tgoop.com/azizalfesli/11665
Last Update:
حسين يبن أمي تراني ماشيه
راح وكت الراضيه و مو راضيه
١/ حسين خويه ماشية و ليك العذر
تدري ما ظل شور عندي ولا أمر
على چفوفي دارت حبال اليسر
زينب الويّاي صبحت ماضيه
٢/ اليوم زينب بعد مو زينب أمس
انسمع صوتي العد هلي ما ينهجس
*بذرى* الناگه گمت ألوذ امن الشمس
واعله حر الگاع أركض حافيه
٣/ أركض بعرض الفلا أوگع و گوم
للخيم من صار يحسين الهجوم
هاي بيّه تلوذ من سوط اليحوم
وذيچ منِّ النار گد ما حاميه
٤/ أنا الما ينشاف طولي عد هلي
من بعد فيتك و فيّة كافلي
كلها صاحت "هاي زينب بت علي"
وانا بعيني وصيتك ما ناسيه
٥/ حسين خويه بروحي لمّيت البنات
وكل خواتك تبگه عندي مدللات
عهد مني ٱيتامك بحضني تبات
مدلله وٱتنام نوم العافيه
٦/ خويه عنك ماشيه غصبن عليْ
صار بيد الگوم أمري مو بدَيْ
چنت أوگف بالشمس تكسرلي فَيْ
وعفتك بهالشمس جثتك عاريه
٧/ هذا وكت الوفى وجثتك عالثرى
بالشمس أوگف و سويلك *ذرى*
شبيدي يبن أمي خذوني ميسرّه
لٱبن مرجانه و يزيد الطاغية
عزيز الفيصلي
قناة الشاعر الأستاذ أبو باقر #عزیز_الفيصلي
https://www.tgoop.com/azizalfesli
BY الشاعر عزیز الفیصلي
Share with your friend now:
tgoop.com/azizalfesli/11665