صبّحكم الله بالخير🌸.

يومكم طيب بإذن الله

مسيطر عليا فكرة إن ليه نعيش لما ممكن نموت؟

بس بالتفكير شوية ..

احنا مخلوقين لعبادة الله وحده
كل ما نتعبد له بحق بيجازينا

فيه جزاء بعد كدا اللي هو الجنة

فبقول لنفسي يعني لو متنا دلوقتي وانتهت المعاناة وانتهى الألم زي ما احنا متخيلين في عقلنا
هيكون أفضل ولا نقاوم ونحاول ونحاول

وممكن الألم دا يخلص
فنُجازى عليه

وكمان نحس بسعادة بانتهائه هنا
وسعادة في الجنة؟

عمومًا
الحياة لا تخلوا من الألم
والحزن

لا تخلوا من كل دا حرفيًا..

فعشان كدا لازم نركن أحزاننا على الرف ونبدأ
مهما عظُم البلاء
ومهما اشتد

هنحاول نرجع لربنا تاني
واحدة واحدة ونموت واحنا بنحاول

مش مهم نوصل
المهم نموت واحنا بنحاول

قوموا صلوا الضحى
واقرأوا الورد لو لسه مقرأتوش🫵.

مهم.

أي حد بيدخل يسألني في أحكام شرعية والله أنا مش برد عشان مش بفتي أبدًا أبدًا

أنا معنديش علم مش علمي ضئيل
لا معنديش علم غير اللي ينجيني بس والحمد لله

فاسألوا شيوخ ثقة وتحروا الصح❤️❤️

صبّحكم الله بالخير.

يوم جديد!🌸

بسم الله نبدأ
بقالي فترة مقصرة في الأذكار بس حسيت شيء بيذكرني بيها النهاردة بشكل غريب!

فبسم الله نبدأ ونقرأها
ونقرأ ورد القرآن ونحاول تاني نرجع لربنا مرة تانية

الأيام ثقيلة
والآلام شديدة
لكن احنا بنحاول
نخفف الآلام دي بالقرآن

بسماعه أو تدبره وتلاوته

فشدوا همتكم
رمضان قرب والأيام بتتقلص

عايزين ندخل رمضان بهمة عالية🤍

عمومًا دي كانت حياة غير آدمية

يا رب أنجح

صحبتي اللي جابت لي الورد دا
كنت بهزر معاها تقريبًا -مش متذكرة بالظبط-

وقولتلها عايزة تورتة

وقعدت وعداني بيها بقالنا كتير أوي😁

لحد ما النهاردة أكلتني التورتة بالمعلقة!
ومعاها الورد دا
ودخلتني ملاهي عشان نفسيتي☝🏼

الإنسان بيحمد ربنا على صحبته
وبيحمد ربنا على إنه برغم ذنوبه رزقه بناس هينة وجميلة في حياته❤️❤️

:))

لا عزاء لل pdf مع هدايا الأصدقاء❤️

عمومًا أنا بشارككم الشيء اللي مفرحني زي ما بشارككم الأحزان🤷🏻‍♀️

بحس المواصلات بالليل أحد المتع في الدنيا🌸.

النهاردة في لحظة هدوء مع نفسي قعدت أفكر هو أنا ليه عندي اكتئاب + باقي التشخيص
يعني ليه برغم إني معنديش مشاكل في حياتي الحمد لله

الحمد لله أنا حد صريح مع نفسه + بعرف أتعامل مع نفسي كويس الحمد لله

يعني دايمًا بقعد ما نفسي وأناقشها في مشاعرها بكل صراحة
ومش بترك شيء يزعلني

كل حاجة بتزعلني بعطيها وقتها ومساحتها في الحزن والزعل
مش بضغط نفسي عشان أتجاوز
لا باخد مساحتي الكاملة تمامًا

وإن كان دا في ناس بتفكره إني بكبر الموضوع بس على العكس أنا بسمح لنفسي بالحزن!
بالعياط
بالتعب

حتى الثيرابي كنت بقولها إن الحاجات دي مبقتش تزعلني لأني خلاص أخذت وقتي في الحزن عليها

لكن كنت دايمًا بحل مشاكلي مع الناس
الحاجات اللي تجاه الناس

بس ولا مرة فكرت هل آية زعلانة من آية؟
آية شايفة آية ازاي؟
شايفة نفسها من برا ومن جوا

وبسم الله لقيت أول خيط

الحقيقة إني متصالحة مع كل شيء في الدنيا إلا نفسي

فاكتشفت إن خلافي مع نفسي هو سبب كبير جدًا من تعاستي واكتئابي

لذلك الإنسان دايمًا محتاج يبدأ من نفسه
يحل مشاكله مع نفسه
يصالح نفسه عليها!

وبعدها ينتقل للناس:))
وقتها ممكن يعيش!
والألم يخف..

مؤخرًا في شيء برجو من كل قلبي إن ربنا يمن عليا بيه
بلتمس كل أوقات الدعاء وبدعي ربنا يمن عليا!

هكون مبسوطة -هذا ظني- إذا ربنا استجاب ليا :))

بقعد أفكر كتير هو لو حُرمت الشيء دا هيحصل إيه؟
بحزن وقلبي بيحزن وبزعل بشكل مرعب

فبقيت مدركة إني ممكن أُحرم بسبب إني متعلقة بالشيء دا كدا!
ممكن أتحرم عادي 🤷🏻‍♀️

لذلك دايمًا بحاول جاهدة إني أذكر نفسي
بإني أدعي ربنا يختارلي
وبدعيه إن اختيار قلبي يوافق ما اختاره لي

يعني يا رب ارضيني باختيارك
ارضيني ومش عايزة أكون حزينة لأني اتحرمت!

بنزعل شويتين بصراحة حتى لو أدركنا إن في حاجة كنا عايزنها وكانت شر ..

احنا بشر
بنفرح إن ربنا نجانا
بس جوانا شيء بيكون حزين إنه كان نفسي

لكن دي دنيا 🤷🏻‍♀️
هنموت كدا كدا فربنا يرزقنا الرضى بقدره الجميل لنا🌸.
المهم ندخل الجنة

فلو تدعولي إن ربنا يستجيب الدعوة دي بلطفه وتكون خير هكون ممتنة😂

لسه الرحلة طويلة مع نفسي أنا بس مسكت طرف الخيط

بس عمومًا يعني
أنا هرجع للثيرابي لأني اكتشفت إنه بسم الله عندي كلاكيع من لما كنت بيبي😂

لكن في العادي أنا بقعد في مكان فيه هوا
وخضرا وأفتح فويس أو تسجيل الموبايل عادي

وأتكلم مع نفسي كأن فيه شخص بيكلمني بحكيله اللي مزعلني

وبركز في كل حاجة
حتى لو نظرة بس ضايقتني

وبعطي نفسي مساحة إني أزعل وأضايق وبعد شوية بتجاوز

دا مشاكلي مع اللي حواليا

مع نفسي بقا:
عني مشاكل مثلًا مع شكلي؟
مشاكل مع شيء في طباعي؟
مشاكل في تعاملاتي عامةً؟

كل واحد فينا عارف هو زعلان من نفسه في إيه 🤷🏻‍♀️

وهكذا
ممكن تسمعي دورة البشمهندس أيمن عبد الرحيم بتاعت علم النفس
هتساعدك كويس بإذن الله

واسمعي دكتور عماد رشاد
لسه صحبتي مرشحة ليا البودكاست مع أبو زيد هسمعه وأعطيكم فيدباك بإذن الله 🫵

وممكن دكتور عبد الرحمن ذاكر له سلاسل طويلة وتحفة هتنتفعي بإذن الله💁🏼‍♀️

واخدين بالكم من الحماس؟
واخدين بالكم إني راجعة بقوة؟

والله إني أستاهل تشجعوني☝🏼

صبّحكم الله بالخير🌸.

رمضان قرب خلاص الأيام بقت معدودة!

هذكركم ونفسي،

التوبة
التوبة
التوبة

الذنوب بتحرم الإنسان من التوفيق للعبادات
بتقهره حرفيًا!

ممكن تكون بتحاول خلاص تقرب لربنا وتعمل ذنب فيوقعك تمامًا

فلذلك الإنسان لازم يكون سريع التوبة
احنا بشر🤷🏻‍♀️
بنغلط
ولازم نغلط

لكن المهم مش نكون مبسوطين بالغلط، مش نكون مكملين فيه ولا كأن فيه شيء حصل وننام آخر اليوم واحنا مُثقلين بذنوب قد كدا مش عارفين نعدها من كترها!!

يبقى أول حاجة كل يوم الصبح نجدد عهدنا مع ربنا
وآخر اليوم نتوب لله من كل ذنوبنا اللي نعرفها واللي مش عارفينها

لعل الله يتوب علينا ويدخلنا الجنة..

متأخرة سيكا👈🏼👉🏼
بس لسه صاحية من النوم
أول يوم أجازة ليا وكدا🤷🏻‍♀️