه اليتامه
والشمر تنظر اجاك .. يريد ذبحك من كفاك
اثنعش طبره اعله الوريد .. بغضا بالامامه

آنه ابجرح وانته ابذبح ومسلب العمامه
ونحرك البي ثغر النبي باسه وترك علامه
شكد تعجز الحروف .. من غدرت السيوف .. بالامامه
            . . . . . . . . . . . . . . . . .

امصيبه التبجي السماء .. امصيبتك في كربلاء
عالرمح عينك تشوف .. جاسم يم الاكبر
اموذرين اعله التراب .. وحسره تجذب عالشباب
وتنظر انصارك تشوف .. جم جسم التوذر
والف حسره اعله الفرات .. والجفوف امكطعات
حزام ظهرك من يطيح .. اله ظهرك تكسر

وراسك على رأس الرمح ويعاين السبايا
وتقره الكهف الهن حفظ من نظرة البرايا
واكثر بعد تشوف .. من غدرت السيوف .. بالامامه
            . . . . . . . . . . . . . . . . .


خادم أهل البيت عليهم السلام
عمار العيساوي الكربلائي

لسان حال الامام الحسن ع


صوت الوحي صاح .. حيدر علي طاح
جدمي ثكل وتهدمت من ثكل المصيبه
من البيت للجامع احس كل خطوه الف شيبه
. . . . . . . . . . . . . . .

من اسمعت صوت الوحي حيدر علي اتصوب
ومن سيل دمه وهامته محرابه يتخضب
ماعندي حيل ايعيني وظهري بهظم حدب
ومشيت كل خطوه بعمر راسي بحزن شيّب

امضيف الكرم شال .. واجفيت الدلال
راح الابو ومضيفي ما ظلتله اي هيبه
من البيت للجامع احس كل خطوه الف شيبه
. . . . . . . . . . . . . . .

انه الحسن واروي شجره وي طيحت الوالد
من شح على عيوني الضوه وحيلي صبح بايد
مخنوكه ريتي والهوى عن صدري متباعد
بهالحال واشعر كلبي ويّه الحزن متواعد

وچن الفضا ضاگ .. وي صوت الفراگ
ونصاب كلبي ونشطر بالسيف اليصيبه
من البيت للجامع احس كل خطوه الف شيبه
. . . . . . . . . . . . . . .

امشي اعله راس النايبه والخطوه ميؤوسه
والخطر وي كل خطوه دك بالراس ناقوسه
من اوصلت للجامع وشفت الخلك هوسه
هذا اللي يمسح شيبته وذاك الذي يبوسه

من انظر الناس .. تلطم على الراس
والتمت الايتام كلها ابساعة النيبه
من البيت للجامع احس كل خطوه الف شيبه
. . . . . . . . . . . . . . .

جيت آنه وحسين الاخو واحملنه والدنه
اتوجهنا للبيت والف حسبه اللي تضهدنه
تفكيرنا بزينب اذا اتشوفه على يدنه
انّزله ونسنده وحيدره بهالراي ايدنه

امن ايده سندناه .. ونتماشه وياه
خافن تشوفه زينب وتنصاب بالريبه
من البيت للجامع احس كل خطوه الف شيبه
. . . . . . . . . . . . . . .

ولمن دخلنا الدار زينب شافته امسنّد
نشدتني شنهو الصار جاوب خويه ابو محمد
محتار شحجي الزينب وششرح شقدم رد
وهي ابكلبها نار باب الزهره ما تبرد

وآنه اشرح الصار .. ودموعي مدرار
سمعت علي اتصوب وراحت روحها بغيبه
من البيت للجامع احس كل خطوه الف شيبه
. . . . . . . . . . . . . . .

الساعه الاخيره الحيدر اختص بأهل بيته
زينب حزينه ومحور الداير على اوصيته
راس الابو بآخر وداع الصدري ضميته
ولو بيدي جان اسنين عمري العمره اهديته

وشتنفع سنين .. من دون ابو حسين
لو بيدي اصيرن له جفن وبروحي لفيته
من البيت للجامع احس كل خطوه الف شيبه
. . . . . . . . . . . . . . .


خادم اهل البيت عليهم السلام
عمار العيساوي الكربلائي

شيبٌ خضيبٌ بالدمِ  ... تبكيه ِ حتى الانجُمِ
مُذ خُضِبَ الفجرُ بكى ... فرضُ الصلا حتى عُمي
سجدَ الوجودُ مُذ سجد .. هو ( قل هو الله احد )
               . . . . . . . . . . . . . . . . .

المرتضى شيبة لحيته حين خضبوها بدمه
بالسمه انجمعت مواكب وانزلت من السمه
فاطمه بضعة محمد ويه امه فاطمه
بموكب الأول تصدر والنبي يتقدمه

وامهُ لما بكت ... بالحُزنِ والهمِ حكت
للباري يشكوا دمعها ... قالت له حين شكت
انا فاطمةُ بنتَ اسد .. هو ( قل هو الله احد )
               . . . . . . . . . . . . . . . . .

بت اسد ونّت لابنها و ويه ونها كلشي ون
وبجدار الكعبه اثرهم ويه من سمعها ليها حن
الكعبه مهد الوصي جانت وهي اله اول وطن
وللوصي رادت تودّي استارها الجسمه جفن

قالت لهم سِتُ النسا  ... والدمعُ بالوجنِ رسى
اكفانهُ قد نُسجت ... وفصالها ذاكَ الكسا
ولكم دليلٌ معتقد .. هو ( قل هو الله احد )
               . . . . . . . . . . . . . . . . .

واعتنت بضعة محمد للمصلاية ابدمع
شافت الدم العليها راسم أكثر من وضع
قطره رسمت ايد قنفذ . قطره مكسورة ظلع
وانرسم بسمار بيها والجنين المنصرع

قد علمت مما حصل ... انَ الوصيِ لم يزل
ينعى لفقد فاطمٍ ... من يومها حتى قُتل
وحزنُها فيهِ انعقد .. هو ( قل هو الله احد )
               . . . . . . . . . . . . . . . . .

المصطفى بمحراب حيدر يلهب ابعينه اللضى
ايصبر الزهره ويرد ايواسي ام المرتضى
ابّاله ترسم ذكرياته اويه الوصي في ما مضى
الهادي عكب الباري جان العلي همه ايفضفضه

اخٌ له كانَ علي ... فيهِ الهمومُ تنجلي
وحينَ غابَ المصطفى ... كانَ له نِعمَ الولي
حقٌ لهُ الكل شهد .. هو ( قل هو الله احد )
               . . . . . . . . . . . . . . . . .

الأنبيا موكب اجتي وموكب ابوحده انفرد
بي أولي العزم اعتنوله والدمع عالخد سجد
وعالأرض كل اليتامه منهو يكفلهم بعد
كلها تتمنه تصير الجرح البراسه ضمد

وفي ديارِ حيدره ... ايتامهُ متكدره
وزينبٌ قالت انا ... من بعدهِ متكدره
فكان لي نِعمَ الرَشَد .. هو ( قل هو الله احد )
               . . . . . . . . . . . . . . . . .

زينب وعباس كعدوا والحسن يم الحسين
اتشاركوا هم المصيبه وي هم ام البنين
وطفه قنديل العداله وي امير المؤمنين
ويعتلك بيد ابو صالح اشما قست بينه السنين

و ذو الفقار إذ ثأر ... بيد الإمام المنتظر
ثاراته يبدؤها ... بالظلع ِ من ثمَ النحر
وثار مسموم الكبد .. هو ( قل هو الله احد )
               . . . . . . . . . . . . . . . . .


خادم أهل البيت عليهم السلام
عمار العيساوي الكربلائي

حان الوداع ابين زينب والوصي حيدر
گلها لتجرين الدمع لا ينشف الكوثر
يالدمعتج معصومه
يازينب المهظومه
          . . . . . . . . . . . . .
مصحف الباري علي ومحور سطوره
وزينب الحوراء بنته يعني سوره
صاح زينب حيدره وسلمها دوره
راد بالطف زينب اتجسد حضوره

سلمها هيبة مظهره البي يرهب العسكر
ونهج البلاغة ابكلمه منّه ابّالها اتفسر
ابكلمه الف معلومه
يازينب المهظومه
          . . . . . . . . . . . . .

أي ايگلها عينج لا تهل يبني يبنيتي دمعات
انتي اذا تبجين الج تبجي السماوات
انتي سوره والمواقف بيج آيات
انتي دستور الصبر خط بيج صفحات

معناها دستور الصبر لمن يعد ناسه
بس انتي لازم يعتنيج ومنحني راسه
يل بالصبر مفهومه
يازينب المهظومه
          . . . . . . . . . . . . .

اتگله من اتگلي هيدي تهيج جمره
بويه بخلافك دليلي ابيش اصبره
ابكل ركن بالبيت عندي وياك ذكره
ابطبرتك حيلي تطبّر ميت طبره

ما يگوه حيلي اعله الصبر واعصابي منهاره
فكرة وداعك ياعلي اتوج بالكلب ناره
نار التظل مظرومه
يازينب المهظومه
          . . . . . . . . . . . . .

ايگلها نقبل بالوداع الما نريده
الباري قدّر هالامر واحنه عبيده
انتي من الآل بنت اول شهيده
ياشبيهة فاطمه ونفس العقيده

امج تودع المصطفى بقوة عقيدتها
وانتي يزينب هسه اصبحتي شبيهتها
حدر الظلع ملجومه
يازينب المهظومه
          . . . . . . . . . . . . .

راح اودعج ويّه اخوتج راح تبقين
اوداعي هيّن من اقيس اوداع الحسين
باجر ابعاشر محرم من تمرّين
انتي التقدمين مهره للميادين

بيدج تقدميله المهر لو حانت الساعه
أصعب من اوداعي يزينب ساعة اوداعه
لا ميتكرر يومه
يازينب المهظومه
          . . . . . . . . . . . . .

عله زينب دامعه ومشبوحه عينه
بهالوضع حيدر علي سكّن ونينه
غمض اعيونه الحسن واسبل ادينه
حسين گام الوالده وقبّل جبينه

من بعده المن تلتجئ ناس اللي معتازه
كل اليتامه حضروا ايشيعون الجنازه
كلها ابحزن مالومه
يازينب المهظومه
          . . . . . . . . . . . . .

خادم اهل البيت عليهم السلام
عمار العيساوي الكربلائي

يا كعبة عشك منهاجي محرابك
اوصل يم ضريحك وانحني ابابك
بابك ما ادكه .. بابك كله ملكه
استقبل احبابك
              . . . . . . . . . . . .

اريد آنه اعتنيلك كلبي ملهوف
هاك أخذ الكلب ياحيدر وشوف
يم بابك اصيرن للدعه اجفوف
واخلي الروح فوك المرقد اتطوف

من اغمض عيوني اتخيل ارسومك
راسك منطبر واخضابك ادمومك
صوره بعيني تبكه .. بابك كله ملكه
استقبل احبابك
              . . . . . . . . . . . .

انه بعالم خيالي اكعدت يمك
لن محرابك اينوح ويكلمك
يكلك يا علي كل لحظه اشمك
لان لسه عليه آثار دمك

محرابك اشوفه بعالم أفكاري
متخضب جبينه ابدمك الجاري
اتظل ابصدره حركه .. بابك كله ملكه
استقبل احبابك
              . . . . . . . . . . . .

اسجد عالتراب ابّاب الضريح
وجمرات الدمع من جفني اتطيح
انه اتنفس هواك امن اطيب الريح
آنه ادري ابمحبتك عمري تسبيح

بسمك من اسبح اشكر الباري
وسر امحبتك من اعظم أسراري
اسمك عندي شهكه .. بابك كله ملكه
استقبل احبابك
              . . . . . . . . . . . .

وين أهل الغرام وأهل الفنون
مثل حيدر فلا ينعاد بالكون
اذا قيس اعله ليله وصل لجنون
المجانين اعله حب حيدر يعقلون

مو من الاملاك ولا بشر عادي
حيدر نور ربنه امترجمه الهادي
نور الحك يعشكه .. بابك كله ملكه
استقبل احبابك
              . . . . . . . . . . . .

علي يمك نحط ترحال السنين
ويمك نعترف احنه مذنبين
يلاهوت العشك عالعهد باقين
نعيش انموت شيعتكم يبوحسين

ابمحكمة العشك سجلته دلالي
بسمك يا علي يا اغلى كل غالي
انته الغالي تبكه .. بابك كله ملكه
استقبل احبابك
              . . . . . . . . . . . .

اليتيم ابظل وجودك رافع الهام
اذا عنه تغيب اتغيب الأحلام
صرت كلما عيوني اتصد عالايتام
اتذكر أيتام الدخلوا الشام

بالمجلس يريتك لو جنت حاضر
ما دخلت رقيه ابكسرة الخاطر
والمدمع تحركه .. بابك كله ملكه
استقبل احبابك
              . . . . . . . . . . . .
خادم أهل البيت عليهم السلام
عمار العيساوي الكربلائي

يشايل نعش ابويه تمهل خل اودعه
ترك خلفه يتامه وغفت بعيونه دمعه
صفه بحجر المنيه
وتصد عينه عليه .. وغفت بعيونه دمعه
              . . . . . . . . . . . . .

يشيال النعش لتعجل ابدفنه
ريّض .. عيني ما شبعت نظر منه
انه بنته العزيزة الما غبت عنه
أخذني الكبره خل اتوسد ابحظنه

علي الدللني تالي اعيش ابلا وجوده
البشر شنهو حياته اذا ما بيها عوده
أريده ايرد اليه
وتصد عينه عليه .. وغفت بعيونه دمعه
              . . . . . . . . . . . . .

يشايل نعشه بالله امهلني بس نظره
اشم راسه واقبّل موضع الطبره
و اودي وياه امانه الفاطمه الزهره
وتشوف امن الظلع للطبره جم كسره

الظلع اول جريمه الاعادي نفذوها
وعلي شيبة لحيته بدمه اليوم اخضبوها
ورحل من بين اديه
وتصد عينه عليه .. وغفت بعيونه دمعه
              . . . . . . . . . . . . .

لا تمشي ابجنازة والدي اتأنه
الابو لبنيته مثل الطير والجنه
ابراسي طبرته اشكد جنت اتمنه
واودع عمري كون ولا اودعنه

يشيال الجنازة برحيله لا تعجّل
عسى تحضر منيتي واروح ابلحده انزل
واصير ويا سويه
وتصد عينه عليه .. وغفت بعيونه دمعه
              . . . . . . . . . . . . .

عشت اسنين عمري ابظله وبزوده
انفكد.. واشعر سنيني وياه مفكوده
بالمحراب طفّوا شمعة اوجوده
و وحشه اخلافه صارت دنيتي وسوده

عليه اشعر دليلي تكطّع من رحيله
ابيعن عمري كله اشتري من عمره ليله
العمر كله ابمسيه
وتصد عينه عليه .. وغفت بعيونه دمعه
              . . . . . . . . . . . . .

هوَّ وحيلي راح وحيلي خل يرحل
فدوه الوالدي بس كونه يمي ايظل
غصن والماي ابويه ولو رحل اذبل
وبين الحسره والاه العمر وشل

ربيع سنيني هاجر بخريف اكظي البقالي
الدمع بعيوني جمره واحس الهم بجالي
جمر دمع الرزيه
وتصد عينه عليه .. وغفت بعيونه دمعه
              . . . . . . . . . . . . .

خطوه ابينّه ومن عدها فات الموت
وشفت بسمة حياتي اموسده ابتابوت
أحاجي والدي وما يستمع اي صوت
وساروا بالنعش وبكبره راح ايفوت

ارش دمعي اعله كبره وتربته اكعد اشمها
اليتيمه اعرف وضعها وعشت لوعة المها
عشت نفس الاذيه
وتصد عينه عليه .. وغفت بعيونه دمعه
              . . . . . . . . . . . . .

خادم أهل البيت عليهم السلام
عمار العيساوي الكربلائي

إعادة لنشر بعض قصائد استشهاد الإمام علي بن ابي طالب امير المؤمنين عليه السلام
وسيكون نشر القصائد الجديدة مساء اليوم
بعون الله

يا حيدر هذا أقسى مصاب
ليلة توديع الاحباب
وحسرات الروح . يا حيدر
بكلبي المجروح . يا حيدر
. . . . . . . . . . . . . . . . . . .

زينب آنه وحرگت گلبي ساعة توديعك يا حيد
شلون تروح وتترك زينب وعن عيني تصير انته بعيد
يا گاع التاخذ تاريخك وتبعدك من عندي تريد
يا لحد اليوسع يا حيدر سرك يا سر التوحيد

ما يوسع لو يصبح كون
يا سر الله المكنون
لو عني تروح . يا حيدر
كلبي المجروح . يا حيدر
. . . . . . . . . . . . . . . . . .

يا حيدر نتشارك گلبي وروحي ونفسي وعيش وياي
عشت ابين أحضانك وردة وترويني بعطفك ماي
وآنه ال بسم الله وبسمك فوك الساني تدور هواي
هسه شلون وياك اتوادع بيا صيغه احجيها ابيا راي

نتوادع ليش بهاليوم
وتتركني بنص شهر الصوم
والمدمع موح . يا حيدر
كلبي المجروح . يا حيدر
. . . . . . . . . . . . . . . . . .

ياحيدر بس هاي الليلة ويسموني ايتيمه الناس
من بعدك تتفرهد روحي ويتكطع كلبي الحساس
والدنيا الجانت بوجودك رحمه ونور وهيل وياس
باجر ظلمه اصبح الدنيا تصير وياي ابلا احساس

الدنيا ويانه اتدور الحيف
يمروضها بحد السيف
الجرح المملوح . يا حيدر
كلبي المجروح . يا حيدر
. . . . . . . . . . . . . . . . . .

يا حيدر لو غمضت عينك وعن دارك نعشك شالوه
اتمنى ابدالك يالوالد كلبي بلحدك لو خلوه
كون آنه الاسجد واتصوب والراس ابدالك طبروه
مكسورة خاطر خلوني وكلبي اعله امصابك كسروه

بنت الكوثر والقرآن
باجر اسمي ام الأحزان
بس ليلي يطوح . يا حيدر
كلبي المجروح . يا حيدر
. . . . . . . . . . . . . . . . . .

باجر من بعدك يا حيدر تجور الدنيا اعله الاخوان
ومصاب الحسن يهد حيلي من يفتر دهري الخوان
ومصاب حسين بارض الطف وخيام ونار ودخان
والحيرة بشردت أطفالي اطلع لو احمي النسوان

اوكف وحدي ابين جنود
ياريتك بالطف موجود
يا سبع السوح . يا حيدر
كلبي المجروح . يا حيدر
. . . . . . . . . . . . . . . . . .

يا حيدر حسراتي ونوحي بخطوات امشي بدرب الشام
بكل خطوة يذلوني بظنهم وبعيني يصيرون اقزام
يا حيدر لو حاضر يمي ما دارت بيه الايام
روح وسلم لي اعله الزهره وكلها اضحوا ولدج أيتام

ماخذ كلبي وحيلي وياك
وراح ابقى اعيش بذكراك
يا ملك الروح . يا حيدر
كلبي المجروح . يا حيدر
. . . . . . . . . . . . . . . . . .

خادم اهل البيت عليهم السلام
عمار العيساوي الكربلائي

ناحت نجوم السمه . وغايب . غايب كمر سعدي
والنعش لو مشه .. ليلتي موحشه
غايب . غايب كمر سعدي
. . . . . . . . . . . . . . .

يابويه آخر ليله يمي الك
لو تبقى لو تاخذني اتوسلك
منهو اليه يالمعلم الملك
أظلم عليه لو غبت منزلك

وحشة سنين العمر . دونك . دونك يضي عيني
تجفي بنتك حشه .. ليلتي موحشه
غايب . غايب كمر سعدي
. . . . . . . . . . . . . . .

يابويه كلبي بغيبتك ينفجع
عيوني تواسيني بمسيل الدمع
وين انطي وجهي والمن اشكي الوضع
دنياي من بعدك فلا تنجرع

متوسمه بحركتي . ونوحي . نوحي يواسيني
مصيبتي امغبشه .. ليلتي موحشه
غايب . غايب كمر سعدي
. . . . . . . . . . . . . . .

من يوم جرحك واحس كلبي انمرد
ودعت عمري وفرحتي والسعد
يا والدي للروح انت الضمد
ماريد يوم ايمر بدونك ابد

شتسوة ليالي العمر . لو ما . لوما شفت وجهك
والعذول انتشه .. ليلتي موحشه
غايب . غايب كمر سعدي
. . . . . . . . . . . . . . .

يومين نايم على افراش الألم
وايتامك اتناشد سلم؟ ما سلم؟
عرفوا منو ايوزع المؤن بالظُلم
وكاتب وداعك على اللوح القلم

هاي اليتامه التجي . تريدك . تريدك واليها
عنك امفتشه .. ليلتي موحشه
غايب . غايب كمر سعدي
. . . . . . . . . . . . . . .

باين عليك السم مشه ويه الدمه
ولونك تغير واختفى مبسمه
لو غمضت عينك يحامي الحمه
لابد تشوف ام الحسن فاطمه

اباب الجنان اوكفت . تنطر . تنطر تمر بيها
ليها حزنك غشه .. ليلتي موحشه
غايب . غايب كمر سعدي
. . . . . . . . . . . . . . .

روح انته الله وياك يا والدي
او ويه الحزن آنه اظل وحدي
بلحظة رحيلك والهظم يبتدي
للشام ابقى بنفس جفني الندي

تتوالى كل المحن . وحده . وحده ابأثر وحده
والنعش لو مشه .. ليلتي موحشه
غايب . غايب كمر سعدي
. . . . . . . . . . . . . . .

خادم اهل البيت عليهم السلام
عمار العيساوي الكربلائي

صريخٌ و دويٌ ما الذي يجري
صغارٌ وكبارٌ دمعها يجري
كأن الكونَ فيهِ ليلةُ الحشرِ
. . . . . . . . . . . . . . . . . .

اشوف الدنيا كلها اتغبّرت بالهم
ويم المسجد انظر للخلك تلتم
اناشد والكلب بالحسرة يتألم
مصلاية علي ليش اكتست بالدم

تكادُ الارضُ فينا تنطوي قهرا
وشبّت بالصدورِ لهبتَ الجمرا
وليلٌ مضلمٌ فيه اكتسى الفجرِ
كأن الكونَ فيهِ ليلةُ الحشرِ
. . . . . . . . . . . . . . . . . .

اناشد والجواب اتعسر اجوابه
واحس كل الخلك بالحاله مرتابه
هتف صوت المنادي بالسمه اخطابه
علي . سيف الكفر وي سجدته صابه

عليٌ صابهُ سيفَ الردى غدرا
وسمٌ في دماءِ المرتضى اسرا
طفى الشرُ ونالَ هامةَ الخيرِ
كأن الكونَ فيهِ ليلةُ الحشرِ
. . . . . . . . . . . . . . . . . .

وانظر للوصي جابه الحسن وحسين
ما يگوة المشي وما تحمله الرجلين
سيف الصوبه طر هامته نصين
ويه اصوابه متهدم عمود الدين

وصيُ اللهِ سيراً صارَ لا يقوى
مصابٌ هدَ ركنَ الدينِ والتقوى
الا يا لوعةً وسطَ الحشا تسري
كأن الكونَ فيهِ ليلةُ الحشرِ
. . . . . . . . . . . . . . . .

اشد موقف حصل واتشاهده عيوني
من كلهم علي يولادي اسمعوني
كبل ما نوصل الداري تنزلوني
زينب لا تشاهدكم تحملوني

ويخشى ان تراهُ زينبَ الكبرى
وتجري دمعةً بالمقلةِ حمرا
لها كم دمعةً مخفيةً يدري
كأن الكونَ فيهِ ليلةُ الحشرِ
. . . . . . . . . . . . . . . . . .

يداري ابنيته واتحمل آلامه
ولا رايد تصب مدمعها كدامه
علي يدري بدهرها محزم احزامه
بيوم حسين اخوها وحركة اخيامه

سيجري دمعها في الطفِ مدرارا
لإقمارٍ هوت والدمُ انهارا
ويبقى دمعهى (حينٌ من الدهرِ)
كأن الكونَ فيهِ ليلةُ الحشرِ
. . . . . . . . . . . . . . . . . .

خادم اهل البيت عليهم السلام
عمار العيساوي الكربلائي

وا مُسلماً وا مسلما .. تُبكيهِ ارضاً وسما
------------------------------------

بالكوفه مسلم جمّع ارجال الدين
كَلهم اجيت الكم سفير امن حسين
كَالوله ابّشر كلنه الك متوحدين

ف هل الحسين مقدِما .. تُبكيهِ ارضاً وسما
---------------------------------------

صار الصبح واتّكشّف استار الليل
بـان الغـدر بـان الدغــش والتضليل
وعن مسلم اصحاب الغدر كَام اتميل

مالوا لميل الدرهما .. تُبكيهِ ارضاً وسما
------------------------------------------

وحّده صفه والكَوم كلهم عافوه
ومـيـثـاق ذاك العهد ويَـا نقضوه
ابنيران واسهام وحجرهم ضربوه

وبِغدرِهم تألما .. تُبكيهِ ارضاً وسما
---------------------------------------

وحّده وعليه التفت احشود احشود
ما همه مسلم من علي ماخذ زود
والقائــد الغضبان متصده اجنود

لعليٍ مُسلِمُ انتما .. تُبكيهِ ارضاً وسما
-----------------------------------------

صال ابيمينه السيف وافنه الفرسان
معروف مسلم لـو وكــّف بالميدان
حيد وشهم من غالب ومن عدنان

ليثٌ اتى من هاشما .. تُبكيهِ ارضاً وسما
------------------------------------------

ومعروف عدنه الكثره تولي الشجعان
ابكيد وغدر مدوا احبال الشيطان
انـطـوه الامــان وقابلوا بالخذلان

وبقتلِهِ قد اُلهِما .. تُبكيهِ ارضاً وسما
-------------------------------------------

ابقصر الاماره امجتف ابين ارجاس
والطاغيه الملعون نــاده الحراس
بالسيف عن جسمه تفلون الراس

وبأمرِهِ قد اُعدِما .. تُبكيهِ ارضاً وسما
------------------------------------------

خادم اهل البيت عليهم السلام
عمار العيساوي الكربلائي

#گعدة_للخدمة

مدرسة الحسين مدرسة الاباة
للخلود اتصوغ بالموت الحياة
وأنا جئتُ فدائي .. ولها صارَ انتمائي
انها غارَ حراء .. تحتويني
-----------------------------------------

مدرسة الحسين صارت ميزه عن كل المدارس
ما تحددها امــاكــن لا يصح الها منافــس
والصفوف اشكثر بيها ابعدد ارقام المجالس
واللي يطب الها ابفهم ۔ لابد ابمنهج يلتزم
يستمد من جون العزم . وبالجنون ايصير عابس

ابشعبة الانصار اول امتحان
وآنه رايد انجح ابصك الجنان
وهنا كانَ ابتدائي .. ولها صارَ انتمائي
انها غارَ حراء .. تحتويني
------------------------------------------

مدرسة الحسين الها بالوجود اعظم مكانه
الينتمي الها ابعقيده بالخلك يرتفع شانه
وآنه صار الها انتمائي ابمعتقد نهج الديانه
مادام آنه املك عقل .. لاحيد عنها ولا ازل
ابنهج الحسين ارد اتصل .. وامتلك منه حصانه

تابع الهالمدرسه ابكل افتخار
وادري مَن بيها درس متمسه نار
بها صدقتُ ولائي .. ولها صارَ انتمائي
انها غارَ حراء .. تحتويني
-----------------------------------------

مدرسة الحسين بيها واقع ونهج اجتماعي
واللي يدرس بيها يصبح للزمن فاهم و واعي
وانــتـمـائي الها يـقـيـم مبدئي وخُلق انطباعي
صارتلي دستور ودرس .. وضحت مثل عين الشمس
منها استمد عزت نفس .. وما نِكس للذل شراعي

منتمي الهالمدرسه ابعزه وثبات
وما اطخ راس واذل للعاديات
تارِكَ الذل ِ ورائي .. ولها صارَ انتمائي
انها غارَ حراء .. تحتويني
----------------------------------------

مدرسة الحسين صارت بالدراسه عــالـمـيــه
ومنهج العباس بيها ايوضح اركان القضيه
من طلع صوب الشريعه و وحده كابل جيش اميه
منهاج وثّق عالنهر .. جفين والجثه وذر
معناها منهاب الخطر .. ولا نخاف الناصبيه

ندرس ابمنهاج عباس الكفيل
ابمدرسه بالكون ما الها مثيل
جلّها ربُّ السماء .. ولها صارَ انتمائي
انها غارَ حراء .. تحتويني
---------------------------------------

ابمدرسة الحسين ادرس درس عريس الهواشم
ابكل زمن نحتاج قدوه وقدوة الشبان جاسم
حين عاف اشموع عرسه وصار للميدان عازم
عاف الشموع وحنته .. للحومه رمله زفته
بالخيمه كعدت تانته .. تريده يرجع الها سالم

سمع عمه اينادي ناصر او معين
كال اقدم نحري لاجلك يا حسين
افتَديكَ بدمائي .. ولها صارَ انتمائي
انها غارَ حراء .. تحتويني
--------------------------------------------------
مدرسة الحسين بيها الينتمي يدرس مراحل
مرحله للغـيــره بيها وللوفــاء وللمراجــل
كل فرد يدخلها جندي وكل وكت جنديها باسل
الاكبر يكون اكبر مثل .. مدرع ابعزمه من نزل
حملت علي لمن حمل .. ومثل حمزه من يقاتل

ابغدر طبروا راسه وانشج الجبين
ولازم اعله الروس مثله امطبرين
لم يكن قصدي ريائي .. ولها صارَ انتمائي
انها غارَ حراء .. تحتويني
------------------------------------------
مدرسة الحسين هيه اتشيدت من فيض نحره
لازم البيها ايتصور حال ابو اليمه ويذكره
حين كطعوا خنصر ايده وجالت الخيل اعله صدره
ولا ينسه زينب باليسر .. يمها انحنه طود الصبر
تبقه ابفخر ربّت خدر .. وللنساء اتصير عبره

زينب الوحدها مدرسة النساء
بالشرف والدين وبعزه ووفاء
كعبةُ العز للنساءِ .. ولها صارَ انتمائي
انها غارَ حراء .. تحتويني
-------------------------------------------

خادم اهل البيت عليهم السلام
عمار العيساوي الكربلائي

يحسين الك انصار .. دون الشهاده
وبيدك يبو الاحرار .. ازمام القياده
وللنصر متقدمين ... انصار الك يحسين
دون الشهاده
-------------------------------

دارت رحى الموت وكشف ماضيها .. حقد وظغينه
وانـكـشـفـت اوجــوه الغـدر تـاليــها .. وبانت علينه
يحسين هــذا الصــار مــو بيديها .. تكره علينه

اليكره علي الكرار .. خل يسأل امه
وانته يــبـو الثــوار .. مشعل الامه
يـمــنـور الكــونــيــن ... انصار الك يحسين
دون الشهاده
-------------------------------

سورك نصير وانته تعرف سورك .. بينه الاراده
يحسين انصارك ونــعــرف دورك .. اتوقع الشهاده
اليــوكع شهيد ويمه يسطع نورك .. نــال السعاده

صك الشفاعه ايريد .. ختم الامامه
واكسبنه بالتجنيد .. عزه وكرامه
وبهالعهد بــاقــيــن ... انصار الك يحسين
دون الشهاده
-------------------------------


اتقدم حبيب انصار ابو اليمه وكال .. ابمنطق عقيده
اتبـيـن الزلم مـو بالحـجي بالافـعـال .. وهز رايه بيده
انصارك اعله ايزيد ننزل زلزال .. بجنده وعبيده

من صاحوا الابطال .. انصارك احنه
والدرس للاجيال .. تمشي ابدربنه
هالدرس ظل اسنين ... انصار الك يحسين
دون الشهاده
-------------------------------

صاحوا فرد صوت احنه الك متطوعين .. وبيك اقتيدينه
انصارك وخـــدام الك هــم راضـيــن .. بس ترضه بينه
لو مــو عـمـر بارينه يجعل عمرين .. بيهن شريــنــه

والعمر لو مرتين .. تسمع ندانه
لمحبتك شارين .. وترخص دمانه
وبالمنحر امضحين ... انصار الك يحسين
دون الشهاده
-------------------------------

اتقدموا خاضوا ملحمه اتشيل الراس .. بالغاضريه
للتضحيه صاروا مثل عند الناس .. اهل الحميه
صنعوا مواقف للمراجل مقياس .. اتعجب المنيه

اتقدموا بالايثار .. لابن الوديعه
اتراقبهم ابأنظار .. عين الطليعه
صاروا فخر للدين ... انصار الك يحسين
دون الشهاده
-------------------------------

خادم اهل البيت عليهم السلام
عمار العيساوي الكربلائي

انصارك يبو السجاد دكوا للكلافه اصدور
كالوا مانريد انعيش وسط الظلم والديجور
-------------------------------------------

دكوا للكلافه اصدور بس دكة رجل واحد
وكل واحد ابهالميدان ويه الموت متواعد
صاحوا نبرز ابهاليوم ونترك للزمن شاهد
واحدنه يعادل جيش
ومنريد ابمذله انعيش
والدنيه ثمنها ابيش
نشري الموت بالارواح و منصافح ادين الجور
------------------------------------------

نشري الموت بالارواح وهالشروه عليش اتدل
دلالتها نموت احرار ومنعيش ابحياة الذل
وماشين اعله هالمنهاج وعن دربك ابد منزل
وغيرك لا فلا نختار
يحسين احنه الك انصار
مثل الاشتر وعمار
مثل وكفتهم ابصفين ناخذ احنه نفس الدور
------------------------------------------

نفس الدور راح انعيد نوكفلك درع وسيوف
ابمناحرنه نحزّ اسيوف وبالايمان نذبح خوف
ابصراطك ما نفتح اعيون بعيون البصيره انشوف
انته الدين والقرآن
وبامرك ندخل الميدان
والله ونعم هالفرسان
فرسانك يبو الاكبر قدموا للشهاده انحور
------------------------------------------

انصارك يبو السجاد بيهم تنظرب امثال
زهير ومسلم وعابس الحر ونافع ابن اهلال
برير وجون تبعوهم حبيب وجملة الابطال
وعدوانك يعرفوهم
بالمكابل يهابوهم
الشمر كَلهم تولوهم
الكثره تغلب الشجعان وكامت عالانصار اتدور
-----------------------------------

دارت هالانصار اعداك من كل جانب التموا
وانصارك فلا ترتاب ابكثرة عدد ما هموا
حطوا عالدروع اكلوب وصوب الغانمه اتقدموا
كلهم صاحوا ابفد صوت
عله اجتاف المنايا انفوت
هله بالموت وينه الموت
سجلوا صفحه للتاريخ يوم العاشر ابعاشور
------------------------------------------

خادم اهل البيت عليهم السلام
عمار العيساوي الكربلائي

كربلائي وافتخر وانتمي لحسين
-----------------------------------------

آنـه ابـن هـاي المدينه وهذا يكفيني
وافتخر جي من تربها صار تكويني
ابعلكمي العباس آنه منعجن طيني
ابصورة الحوراء اهلي فتّحوا عيني

وعلمتني اعله الصبر وانتمي لحسين
------------------------------------------

كربلائي وهالمدينه منبعي وبيتي
كسبت امن حسين صيت وكوّنت صيتي
وبهواها امن الطفوله عودت ريتي
كربلاء امي اعتبرها وهاي تربيتي

واعشكتها امن الزغر وانتمي لحسين
-----------------------------------------

بالدم حسين اشتراها وكالوا اشدعوه
وهيه كبل حسين وادي وكلشي ما تسوه
ابدمه هيه اعله البقاع اتقدمت خطوه
وآنــه بالشفـتـيـن اردد كربله غـنــوه

غنوتي طول العمر وانتمي لحسين
------------------------------------------

كربله هيه وجودي ومنشئي بيها
تربه طيبه وبصلاتي اسجد اعليها
كربله ام وآنه واجب امتثل ليها
سيدة هالكون ومن يضاهيها

كربله ليلة قدر وانتمي لحسين
. . . . . . . . . . . . . . . . . . . . .

كربله اشما صار بيها اشما حجوا عنها
ايزيد حبها واعله راسي تاج احطنها
كربله حـب وتسامح ارتــوي منــها
ابدمي وبروحي وعيوني راح اشيلنها

من المهد حد الكبر وانتمي لحسين
--------------------------------------------

كربله بيت الزجيه الثاني احسبوها
وسلموا عالزهراء كلكم من تزوروها
كاعده يم راس ابنها تبجي تلكوها
ياحسين ابصوت صيحوا من تواسوها

حيل الطموا اعله الصدر وانتمي لحسين
. . . . . . . . . . . . . . . . . .

خادم اهل البيت عليهم السلام
عمار العيساوي الكربلائي

يكمرة حياتي
رحيلك مماتي
لفن نايباتي
اويه كطع الزنود
-------------------------------------------

كمـر وجهك يضوّي ابظلمة ايــامـي
وارسمك لوحه تزهي ابمرسم احلامي
واحــس فكدك جمر بكليــبي الضامي
انام اكعد اشــوفــك صــوره جـدامي

يروحي ودليلي
يذخري وكفيلي
انتظرتك تجيلي
ورجيتك تعود
-------------------------------------------

اصد واتــذكر الماضي يكفالي
جنت متنومسه من توكف اكبالي
تسد عين الشمس لا تِظهِر اخيالي
وتذل جف الارض لا يلمس اذيالي

امن اوجه خطابي
واسمّعَك عتابي
يفجعك مصابي
ومصابك يزود
------------------------------------------

جنت زهوة حياتي وبيك اتوسّم
امن اشوفك اشعرك فوك الثغر مبسم
ما ادري حقيقه لو جنت احلم
من شفتك ذبيح اموذر امخذم

اصد الجفوفك
واعيش ابطيوفك
سهم طفّه شوفك
يراعي العهود
------------------------------------------

يخويه اعله الرمح واتفكّر ارسومك
بدر بسماك ابد متحجبك اغيومك
اروح اعله الهزيله امحنّيه بدمومك
اسـيــره وانته مـحـد يكدر ايلومك

دحيت الكتايب
يليث الحرايب
يظل عالترايب
علم ويّــه جــود
---------------------------------------------

العلم شفته يبو فاضل هوه ابكترك
وماي الجود فايض ويّه دم نحرك
وسيفك عالترب ياخويه ينتظرك
نفذ صبر الحديد وما نفذ صبرك

حملت المصيبه
يكبش الكتيبه
وأنه امشي غريبه
وبـديّـه الكيـود
-------------------------------------------

راح امشي واعوفك عالنهر مطروح
واعوف اكليبي يمك ما اعوف الروح
لأن الروح ظلت بالمعاره اتـنـوح
يم جسم الحسين اعضيدك المذبوح

اجيت ابزعامه
وارد ابيتامه
سمعت الملامه
اعله فكد الاسود
--------------------------------------

خادم اهل البيت عليهم السلام
عمار العيساوي الكربلائي