tgoop.com/azizalfesli/11647
Last Update:
ودعتك الله وأيست وانگطعت ظنوني
اتنطر ابجيه حلم افرشلك عيوني
عباس ماخذ گلبي .. عباس شوفي ابدربي
عباس متى تمر بيه / 2
🔷🔷🔷🔷🔷🔷🔷🔷
يمه كل ليله من اشوفك تطلع بليلي گمر
وشكثر طلعة جبينك علمتني اعله السهر
هسة اگول شلون بيه وانت بدروب الخطر
هالسمع ميشيل عيني خلافك ويملي النظر
يمه وينك يمه وينك
يمه وينك يمه وينك
يالتارس عيوني بخت كل نظره تبرالي
گد ما عشت بيه احس من طولك خيالي
عباس اسأل ربي .. عباس شوفي ابدربي
عباس متى تمر بيه / 2
🔷🔷🔷🔷🔷🔷🔷🔷
صح ذخرتك للعقيلة وانذرت كل اخوتك
گلت چلمة گد حياتك وانته گدها لچلمتك
فخر ليه وصرت امك شيمتني بشيمتك
والاسم والجاه اجاني كله بس من غيرتك
يمه عيوني يمه عيوني
يمه عيوني يمه عيوني
نوبه اطل اعله الدرب نوبه اطب دارك
حسراتي من اتهل جمر واتچمل ابنارك
عباس اسمع عتبي .. عباس شوفي ابدربي
عباس متى تمر بيه / 2
🔷🔷🔷🔷🔷🔷🔷🔷
طول دربك طول عمري وانتهي ويه الدرب
يبني كل خطوة الشلتهه لامك بدگه گلب
راح اظلن عود ذابل ناطره بجيتك سحب
كل سهل چان بحياتي صار من عگبك صعب
يمه رايح يمه رايح
يمه رايح يمه رايح
ارجع عليه يانبض هلبت ترد روحي
اكسير چفك للدوه امسح على جروحي
عباس زادي وشربي .. عباس شوفي ابدربي
عباس متى تمر بيه / 2
🔷🔷🔷🔷🔷🔷🔷🔷
صارت السلوه بغيابك نوبه احوم وابچي نوب
وهاي عاده وي صلاتي من الصبح حد الغروب
واگفه اعله الباب شمعه احرگ بروحي واذوب
انه الما ايست منك وايست كل الدروب
يمه ابهونك يمه بهونك
يمه بهونك يمه بهونك
صورة لچفوفك يا گمر اكبر من ايامي
كلما اطلن من كتر الگاها جدامي
عباس ثمرة تعبي .. عباس شوفي ابدربي
عباس متى تمر بيه / 2
🔷🔷🔷🔷🔷🔷🔷🔷
صدگ يا عباس عگبك بعد ما يسوه العمر
ولو من بعدك اعيش بلضى وخاطر منكسر
ساعة ابچي اويه البچالك واصفن ويه ام الخدر
ومن يمر طلري الچفوف النار بيه تستعر
يمه چفوفك يمه چفوفك
يمه چفوفك يمه چفوفك
نومة سبع يم النهر وعيوني اتشوفك
لو ينفتح باب العتب سديته بچفوفك
عباس گاصر عتبي .. عباس شوفي ابدربي
عباس متى تمر بيه / 2
🔷🔷🔷🔷🔷🔷🔷🔷
ردت سلوه عن غيابك بلچن ايخف الونين
درت وجهي للزچيه وحلفتهه بالجنين
گالت اطلبين مني سمعي يا ام البنين
التنسه عباس ابو الغيرة گادرة تنسه الحسين
يمه نايم يمه نايم
يمه نايم يمه نايم
يم الشريعه يا گمر نايم على الرايه
هاي الزچيه تخاطبك يوليدي بحچايه
عباس فگدك يسبي .. عباس شوفي ابدربي
عباس متى تمر بيه / 2
#راضي_الفیصلي
قناة الشاعر الأستاذ أبو باقر #عزیز_الفيصلي
https://www.tgoop.com/azizalfesli
BY الشاعر عزیز الفیصلي
Share with your friend now:
tgoop.com/azizalfesli/11647