tgoop.com/bgfby/2485
Last Update:
2 лютага 2025 года заслужаны калектыў Рэспублікі Беларусь Дзяржаўная акадэмічная харавая капэла Рэспублікі Беларусь імя Р.Р.Шырмы адзначае 85-годдзе.
Адзін са старэйшых калектываў Беларусі быў створаны ў 1940 годзе. З 1978 года з гонарам носіць імя свайго заснавальніка – патрыярха беларускай народнай песні Рыгора Раманавіча Шырмы.
На працягу многіх дзесяцігоддзяў калектыў рупліва прымнажае свае багатыя традыцыі і з гонарам працягвае следаванне высакароднай місіі адраджэння і захавання каштоўнасцей народнай музыкі, папулярызацыі шэдэўраў сусветнай класікі, твораў сучасных кампазітараў, вядомых і незаслужана забытых аўтараў.
Значны ўклад у гісторыю калектыву ўнеслі выбітныя дырыжоры-хормайстры ХХ стагоддзя: Уладзімір Раговіч, Віктар Роўда, Анатоль Шунтаў. На працягу трыццаці гадоў хор узначальвала народная артыстка Беларусі Людміла Яфімава – нястомны прапагандыст творчасці беларускіх кампазітараў, першы выканаўца многіх іх твораў. З 2018 года кіраўніком Дзяржаўнай акадэмічнай харавой капэлы з’яўляецца Вольга Янум.
Сёння адзін з вядучых харавых калектываў краіны аб’ядноўвае высокапрафесіянальных артыстаў, таленавітых і творча адораных людзей, беззапаветна адданых мастацтву. Хор адрознівае высокая музычная культура, яркая эмацыянальнасць, багацце дынамічнай шкалы гучання, інтанацыйная чысціня, выразнасць і натуральнасць спеву.
Сардэчна віншуем заслужаны калектыў Дзяржаўную акадэмічную харавую капэлу Рэспублікі Беларусь імя Р.Р.Шырмы з 85-годдзем! Шчыра жадаем натхнення, вялікіх творчых поспехаў і нязмоўчных апладысментаў!
BY Белорусская государственная филармония 🏛️
Share with your friend now:
tgoop.com/bgfby/2485