Ўзбекистонда 2030 йилга бориб «яшил» энергия улушини жами генерацияда 50 фоиздан ошириш режалаштирилмоқда

Президент Шавкат Мирзиёев 28 январь куни электр энергетикасини 2025—2035 йилларда ривожлантириш чора-тадбирлари бўйича йиғилиш ўтказди.

Охирги саккиз йилда электр ишлаб чиқариш 38 фоиз ошиб, 81,5 миллиард киловатт соатга етди. Хусусий секторга кенг йўл очилгани туфайли 11,2 гигаваттли қўшимча қувват яратилди. Натижада бу секторнинг генерациядаги улуши 24 фоизга, «яшил» энергия ҳиссаси эса 16 фоизга етди.

Шу даврда аҳоли даромади 1,6 баравар ўсгани, янги турдаги маиший техникалардан фойдаланилаётгани сабабли хонадонларда электр истеъмоли 21 миллиард киловатт соатдан ошди. Бу 2016 йилгидан 2 баравар кўп.

2030 йилга бориб, мамлакат аҳолиси 41 миллионга етиши, иқтисодиёт эса 1,5 карра ўсиши кутиляпти. Шунга мутаносиб равишда, саноатда 45 миллиард долларлик қўшилган қиймат яратиш, хизматлар ҳажмини 3 баравар ошириш, йирик Маълумотлар марказларини ишга тушириш кўзда тутилган.

Тошкентда автобус йўлни ажратиб турувчи бетон тўсиққа бориб урилди

28 январь куни соат 23:00 ларда Миробод тумани Шаҳрисабз кўчасида йўл-транспорт ҳодисаси юз берди.

Тошкент шаҳар ИИББ ЙҲХБ хабарига кўра, 1976 йилда туғилган ҳайдовчи М.И. KINGLONG русумли автобусни бошқариб кетаётиб, рул бошқарувини йўқотган ва йўлни ажратиб турувчи бетон тўсиққа тўқнашиб, йўл-транспорт ҳодисаси содир бўлган.

ЙТҲ натижасида тан жароҳати олганлар йўқ.

Мазкур ҳолат юзасидан Тошкент шаҳар ИИББ ЙҲХБ масъул ходимлари томонидан суриштирув ишлари олиб борилмоқда.

Бухорода ҳайдовчи ЙПХ ходимини уриб юборди

Бош прокуратура матбуот котибига кўра, ҳолат Жондор туманида содир бўлган. Прокуратура томонидан терговга қадар текшириш ҳаракатлари олиб борилмоқда.

Натижаси бўйича қонуний қарор қабул қилиниши таъминланади.

Риштонда кулолчилик тарихи музейи очилади

Риштон анъанавий кулолчилиги тарихи нодавлат музейи ташкил қилинади.

Қуйидагилар музейнинг асосий вазифалари этиб белгиланди:
• музей ашёлари ва коллекцияларини аниқлаш, тўплаш ва сақлаш;
• маданий, маърифий, илмий ва таълим фаолиятини амалга ошириш;
• ёшларни “устоз-шогирд” анъаналари асосида кулолчилик ҳунарига ўргатиш;
• кулолчиликнинг бой маданий мероси, инсоният тарихидаги ролини ҳаққоний ёритиш;
• экспозицияларни ташкил этишда замонавий ахборот технологияларидан кенг фойдаланиш;
• чет эл музейлари билан кўргазмалар ташкил этиш борасида ўзаро манфаатли ҳамкорлик ўрнатиш.

Музейни ташкил этиш бўйича ишчи гуруҳ тасдиқланди ва унинг асосий вазифаларидан бири этиб, музей концепциясини ишлаб чиқиш, тасдиқлаш ҳамда музей фаолиятини йўлга қўйиш белгиланди.

2025 йил 1 апрелга кадар музейга ажратилган бинонинг тоифаси музей фаолиятига тўлиқ мослаштирилади.

Статистика агентлиги Ўзбекистондаги соҳалар кесимида ўртача иш ҳақи миқдорларини маълум қилди

2024 йилда Ўзбекистонда ўртача ойлик иш ҳақи миқдори 5 миллион 357 минг сўмни ташкил этган. Айрим соҳаларга мазкур кўрсаткичдан анча юқори ойлик тўланган. Жумладан, компьютер дастурлаштириш, маслаҳат бериш ва бошқа ёрдамчи хизматлар соҳаси вакиллари республика миқдёсида энг юқори даражадаги ўртача иш ҳақи — 18,3 миллион сўм олган.

Шу билан бирга, қуйидаги тармоқларда ўртача ойликлар энг кўп миқдорлар тўланган:

Қайта суғурталаш ва нафақа жамғармалари — 17,8 миллион сўм;
Ахборот хизмати кўрсатиш — 16,9 миллион сўм;
Молиявий хизматлар кўрсатиш ва суғурталаш бўйича ёрдамчи — 16,8 миллион сўм;
Алоқа соҳаси —10,9 миллион сўм;
Омбор хўжалиги ва ёрдамчи транспорт фаолияти — 9,6 миллион сўм;
Тоғ-кон саноати ва очиқ конларни ишлаш — 9,1 миллион сўм;
Олий таълим — 8,5 миллион сўм;
Автомобиль ва мототциклларнинг улгуржи ва чакана савдоси ҳамда уларни таъмирлаш—7,8 миллион сўм.

Энг кам ўртача ойлик иш ҳақи мактаб, мактабгача ҳамда техник ва профессионал таълим соҳаларида (3,6 миллион сўм) тўланганю Шу билан бирга, соғлиқни сақлаш ва ижтимоий хизматлар кўрсатиш (3,4 миллион) соҳаси вакиллари энг кам ўртача иш ҳақи олган. Бу миқдорлар умумий ўртача ойлик иш ҳақидан сезиларли кам.

Қайд этилишича, 2024 йилда ҳудудлар бўйича ўртача ойлик иш ҳақининг энг юқори кўрсаткичи Тошкент шаҳри кузатилган — 9,1 млн сўм. Кейинги ўринларда Навоий (6,7 млн сўм), Тошкент (5,1 млн сўм), Андижон (4,6 млн сўм) ҳамда Бухоро (4, 3 млн сўм) вилоятлари қайд этилган.

Энг кам ўртача иш ҳақи Қашқадарё (3,8 млн сўм), Сурхондарё (3,8 млн сўм) ва Наманган (3,9 млн сўм) вилоятларида кузатилган.

АҚШ самолёти ҳалокатга учради

АҚШда 90 йўловчи, тўрт нафар экипаж аъзоси бўлган самолёт Вашингтон яқинидаги Рональд Рейган миллий аэропортига қўнаётганда армия вертолёти билан тўқнашиб кетди. Айни пайт Потомак дарёси яқинида кенг кўламли қидирув-қутқарув амалиёти давом этяпти. Бу ҳақда «Euronews» ёзган.

Қурбонлар юзасидан ҳозирча маълумот берилгани йўқ. Ҳудудда барча парвозлар, қўнишлар тўхтатилди, чунки минтақа бўйлаб ҳуқуқ-тартибот идоралари вертолётлари омон қолганларни қутқариш учун воқеа жойи атрофида ҳаракатланяпти.

Ички хавфсизлик вазири Кристи Ноэм одамларни соғ-омон топиш учун қирғоқ қўриқлаш хизматидан барча мавжуд ресурслар жалб қилинишини билдирди.

Тошкентда MAN газ қувурига бориб урилди

Тошкент шаҳар ИИББ ЙҲХБ хабарига кўра, 1982 йилда туғилган ҳайдовчи М.Н. MAN русумли тиркамали юк транспорт воситасини бошқариб келаётиб, маҳаллий йўлдан ўтган газ қувури билан тўқнашиши оқибатида йўл-транспорт ҳодисаси содир бўлган.

ЙТҲ натижасида тан жароҳати олганлар йўқ.

Мазкур ҳолат юзасидан Тошкент шаҳар ИИББ ЙҲХБ масъул ходимлари томонидан суриштирув ишлари олиб борилмоқда.

Истанбулда қўлбола алкоголдан вафот этган ўзбекистонликлар сони 23 нафарга етди

Истанбулда қўлбола алкоголдан заҳарланиб вафот этган ўзбекистонликлар сони 30 январь ҳолатига кўра 23 нафарга етди. Уларнинг икки нафари аёл киши.

вафот этган барча фуқароларнинг жасадларини Ўзбекистонга олиб кетиш бўйича Ташқи ишлар вазирлиги ва Миграция агентлиги томонидан тегишли консуллик, ҳуқуқий ва ташкилий ёрдам кўрсатилди.

Шунингдек, баъзи ватандошлар даволаниш курсини якунлаб, шифохонадан чиққан, айримлари эса тиббий муолажаларни давом эттирмоқда.

17 январь куни Истанбулда қўлбола алкоголдан вафот этган ўзбекистонликлар сони 17 нафарга етгани маълум қилинганди.