tgoop.com/darjyat/8737
Last Update:
وسايقنا لي وين يابلد 😢😢😢
لي باب الغربه .. ولا لباب القبر
ورينا بس اخرك وين
..
لمن تبداها بي عيشه = جنيه
بكره حتختمها بشنو؟؟؟
اوعه تقولنا لقمنا حتتحسب
والنفس الطالع مننا حيتحسب
وخوفي بكره حتي السلام حيتحسب
وكل شي حلوة وجميله تبقي بقروش
ورينا بس اخرنا وين؟؟؟
..
قول لي كيف حنرجع ابو لي حضن اولادو ..
ونرجع كبير البيت لي منصبو ..
شوي وحتي بيوتنا ماحيبقي فيها كبير😢
شوي وكل بيوتنا حتبقي حريم وبنات
وكل اسرة ليها سند حيغادرك ياوطن
..
دا ما بس غلاء في الاسعار
دا سكين بتحرق الجوف
عارف كيف ياوطن ؟؟؟
اوريك كيف
لمن تفرق حبيبين شان خاطر واحد فضل يفتش درب القرش .. وهي فضلت تعيل اسرتها من جوا النار الختيتها فيها
من دردرة مواصلات وشماعه .. ومن معاكسات وقضايا تحرش
ومن دوام مساء وشارع بيتهم المضلم
من ومن ومن ووووالخ
من دا كلو هي عايشه وصابرة عليك .. في الوكت البتكون قدرها ( دولة تانيه ) همها منكير واخر اصدار للفون
وريني احساسك شنو وهي عايشه دور الراجل .. ونست انوثتها .. ونست زاتها ونست احلامها
..
وست الشاي .. الكان مستحمله نار الشاي
وذادت عليها النار نارين .. نار غلاء اسعارك ونار كانونها
احساسك شنو ياوطن وانت شايفها وبتتفرج ؟؟؟
...
ياخ احكيلك شي 😔
كفاك
حدك هنا
زهجنا
تعبنا
وفلسنا اكتر من ماكنا اصلا مفلسين
بعد كدا .. يانغترب .. يانموت
وانا #اعلنت_الغربة
#رساله_من_فتاة_تجاوزت_27سنه_الي_وطني_او_ماكان_وطني
#علي_رصيف_الذكري
#ساحرة_الشرق
#الارشيف
BY بالدارجي كدا 🌷
Share with your friend now:
tgoop.com/darjyat/8737