tgoop.com/donish_uz/7292
Last Update:
Бугун Жиззах вилояти телерадиокомпанияси кундузги дастурлари орқали даниялик машҳур эртакнавис ёзувчи Ханс Кристиан Андерсен қаламига мансуб "Қор маликаси" фильмини намойиш этди. Тўғриси, мириқиб томоша қилдим, бир зум болаликка қайтгандек бўлдим. Ва яна бундан анча йиллар аввал, худди шу ижодий жамоада бош муҳаррир бўлиб ишлаб юрган кезларимни хотирладим...
Қайсидир йилни кутиб олиш арафасида "Сангзор арчаси" деб номланган (ўша пайтда Жиззах радиоси "Сангзор" деб аталарди) саҳналаштирилган дастур орқали ёш мухлислар учун ўзига хос совға тайёрлагандик. Сценарийни тайёрлашда Латофат Неъмат, эртакдаги ролларни ижро этишда Умида Қосимова (Қор маликаси), Зокир Матчонов (Кай), Гулчеҳра Шарипова (Қароқчи), шунингдек, (бошқа эртак воқеаларидан олинган саҳналар бўйича) Жамила Деҳқонова (Қорбобо), Лазиза Камолжонова (Қорқиз), Қобил Соқиев (чет эллик элчи), Фарҳод Тошпўлатов (Жин), умумий дастурни тайёрлашда Сайёра Бўронова, Ўткир Холбеков, кўрсатувни тасвирга олишда Равшан Йўлдошев ва яна кўплаб ҳамкасбларимиз (кимдир ёддан кўтарилган бўлса минг бор узр) билан биргаликда гарчи техник жиҳатдан анчайин муаммолар бор бўлсада, бироқ нимадир қилишга ҳаракат қилгандик, нимагадир эришгандик...
Бугун телерадиокомпаниянинг имкониятлари жуда ҳам кенгайди. Замонавий студиялар, энг сўнгги русумдаги техникалар, ижодий салоҳият, яхшигина маош ва қалам ҳақи... Хуллас, мазза қилиб ишлаш учун барчаси муҳайё. Ўйлайманки, 2025 йилда жиззахлик телерадиоижодкорлар бири биридан ажойиб, халқчил дастурлари билан ўз мухлисларини кўп бор хушнуд этишади.
Бунга ишонаман ва янги йилда уларнинг ижодий ишларига юксак парвозлар тилаб қоламан.
Саид Донишев,
"Жиззах овози" газетаси бош муҳаррири
01.01.2025 й.
@donish_uz
BY Донишев ён дафтари📝
Share with your friend now:
tgoop.com/donish_uz/7292