tgoop.com/asjad421/1644
Last Update:
بتدهشني دايماً قدرة الإنسان على التغيير والتخطي!
(وكأننا لنا جُلود نُبدلها كل موسم بتغيير مافيه)!
في حاجات عملت ليها save قبل سنة، وقبل سنتين فظهرت لي مع الmemories، متأكدة وقتها مسّت فيني حاجة
لكن! لما رجعت قريتها مليت من أول سطر!
نفس فكرة الفستان (المُنقط) البقى مركُون في آخر الدولاب
!
ونفس فكرة الأشخاص البقو في آخر قائمة المحادثات إن وُجدو أساساً!
نفس الأماكن القلّت وإنقطعت زيارتها المتكررة!
نفس العادات الأُستبدلت!
منو كان يصدق إنو أنا أبطل شاي اللبن بالنعناع؟!
نحن بنتغير كل يوم وكل دقيقة!
قبل شوية إتصلت على صديقة عزيزة شديد
(تبارك لي العيد الله يباركها) ✨❤️
تقريباً في فترة من فترات حياتنا كُنا أقرب من الدنيا دي كلها (لبعض) لينا سنين طويلة ما اتكلمنا..
ببساطة شديدة عملنا skip للسنين والاحداث واتكلمنا عادي ماقالت لي كنتي وين ولا قلت ليها كنتي وين ❤️
(لا إنتي لا انا لا القلوب الشايلنا حُبنا بي صِدق تقدر تبِل زرع السنين الراجي فيضو بعد حِرق)
لا تزعلي، لا تبكي لا، لا تحزني
قدر العشق انا وانتي نتلم ونوالف ونفترق ❤️
عندي صحبي شديد ما كان بعدي يوم واحد علينا بدون نتكلم او نتلاقى! فجأة انقطعنا ما انقطاع تدريجي لا، انقطاع كامل
وبنفس ذات الفجأة رجعنا، من أول بنفس ال (skip bottom) واصلنا من آخر نقطة في 2012 كنا بنتكلم فيها.
قال لي انا بس عاوز اقول ليك حاجتين:
انا آسف على الفات ده كلو، واسي من هنا ومن اللحظة دي محتاجة مني شنو وبس ❤️
تساقط الأشخاص من حياتك مهما كانت مكانتهم
أصحاب، زملاء، أحباب
ما حاجة كعبة شديد! مؤلمة نوعاً ما في وقتها لكن منطقية
حترافق كتار وتصاحب كتار وتحب كتار في وقتها حيكونو هم كل شيء ✨
لكنهم فترات في حياتك وانت فترة في حياتهم!
جرّب إنك ما تلوم وما تقول
إنت اتغيرت ليه؟ ونحن ليه ما زي أول؟
ببساطة مدة صلاحية العلاقة دي إنتهى👋
العلاقات والأشخاص رسالات نحن دروس في حياة بعض
فطبيعي جدآ إننا ما نكمل once إننا إستوعبنا الدرس
(بصورة كاملة وبإمتنان شديد) !
مؤمنة تماماً بضرورة تدي الناس مساحتها بدون ما تسألهم مالهم وبدون ما تحكُم عليهم
طالما (إنت ما غلطت في حقهم ابداً)! ❤️
ومؤمنة وعلى يقين بإنو العاوزك في حياتو بعرف كيف يحافظ عليك تماماً بالحرف والدقة والمل!
الحريص عليك بصونك (بدون ما انت تُملي عليه)!
بدون كُتيب إرشادات ودليل محبة!
وإلّا تسقط المحبة بعظمة مُعطيها!
تسألني عن المقدرة ل(البداية من البداية)؟
ببساطة!
أنا بقبلك من غير زعل
طبع المُحبين السماح ❤️✨
منقول 🌸
BY اريحات العسجد😌💙
Share with your friend now:
tgoop.com/asjad421/1644