tgoop.com/bbatiev/6346
Last Update:
Márt xalıq jasaydı Moynaqta
Ana jer qanına qarısqan,
Shaǵaladay qanat qaǵısqan,
Watan ıshqı lawlap alısqan,
Márt xalıq jasaydı Moynaqta.
Kim aytadı gúderin úzdi?!!,
Ol sóz biykar, kózlerin súzdi,
Árman menen kútip teńizdi,
Márt xalıq jasaydı Moynaqta.
Kóbikteyin qalıqpaytuǵın,
Sál nársege tarıqpaytuǵın,
Suw kútiwden jalıqpaytuǵın,
Márt xalıq jasaydı Moynaqta.
Kóksinen úmiti óshpegen,
El jurtın taslap kóshpegen,
"Suw kórmey etik sheshpegen",
Márt xalıq jasaydı Moynaqta.
Qanında bar sabır - qanáát,
Kewli tolı miyrim shapáát,
Suwlar kelip kórgey raháát,
Márt xalıq jasaydı Moynaqta.
Samallar siynesin duzlaǵan,
Qálbinde bolmaǵan qozǵalań,
Begligin hesh qashan buzbaǵan,
Márt áwlad jasaydı Moynaqta.
Eńsesinde júktiń awırı,
Kóksinde ayralıq háwiri,
Kóz aldında altın dáwiri,
Márt urpaq jasaydı Moynaqta.
Qırıq jılda qazan gónerer,
Úmit penen tuxım sebeler,
Kóksinde, seksewil kógerer,
Boy kóterip Jańa Moynaqta!
Dúnya boylap duzı taralǵan,
Máselesi BMShda qaralǵan,
Prezident jaǵdayın soraǵan,
Sherjúrek el jasar Moynaqta.
Keliń doslar, Jańa Moynaqqa!
Márt xalıq jasaydı Moynaqta.
Shayıra Gúlistan Dáwletova.
30 .10. 2021 jıl.
muynak.uz | telegram | Facebook | Instagram | YouTube | Twitter
BY Хәким-ата АПЖ жаслар жетекшиси
Share with your friend now:
tgoop.com/bbatiev/6346