محبيتش غيرها

وليها مكانه مخليه قلبي يسلك دروبها
خدتني لدرجة تخليني اشوف المزايا ف عيوبها

ضحكتها تشبه دخول النسيم
على أرض طالها الخريف من زمن

اديني كأن اللقى من ثواني لكني بقيت للأسف حد تاني

ومهما إيدين مسكت إيديا
ومهما عيون ثبتتني ف مكاني
هتفضل رجولتي وطفولتي عشانها
ما يملاش مكانها ف يوم حد تاني

محبيتش غيرها
وجايه تعوضني لحظة بكاها
بلحظة بكايا
وراجعه بكل الورود اللي دبلت
والاقيها قبل تكمل معايا
ولو ساعة واحده
ولو حتى نظرة

هحس اني مشيت وانتصرت
واني جنيت قد لما انتظرت
ف سايب مساحة ف بيتي ل خيالها
وسايب مساحة ف قلبي ل عيالها
ومختار إضاءة تلائم عينيها
وعامل حسابي عليا وعليها

وأقول بكرة أجمل وهقدر وهكسب
رهاني ف حاجات كان خيالي خسرها
محبتش وأفخر بكونها ف حياتي
وأني ف حياتي محبتش غيرها

القطر اللي بييجي برُكّارب
مش زي القطر اللي بيمشي محمّل
والناقص مضطر يكمل

لم شفايفي من ع المجات
واحسب عدد المرات اللي انا جربت حاجات فيها
مع ناس مشيت

ارفع بصماتي من ع الابواب
وانت هتعرف
ان انا متركتش باب إلا وجربت

كل ما أقول قربت
أتفرج على نفسي لوحدي

مزروع ف الاوضه اللي انا بقلع فيها همومي
بتأمل ناس لابسه هدومي وعايشه مكاني

بتفرج على مشاريع أطفال اتفقوا الشُركا يفضّوها
وبيوت كل ما ييجي العمال يبنوا حيطانها
ييجوا ناس تانيين غير العمال ويهدوها

مين المفروض دلوقت يصبر مين ؟

الناس فاكرة الطبطبه بالأيد
واللي انا عاوزة ناقص ف السوق

محتاج خمرة تخليني أفوق
او بنج يحرك اوجاعي

انما باجي ف اوقات وبقول ملهاش داعي
الناس فيها اللي مكفيها

مش هتسول شلة أصحاب
يطلبوا مشاريب وأمشي آخرهم

ولا ناوي أعكر صفو حاجان بحاجات غيرهم