tgoop.com/bek_journalist/1624
Last Update:
Taksi xizmatidan ko'p foydalanaman. Aksar haydovchilarning gaplari siz-u bizni biroz mulohaza qilishga undaydi. Yaqinda ana shunday holatga duch keldim.
- Tinchlikmi, kayfiyatingiz yo'q?, deya so'radim.
- Dunyoning ishlari ham, odamlari ham kundan-kunga qiziq bo'lib borayotir, deb miyig'ida kulib qo'ydi.
Ajablangandek qaradim. U so'zida davom etdi.
- Yaqinda bir yaqin qarindoshimdan 1-2 oyga qaytarish sharti bilan qarz so'radim. Biroq, avvaliga rosa paysalga soldi, o'ylab ko'rib keyin natijasini aytaman dedi. Javob bo'lmagach, yana majburlikdan qo'ng'iroq qilib so'radim. Shunda undan rad javobini oldim. O'shanda undan xafa bo'lmadim. Pul, mol-dunyo uniki. Istaganiga beradi, xohlaganicha sarflaydi. Buning uchun tun-u kun tinim bilmayapti. Omadini va barakasini bersin. Ammo...
Ammo oradan ko'p o'tmay, yangi "innomarka" olibdi, boshqa bir insonga qarz beribdi. Men shundan ranjidim. Menga hozir qo'lim kalta deb aldaganidan, yolg'on gapirganidan qattiq xafa bo'ldim. Bor gapni, rostini aytsa bo'lardi-ku! Tag'in u bu xizmatlar bo'lsa, shu yerdaman deb zaharxanda qilib tirjayib qo'yadi. Biroq boshingda tashvish tushganida ularni topa olmaysan. Yangi mashina olmay, eskini haydab turib yordam bersa ham bo'lardi-ku, osmon uzilib yerga tushmasdi" deya gapirdi. Uning yolg'on gaplardan alamzada bo'lganligini har bir gapirgan gapida bilinardi.
Shunda gapini bo'lishga majbur bo'ldim.
- "Yaxshisi, bunday yaqinlardan voz keching. Shunchaki, Alloh uchun salom-alik qiling. Faqat O'zidan so'rang va sabr qiling. To'g'ri, vaqtdan yutqazasiz. Lekin faqat Yaratganning aytgani bo'ladi" - deya yupatishga urindim. Afsuski, uni tinchlantirganim bilan singan qalbini qayta tiklay olmadim. Bunday qilolmayman ham.
Qissadan hissa shuki, soxtalikni yig'ishtiraylik. Yolg'on gaplar bilan birovlarning qalbiga ozor bermaylik. To'g'ri yo'ldan O'zi adashtirmasin...
👉 @bek_journalist
BY bek_journalist
Share with your friend now:
tgoop.com/bek_journalist/1624