tgoop.com/ch2Hs/6697
Last Update:
#_قصيده_العليله_ع
ها يا سلوة الروح اخر ليله وتروح
يابويه الدمع سال ماجانت عله البال
اخر ليله وتروح
حلم طفله بحضن والدها تغفه براحه وتنام
اذا راح الابو عني تموت بعيني الاحلام
يبويه وياك اروح ولا اضل بأسر الاوهام
يظل طيفك يسايرني او اشمن حرك الخيام
ترسم وحشة الدار خيمه احتركت بنار
وتعطش كل الاطفال ماجانت عله البال
اخر ليله وتروح
اضل محتاره بجروحي وهجركم يهدم الحيل
يماي اعيوني بويه صعبه افارك ريحة الهيل
يشيباتك يبويه الجنهن شموع يضون بليل
يصك دمك عله اخدودك يلتصير ملعب الخيل
يا بويه يالحسين ماخذ هيبتك وين
اقره بجفك الفال ماجانت عله البال
اخر ليله وتروح
يكسرة روحي لو سرتو وضعنكم سافر بعيد
هضيمه ودمعت بنيتك جرت ليش وعلتي تزيد
يبو كلب الحنين العيشه بجفاك كلي شتفيد
اضل المن يماخذ كلشي وياك وماخذ العيد
لتضن كلبي يرتاح لو عني الابو راح
خذني وهمي ينزال ما جانت عله البال
اخر ليله وتروح
احضر روحي بويه ويه النساوين وامشي وياك
وعد ما تعبك وداعة هالعيون بويه ارجاك
اعرفنه مجاني بالضعن شوف اكعد اهناك
يم اختي رقيه كعدتي تصير كبال عيناك
متعودات العيون تفارك وجهك شلون
يتغير تره الحال ماجانت عله البال
اخر ليلة وتروح
حزن فركاك بين بالملامح وجهي اصفر
يماخذ سلوتي عبدالله وياك وعلي الاكبر
الف عام برحيلك عني بويه اني اكبر
زغيره وشيبت من ضيم الفراك وجرحي خضر
بويه بجفي الزغير ادعي دومك بخير
ترد سالم بالعيال ماجانت عله البال
اخر ليله وتروح
انه من دونكم بالمنزل ابقه بيكم احلم
عليله وحيل مابيه للفراك وروحتك هم
علامه بدارك القاروره التراب لو صبح دم
معناها انذبحتو وعطر الخيام بيها ينشم
عيني تضل علتراب وبالي يم الاحباب
بدمعي اكتب المرسال ماجانت عله البال
اخر ليله وتروح
سواد الليل والدمعات الثجال وخنكة الروح
اشيب واني طفله بعز الاحلام حلمي مذبوح
يبويه من البواجي اعليك والاه صوتي مبحوح
سمعتك لمن كلت لعمتي هنا تبقه متروح
ميته اتمنه ياعين ولا يهجرني الحسين
ميته بكل الاحوال ما جانت عله البال
اخر ليله وتروح
الشاعر ✍️ حسين الخزعلي
BY ربما خادم الحسين ع✍️ حسين الخزعلي
Share with your friend now:
tgoop.com/ch2Hs/6697