tgoop.com/azizalfesli/11751
Last Update:
لو نجي انواسيك
وين عنوانك
انت هذا الكون
بيت احزانك
وين ناصب مأتمك
هاي المسيه
انت لو بالشام
لو بالغاضريه
وين عنوانك
@@
كل عام اليهل عاشور
اوياك انجدد الأحزان
ولو سيدي ما شفناك
ولا منك حصل عنوان
ندري بكل عزه تحضر
مصيبة جدك العريان
نلچم گلبك امن انگول
يبن المنذبح عطشان
وين بيتك وين
ناصب الاعلام
ابكربله نلگاك
لو رحت للشام
اليوم وينك خاف
يم عمتك رقيه
انت لو بالشام
لو بالغاضريه
وين عنوانك
@@
وحگ جدك يبوصالح
نريد انواسي آهاتك
نحب ننصب عزه وياك
من تنعي إعله عماتك
ولو سيدي موش ادموع
تجري ادموم عبراتك
عساها بينه تتوجر
يبن الزهره حسراتك
اليا مصيبه اليوم
ننعى وانواسيك
يامصاب إيهون
من يمر اعليك
يهون بالطف كلشي
للراحت سبيه
انت لو بالشام
لو بالغاضريه
وين عنوانك
@@
گالت عنك الأخبار
انت وفاطمه امك
تحضر كل عزه الينعى
عله امصاب الگمر عمك
چنك ع النهر توصل
وتوگع من ثگل همك
تشوفه امگطع اوتندب
اموذر عمي شيلمك
شوف ذاك اليوم
شلون حال حسين
انگطع ظهره هناك
ابگطعة الچفين
هنا وگع بيته
وخدر كل هاشميه
انت لو بالشام
لو بالغاضريه
وين عنوانك
@@
عدكم عرس ذاك اليوم
صارت زفته ابحومه
هضيمه لو شفت عريس
يتحنه من إدمومه
وداع الأكبراويه حسين
اكبر هم من اهمومه
من طاح أعله ابنه هناك
و أعليه مات لتلومه
رجع منه وضاع
للخيم دربه
رجع جسمه وعاف
ع الترب گلبه
چنه عاف أعله
الثرى سيد البريه
انت لو بالشام
لو بالغاضريه
وين عنوانك
@@
فجيعه سيدي عندك
تهبّط بيرغ العالي
تهوّن كل مصيبه اعليك
إذا تنظر مهد خالي
اشحال أمه ابهذاك اليوم
ابنها و أغله كل غالي
تگله رحت يبني اوياك
وراح الأول اوتالي
مصيبه عدنه اوياك
جرح فوگ اجروح
امصيبة العطشان
بالمهد مذبوح
ظل عله صدره
تدوسه الأعوجيه
انت لو بالشام
لو بالغاضريه
وين عنوانك
راضی الفیصلی
قناة الشاعر الأستاذ أبو باقر #عزیز_الفيصلي
https://www.tgoop.com/azizalfesli
BY الشاعر عزیز الفیصلي
Share with your friend now:
tgoop.com/azizalfesli/11751